ఎక్కడికైనా వెళ్లాలంటే.. ఉన్నచోటు నుంచే బైక్లు, ఆటోలు, కార్లు బుక్ చేసుకుంటున్నాం. బట్టలు, ఇతరత్రా ఇంటి, వంట సామాన్లని ఒక్క క్లిక్తోనే ఇంటికి తెప్పించుకుంటున్నాం. అచ్చం అలానే కరెంట్ పనికి, ఇంటి ఫ్లోర్ క్లీనింగ్కి, పగిలిన పైపుల్ని రిపేర్ చేయడానికి ఆన్లైన్ ద్వారా వర్కర్స్ని పంపితే? ఈ ఆలోచన నుంచి వచ్చిందే ‘ఫిక్స్ ఇట్’. దీన్ని నడుపుతోంది ఇరవై ఏండ్ల మహ్మద్ అబ్దుల్ గఫూర్.
రెండేండ్ల కిందట అబ్దుల్ ఒక్కడితో మొదలైన ‘ఫిక్స్ ఇట్’లో ప్రస్తుతం డెబ్భై మందికి పైగా ఉద్యోగులు ఉన్నారు. ఇంటి నాలుగ్గోడల మధ్య మొదలైన ఈ స్టార్టప్ ఇప్పుడు కేరళలోని మలప్పురం, కోజికోడ్, పాలక్కాడ్ జిల్లాల్లోనూ సర్వీస్లు అందిస్తోంది. నెలకి ముప్పై లక్షలకి పైగా ఆదాయం తెచ్చుకుంటున్న మహ్మద్ను ‘ఈ బిజినెస్ ఎలా నడుపుతున్నావు?’ అని అడిగితే? ‘నేను పుట్టి, పెరిగిన పరిసరాలే నన్ను బిజినెస్ వైపు నడిపించాయ’ని అంటాడు.
పదహారేండ్లకే మొదటి స్టార్టప్
అబ్దుల్ పుట్టింది కేరళలోని మలప్పురం జిల్లా కొందోట్టిలో అయినప్పటికీ.. పదో క్లాస్ వరకు దుబాయిలో చదువుకున్నాడు. ఆ తర్వాత తల్లిదండ్రులతో పాటు సొంత ఊరికి షిఫ్ట్ అయ్యాడు. అబ్దుల్ తండ్రి ఇండియాకి వచ్చాక సొంతంగా హార్డ్ వేర్ షాపు పెట్టాడు. దాంతో తండ్రిని చూస్తూ బిజినెస్ స్కిల్స్ నేర్చుకున్నాడు అబ్దుల్. తండ్రి షాపుకొచ్చే కస్టమర్స్ కాంటాక్ట్స్ తీసుకొని.. వాళ్లకి ఇంటి, వంట సామాన్లని సప్లయ్ చేసే ఓ చిన్న స్టార్టప్ మొదలుపెట్టాడు. అప్పటికి అతని వయసు పదహారేండ్లు. ఆ బిజినెస్ పుంజుకుంటున్న టైంలోనే కరోనా, లాక్డౌన్ వల్ల బ్రేక్ వచ్చింది.
ఆ ఆలోచన వచ్చింది
లాక్డౌన్ టైంలో అబ్దుల్ వాళ్ల ఇంట్లోని నీళ్ల పైపు ఒకటి పాడైంది. ఆ టైంలో అబ్దుల్ క్వారెంటైన్లో ఉన్నాడు. అతని తండ్రి సిటీకి దూరంగా ఉన్నాడు. దాంతో వాళ్ల అమ్మ చుట్టుపక్కలున్న ప్లంబర్లు అందరికీ ఫోన్ చేసింది. కానీ, ఎవరూ రెస్పాండ్ కాలేదు. దాంతో రెండుమూడు రోజుల పాటు వాటర్ లీకేజ్తో ఇబ్బంది పడ్డారు. అప్పుడే ప్లంబింగ్, ఎలక్ట్రీషియన్ వర్క్, ఫ్లోర్ క్లీనింగ్, గార్డెనింగ్.. లాంటి పనుల కోసం వర్కర్స్ని సప్లయ్ చేయడానికి ఓ స్టార్టప్ పెట్టాలనుకున్నాడు. అందుకోసం మొదటిగా చుట్టుపక్కల ఆ పనులు చేస్తున్న వాళ్లని కాంటాక్ట్ అయ్యాడు. వాళ్లకి తన బిజినెస్ మోడల్ వివరించాడు. ఒక సిమ్ కార్డు తీసుకొని.. ఇంటిముందు ఆ నెంబర్ని బ్యానర్ కట్టించాడు. అలా ఐదువేల రూపాయల పెట్టుబడితో ‘ ఫిక్స్ ఇట్’ ని మొదలుపెట్టాడు.
అయితే స్టార్టప్ పెట్టిన కొత్తలో నెల మొత్తంలో నలుగురు కస్టమర్స్ మాత్రమే వచ్చారు. అయినా నిరుత్సాహపడలేదు. సిటీలోని మరికొన్ని చోట్ల తన సర్వీస్ గురించి బ్యానర్స్ కట్టాడు. మెల్లిగా కస్టమర్ల సంఖ్య పెరిగింది. దాంతో ఆఫీసు తెరిచాడు. కస్టమర్స్ అవసరాలను అర్థం చేసుకోవడానికి ఉద్యోగులను పెట్టుకున్నాడు. ఎలక్ట్రీషియన్స్, పంబ్లర్స్.. ఇలా రకరకాల ఫీల్డ్స్కి సంబంధించిన 300 మంది ఉద్యోగులు పనిచేస్తున్నారు ప్రస్తుతం ఫిక్స్ ఇట్లో.
యాప్ తీసుకొస్తున్నాం
ఎవరైనా కస్టమర్ ఫిక్స్ ఇట్ని కాంటాక్ట్ అయితే.. వాళ్ల అవసరాన్ని బట్టి వర్కర్ని సెలక్ట్ చేస్తారు. అయితే ఇక్కడ కస్టమర్, వర్కర్ నేరుగా మాట్లాడుకోరు. ఫిక్స్ ఇట్ పంపిన లొకేషన్ ద్వారా కేవలం ఎనిమిది నిమిషాల్లో వర్కర్, కస్టమర్ ఇంటికి వెళ్తాడు. కస్టమర్ తన టైం వెసులుబాటుని బట్టి వర్కర్ని బుక్ చేసుకోవచ్చు కూడా. పని చేయించుకున్న గంటల్ని బట్టి వాళ్లు డబ్బులు చెల్లించాలి. ప్రస్తుతం నెలకి ముప్పై లక్షల టర్నోవర్తో నడుస్తోంది ఈ స్టార్టప్. రానున్న రోజుల్లో ఈ సేవల్ని మరింత విస్తరిస్తా అంటున్నాడు ఇంజినీరింగ్ చదువుతున్న అబ్దుల్. అందుకోసం ఓ యాప్ని కూడా తెస్తాడట. మొదట్లో నన్ను, నా బిజినెస్ని ఎవరూ సీరియస్గా తీసుకోలేదు. కారణం నా వయసు. నా బిజినెస్ ఐడియా చుట్టుపక్కల వర్కర్స్కు చెప్పినప్పుడు.. ‘ఇదంతా అయ్యే పనికాదం’టూ కొట్టిపడేశారు. వేరే బిజినెస్ ఓనర్స్ ‘ఇవన్నీ నీకెందుకు?’ అంటూ మాట్లాడారు. అయినా వెనకడుగేయలేదు. ఒక పక్క చదువుకుంటూనే బిజినెస్పైనా ఫోకస్ పెట్టా. ఆ ప్రయత్నమే ఈరోజు ఇక్కడి వరకు తీసుకొచ్చింది. స్టేట్ లెవల్ గ్లోబల్ స్టూడెంట్ అవార్డు కూడా అందుకున్నా అని చెప్పాడు అబ్దుల్.
