ఇంట్లో ఇడ్లీ చేసినం.. ఎన్ని రోజులుం టది? దోశలు పోసినం.. ఎప్పటిదాకా పాడుకాకుండా ఉంటయి? అన్నం, కూర వండినం.. ఖరాబ్ కాకుండా ఉంటదా? మహా అయితే ఒకట్రెండు
రోజులు ఆ ఫుడ్డు పాడుకాకుండా ఉంటుందేమో. ఫ్రిజ్లో పెడితే ఓ వారం ఏసుకోండి. ఒక్క రోజు
అయితేనే.. సద్ది కూడు అనేస్తం. పక్కకు నెట్టేస్తం. మరి, మూడేళ్లు ఫుడ్డు పాడు కాకుండా ఉంటే.. కచ్చితంగా ఉంటుందంటున్నారు ముంబై యూనివర్సిటీకి చెందిన వైశాలి బంబోలే అనే ఫిజిక్స్ ప్రొఫెసర్. అందుకు ఓ ప్రత్యేకమైన పద్ధతిని అభివృద్ధి చేశామంటున్నారు.
వంటకాలకు అసలు ఏ ప్రిజర్వేటివ్స్ కలపకుండానే ఫుడ్డును మూడేళ్లు దాచి పెట్టొచ్చని చెబుతున్నారు. అన్నేళ్లయినా ఆ భోజనం ఘుమఘుమలు, రుచి ఏ మాత్రం తగ్గవంటున్నారు వైశాలి. పోషక విలువలు, మృదుత్వం , రుచి చెక్కు చెదరకుండా ఉంటాయని కరాఖండిగా చెబుతున్నారు. ఎలక్ట్రానిక్ బీమ్ రేడియేషన్ అనే పద్ధతి ద్వారా ఆహారాన్ని మూడేళ్ల పాటు నిల్వ చేయొచ్చని వైశాలి బంబోలే చెప్పారు. తొలిసారి ఆ టెక్నిక్ను వాడి సక్సెస్ అయినట్టు తెలిపారు. పేటెంట్ కోసం దరఖాస్తు చేసుకునేందుకు సిద్ధమవుతున్నామన్నారు.
15 ఏళ్లుగా ఈ కొత్త టెక్నిక్పై పనిచేస్తున్నామని, కెమికల్ పాలిమరైజేషన్ కు ఇది ఉత్ప్రేరకంలా ఉపయోగపడుతుందని చెప్పారు. ఆహారానికి బ్యాక్టీరియా సోకకుండా అది కాపాడుతుందని, తద్వారా దాని నిల్వ సామర్థ్యం పెరుగుతుందని చెప్పారు . 2013 నుంచి ఆ టెక్నిక్పై మరింత తీవ్రంగా పనిచేస్తున్నామని, బోర్డ్ ఆఫ్ రేడియేషన్ అండ్ ఐసోటోప్ టెక్నాలజీ (బీఆర్ఐటీ)కి తమ ప్రయోగ థీసిస్ ను పంపామని చెప్పారు. తమ ఆలోచన నచ్చి ముంబై యూనివర్సిటీలో పరిశోధన, బయో నానో ల్యాబ్ కోసం రూ.45 లక్షలు ఇచ్చేందుకు అంగీకరించిందని తెలిపారు. ప్యాకేజ్డ్ ఫుడ్ ఇండస్ట్రీకి ఇది బాగా ఉపయోగపడుతుందన్నారు. ప్రకృతి విపత్తు లొచ్చినప్పుడు బాధితులకు అందించే ఆహారం పాడుకాకుండా చూడొచ్చని, రోదసీలోకి వెళ్లే ఆస్ట్రోనాట్ల ఫుడ్డుకూ ఇది చాలా ఉపయోగకరమని వైశాలి చెప్పారు.
