కరీంనగర్ జిల్లాలో పాత కక్షలు కాస్తా దారుణ హత్యకు దారితీశాయి. ఇల్లందకుంట మండలం పాతర్లపల్లి గ్రామంలో అర్ధరాత్రి వేళ ఘోరం జరిగింది. ఒకే కుటుంబానికి చెందిన తండ్రి, కొడుకులపై దుండగులు కత్తులతో విచక్షణారహితంగా దాడికి తెగబడ్డారు. ఈ కిరాతక దాడిలో తండ్రి అక్కడికక్కడే ప్రాణాలు కోల్పోగా.. కొడుకు మృత్యువుతో పోరాడుతున్నాడు.
స్థానికులు తెలిపిన వివరాల ప్రకారం.. పాతర్లపల్లికి చెందిన నందికొండ రాజు, అతని కొడుకు నిశాంత్లపై దుండగులు కత్తులతో ఎగబడ్డారు. ఈ ఘోర దాడిలో తీవ్ర రక్తస్రావమై తండ్రి నందికొండ రాజు అక్కడికక్కడే ప్రాణాలు విడిచాడు. ఇక కొడుకు నిశాంత్కు తీవ్ర గాయాలు కావడంతో.. గమనించిన స్థానికులు వెంటనే అతడిని చికిత్స నిమిత్తం ఆసుపత్రికి తరలించారు. ప్రస్తుతం నిశాంత్ పరిస్థితి విషమంగా ఉన్నట్లు తెలుస్తోంది.
ఇంటి పక్కన ఉండే వ్యక్తితో గత కొంతకాలంగా ఉన్న భూమి లేదా వ్యక్తిగత విభేదాలే ఈ దారుణ హత్యకు కారణమని ప్రాథమిక సమాచారం అందుతోంది. నిందితులు పక్కా ప్లాన్తోనే కత్తులతో దాడి చేసినట్లు తెలుస్తోంది. సమాచారం అందుకున్న వెంటనే ఇల్లందకుంట పోలీసులు ఘటనా స్థలానికి చేరుకున్నారు. క్లూస్ టీమ్తో ఆధారాలు సేకరిస్తూ, కేసు నమోదు చేసి దర్యాప్తును వేగవంతం చేశారు. ప్రశాంతంగా ఉండే పాతర్లపల్లి గ్రామంలో ఈ జంట దాడి ఒక్కసారిగా తీవ్ర కలకలం రేపింది.
