ఆర్మూర్, వెలుగు : మానవత్వం మరిచి ఓ వృద్ధురాలిని కుటుంబీకులే రోడ్డుపై వదిలేసిన ఘటన ఆర్మూర్లో జరిగింది. స్థానికుల వివరాల ప్రకారం.. ఆర్మూర్ పట్టణానికి చెందిన ఓ వృద్ధురాలు(70) రెక్కలు ముక్కలు చేసుకుని ఒక్కగానొక్క కొడుకును సాకి పెండ్లి చేసింది. కొన్ని సంవత్సరాలు సంసారం సాఫీగా సాగింది. ఏడాది కాలంగా వృద్ధురాలి మానసిక పరిస్థితి బాగాలేదు.
నిరుపేద కుటుంబం కావడంతో వైద్యం చేయించలేక కుటుంబీకులు ఆర్మూర్తహసీల్దార్ ఆఫీస్ సమీపంలో వారం రోజుల కింద వదిలేసి వెళ్లారు. చలి తీవ్రతకు గజగజ వణుకున్న ఆమె దీనస్థితిని చూసి ఓ దాత రగ్గు ఇవ్వగా కప్పుకుని రోడ్డు వెంట తిరుగుతోంది. ఎక్కడికి వెళ్లాలో తెలియక కన్నీళ్లు పెడుతోంది. అధికారులు స్పందించి ఏదైనా వృద్ధాశ్రమంలో వేయాలని స్థానికులు కోరుతున్నారు.
