ప్రాజెక్ట్ చీతాలో భాగంగా తీసుకువచ్చిన చిరుతల మధ్య భీకర పోరు జరిగిందని అధికారులు తెలిపారు. ఈ కొట్లాటలో ఒక చిరుత తీవ్రంగా గాయపడిందని అన్నారు. ప్రాజెక్టు చీతాలో భాగంగా నమీబియా, ఆఫ్రికా నుంచి తీసుకొచ్చిన చిరుత పులులను మధ్యప్రదేశ్లోని షియోపూర్లోని కూనో జాతీయ పార్క్లో ఇటీవలే విడిచి పెట్టారు. పలు కారణాలతో వీటిల్లో కొన్ని మరణించాయి. తాజాగా కొన్ని పోట్లాడుకున్నాయి. నమీబియా నుంచి తీసుకొచ్చిన గౌరవ్, శౌర్య, దక్షిణాఫ్రికా నుంచి తీసుకొచ్చిన అగ్ని, వాయు చీతాలు పోట్లాడి.. పరస్పరం గాయపరుచుకున్నాయి. పార్కులోని ఫ్రీ రేంజ్ ఏరియాలో ఈ ఘటన జరిగినట్లు అధికారులు తెలిపారు. వాటి ఘర్షణను గమనించిన అధికారులు ఆపేందుకు క్రాకర్స్ కాల్చారు. సైరన్లు పెట్టారు. ఇది కొంత ఫలించింది.
తీవ్రంగా గాయపడిన చీతా..
ఈ పోరులో అగ్ని అనే చిరుత తీవ్రంగా గాయపడినట్లు అధికారులు వెల్లడించారు. దానికి ప్రస్తుతం చికిత్స అందిస్తున్నామని, ఆరోగ్యం నిలకడగా ఉందని చెప్పారు. ఇలాంటి ఘర్షణలు క్రూర మృగాల మధ్య సహజమేనని ఫారెస్ట్ డివిజనల్ ఆఫీసర్ పీకే వర్మ చెప్పారు. అంతరించిపోతున్న చిరుత పులులను రక్షించే కార్యక్రమంగా కేంద్ర ప్రభుత్వం ప్రాజెక్ట్ చీతా అనే ప్రోగ్రాం చేపట్టింది. ఇందులో భాగంగా 2022లో 8 చిరుతపులులను కూనో నేషనల్ పార్కుకి తీసుకొచ్చారు. ఈ ఏడాది ఫిబ్రవరిలో 12 చిరుతలను పార్కుకి తరలించారు. వివిధ కారణాల వల్ల వీటిల్లో మొత్తం ఆరు చనిపోయాయి. మిగతా వాటిని రక్షించేందుకు అధికారులు శ్రమిస్తున్నారు.
