- ఏడోసారి సెమీ ఫైనల్ చేరిన డిఫెండింగ్ చాంప్
- క్వార్టర్ ఫైనల్లో 2-1తో ఇంగ్లండ్పై విక్టరీ
అల్ఖోర్ (ఖతార్): కీలక టైమ్లో వచ్చిన చాన్స్లను సద్వినియోగం చేసుకున్న డిఫెండింగ్ చాంపియన్ ఫ్రాన్స్.. ఫిఫా వరల్డ్కప్లో సెమీఫైనల్లోకి దూసుకెళ్లింది. శనివారం అర్ధరాత్రి జరిగిన క్వార్టర్ఫైనల్లో ఫ్రాన్స్ 2–1తో ఇంగ్లండ్పై గెలిచింది. ఫ్రాన్స్ తరఫున అరెలియన్ చౌమెన్ (17వ ని.), ఒలివర్ గిరౌడ్ (78వ ని.) గోల్స్ సాధించగా, హ్యారీ కేన్ (54వ ని.) ఇంగ్లండ్కు పెనాల్టీ గోల్ను అందించాడు. తాజా విజయంతో బ్రెజిల్ (1962) తర్వాత వరుసగా రెండో వరల్డ్కప్ రేస్లో నిలిచిన తొలి జట్టుగా ఫ్రాన్స్ రికార్డుల కెక్కింది. మెగా టోర్నీలో ఫ్రాన్స్ సెమీస్ చేరడం ఇది ఏడోసారి కావడం విశేషం. మరోవైపు ఇంగ్లండ్ ఏడు సార్లు క్వార్టర్ ఫైనల్లోనే ఇంటిదారి పట్టింది. బుధవారం జరిగే సెమీస్లో ఫ్రాన్స్.. మొరాకోతో తలపడుతుంది.
కేన్ను కట్టడి చేస్తూ..
ఆట ప్రారంభం నుంచి ఇరుజట్లు హోరాహోరీగా తలపడినప్పటికీ ఇంగ్లండ్ ఎక్కువసేపు బాల్ను కంట్రోల్లో ఉంచుకుంది. కానీ గోల్స్ చేసే అవకాశాలను సృష్టించుకోలేకపోయింది. అదే టైమ్లో ఇంగ్లండ్ గోల్పోస్ట్పైకి పదేపదే దాడులు చేసిన ఫ్రాన్స్17వ నిమిషంలోనే తొలి ఫలితాన్ని సాధించింది. లెఫ్ట్ ఫ్లాంక్ నుంచి ఆంటోని గ్రిజ్మన్ ఇచ్చిన పాస్ను అందుకున్న చౌమెన్ 20 మీటర్ల దూరం నుంచి బలంగా ఇంగ్లండ్ గోల్పోస్ట్లోకి పంపి ఫ్రాన్స్ను 1–0 లీడ్లో నిలిపాడు. ఇక్కడి నుంచి స్కోరును సమం చేసేందుకు ఇంగ్లండ్ స్టార్ ఫార్వర్డ్ హ్యారీ కేన్ ఎదురుదాడికి దిగాడు. కానీ ఫ్రాన్స్ డిఫెన్స్ అతన్ని పూర్తిగా కట్టడి చేసింది. అయితే సెకండాఫ్లో హ్యారీ కేన్.. పెనాల్టీ కిక్ను గోల్గా మలిచి స్కోరును 1–1తో ఈక్వల్ చేశాడు. ఇంగ్లిష్ టీమ్ తరఫున కేన్కు ఇది 53వ గోల్ కావడం విశేషం. నేషనల్ టీమ్ తరఫున అత్యధిక గోల్స్ చేసిన వేన్ రూనీతో సమంగా నిలిచాడు. ఇక్కడి నుంచి గోల్ చేసే అవకాశాలు ఇంగ్లండ్కే ఎక్కువగా వచ్చినా పూర్తిస్థాయిలో సద్వినియోగం చేసుకోలేకపోయింది. మరోవైపు 77వ నిమిషంలో ఇంగ్లండ్ డిఫెండర్ హ్యారీ మిగేర్ను తప్పిస్తూ గిరౌడ్ కొట్టిన సూపర్ షాట్ ఇంగ్లండ్ కీపర్ జోర్డాన్ పిక్ఫోర్డ్ను దాటేసింది. దీంతో ఫ్రాన్స్ 2–1లీడ్లోకి వెళ్లింది. అయితే 84వ నిమిషంలో స్కోరును సమం చేసే చాన్స్ను హ్యారీ కేన్ మిస్ చేశాడు. అతను కొట్టిన పెనాల్టీ కిక్కు బాల్ నెట్ పై నుంచి బయటకు వెళ్లింది. అంతే ఇంగ్లండ్ ఫ్యాన్స్తో పాటు ప్లేయర్లందరూ ఒక్కసారిగా డీలాపడిపోయారు. ఖతార్లో క్వార్టర్స్ చేరే క్రమంలో 12 గోల్స్ చేసిన ఇంగ్లండ్ ఈ వరల్డ్కప్లో తొలిసారి మ్యాచ్లో వెనుకబడింది. ఫ్రాన్స్ స్టార్ ప్లేయర్ ఎంబాపె గోల్ కొట్టకపోయినా.. కేన్ కిక్ మిస్ అయిన తర్వాత చాలా ఉద్వేగంగా స్పందించాడు. ఈ టోర్నీలో తను ఐదు గోల్స్తో టాప్ స్కోరర్గా ఉన్నాడు.
సెమీస్లో ఎవరితో ఎవరు
అర్జెంటీనా x క్రొయేషియా - మంగళవారం రా. 12.30
ఫ్రాన్స్ x మొరాకో - బుధవారం రా. 12.30