ఫుల్టీ బిల్ట్ వాహనాలకు మొదటి రెండేళ్లు ఫిట్నెస్ సర్టిఫికెట్ (ఎఫ్సీ) అవసరం లేదు. దీనిపై కేంద్ర ప్రభుత్వం జారీ చేసిన నోటిఫికేషన్ను రాష్ట్ర ప్రభుత్వం అమలు చేస్తోంది. దీనికి సంబంధించి అన్ని ఆఫీసులకు ప్రభుత్వం ఆదేశాలు జారీ చేసింది. చాసిస్, బాడీతో కలిపి తయారైన వాహనం రోడ్డు మీదకు వస్తే దాన్నే ఫుల్లీ బిల్ట్ వాహనం అంటారు. ఈ లెక్కన కొన్ని రకాల హెవీ ట్రక్కులు, స్కూల్ బస్సులు, మినీ వ్యాన్లు, కార్లకు ఎఫ్సీ మినహాయింపు లభించనుంది. వివిధ రాష్ట్రాల సలహాలు సూచనలు తీసుకున్న కేంద్ర ప్రభుత్వం, అందుకు తగ్గట్టు మోటార్ వెహికిల్ చట్టం 1998కి కేంద్ర ప్రభుత్వం మార్పులు చేసింది. ఆ మార్పుల్లో భాగంగానే ఫుల్లీ బిల్ట్ వాహనాలకు ఎఫ్సీ అవసరం లేదని, అన్ని రాష్ట్రాలూ అమలు చేయాలని పేర్కొంది. ఆ రూల్స్ను తొలుత రాష్ట్ర ప్రభుత్వం పాటించలేదు. ఇటీవలి కాలం నుంచే దాన్ని అమల్లోకి తెచ్చింది. ఇన్నాళ్లూ ఎఫ్సీ కావాలంటే మీసేవాలో అప్లై చేసుకోవాలి. వాళ్లిచ్చే డేట్కు వెళితే సర్టిఫికెట్ ఇస్తారు. అందుకు ₹750 నుంచి ₹1000 వరకు ఫీజు చెల్లించాల్సి ఉండేది. ఇప్పుడు కొత్త విధానం అమల్లోకి రావడంతో అవేవీ అవసరం లేకుండా పోయింది. అయితే, ప్రతి రెండేళ్లకోసారి మాత్రం కచ్చితంగా ఫిట్నెస్ చేయించుకోవాల్సి ఉంటుందని అధికారులు చెబుతున్నారు. అలా 8 ఏళ్ల పాటు ఎఫ్సీ తీసుకోవచ్చు. 8 ఏళ్ల తర్వాత ఏడాదికొకసారి సర్టిఫికెట్ తీసుకోవాల్సి ఉంటుంది. కేంద్రం నుంచి వచ్చిన ఆదేశాల ప్రకారం ఎఫ్సీ రూల్స్ను అమలు చేస్తున్నామని రవాణా శాఖ డీటీసీ పీ శ్రీనివాస్ తెలిపారు. కొత్త రూల్స్ను అమలు చేస్తున్నందుకు కేంద్ర, రాష్ట్ర ప్రభుత్వాలకు ఆటో కార్మిక సంఘాల సమాఖ్య కృతజ్ఞతలు తెలిపింది.
