- నమ్మించి బైక్పై తీసుకెళ్లి అఘాయిత్యం..
- ఆత్మహత్య చేసుకున్న బాధితురాలు
- నిందితుల్లో ఎంపీటీసీ తమ్ముడు, ఇద్దరు మైనర్లు, మరో వ్యక్తి
వరంగల్ క్రైం, వెలుగు: హన్మకొండలో దారుణం జరిగింది. ఓ బాలికను నమ్మించి వెంట తీసుకెళ్లి.. నలుగురు గ్యాంగ్ రేప్కు పాల్పడ్డారు. దీంతో బాధితురాలు ఉరివేసుకొని ఆత్మహత్య చేసుకుంది. నిందితుల్లో ఓ ఎంపీటీసీ తమ్ముడితోపాటు ఇద్దరు మైనర్లు ఉన్నారు. తొమ్మిది నెలల చిన్నారిపై అత్యాచారం, హత్య కేసులో నిందితుడికి వరంగల్ మొదటి అదనపు కోర్టు ఉరిశిక్ష విధించి నాలుగు రోజులు గడువక ముందే ఈ సంఘటన వెలుగుచూడటం తీవ్ర సంచలనం సృష్టించింది. హన్మకొండకు చెందిన 14 ఏండ్ల బాలిక తండ్రి కొన్నాళ్ల క్రితం చనిపోయాడు. దీంతో బిడ్డను వదిలేసి తల్లి వెళ్లిపోయింది. ఆ పాపను నాన్నమ్మ చేరదీసి చదివిస్తోంది. రోజూ స్కూల్కు వెళ్లి వచ్చే క్రమంలో హసన్‍పర్తి మండలం పెంబర్తికి చెందిన ఆటో డ్రైవర్‍తో బాలికకు పరిచయం ఏర్పడింది. ఆ ఆటో డ్రైవర్ వయసు 15 ఏండ్లు. శనివారం ఇంట్లో బాలిక ఒంటరిగా ఉందన్న విషయం తెలుసుకున్న ఆటో డ్రైవర్.. ఉదయం 11.30 గంటలకు అక్కడికి వచ్చాడు. యూనివర్సిటీ వరకు వెళ్లొద్దామని చెప్పి ఆ అమ్మాయిని తీసుకెళ్లాడు. కొద్దిదూరం వెళ్లగా పెంబర్తికి చెందిన కొయ్యడ తిరుపతి (18) కూడా వారి బైక్ ఎక్కాడు. వారిద్దరూ బాలికను నేరుగా పెంబర్తి సమీపంలోని మామిడితోటలోకి తీసుకెళ్లారు. అక్కడ వారికి అదే గ్రామానికి చెందిన మరో ఇద్దరు జతకలిశారు. ఆ ఇద్దరిలో ఓ మైనర్, ఓ యువకుడు ఉన్నాడు. అమ్మాయికి మత్తు ఇంజక్షన్‍ ఇచ్చి నలుగురు గ్యాంగ్ రేప్కు పాల్పడ్డారు. సాయంత్రం ఆ బాలికను ఇంటివద్ద దించేసి పారిపోయారు. విషయాన్ని బాధితురాలు తన నాన్నమ్మకు చెప్పడంతో.. పొద్దున్నే పోలీసులకు ఫిర్యాదు చేద్దామని ఆమె ఓదార్చింది. ఆదివారం తెల్లవారుజామున నాన్నమ్మ పాలు తీసుకురావడానికి దుకాణానికి వెళ్లి తిరిగివచ్చే సరికి బాలిక ఇంట్లో ఫ్యాన్కు ఉరివేసుకొని కనిపించింది. గమనించిన స్థానికులు హాస్పిటల్కు తరలించగా.. అప్పటికే మృతి చెందినట్లు డాక్టర్లు నిర్ధారించారు.
మృతురాలి నాన్నమ్మ ఫిర్యాదు మేరకు పోలీసులు కేసు నమోదు చేశారు. ఇద్దరు నిందితులను పోలీసులు అదుపులోకి తీసుకున్నారు. మరో ఇద్దరి కోసం గాలిస్తున్నారు. నిందితుల్లో ఇద్దరు మైనర్లు ఉండగా, మరో నిందితుడు కొయ్యడ తిరుపతి.. పెంబర్తి ఎంపీటీసీ మెంబర్కు తమ్ముడు.
