షహీనా అత్తర్వాలా. జీవితం తనముందు నిలిపిన ఎన్నో సవాళ్లను, అడ్డంకులను దాటుకుని ముంబయి స్లమ్స్ నుంచి మైక్రోసాఫ్ట్లో ఉద్యోగం వరకు ఎదిగింది. ముంబయి స్లమ్స్ నుంచి మైక్రోసాఫ్ట్ జాబ్ వరకు అంటూ ఆమె షేర్ చేసుకున్న ట్విట్టర్స్టోరీ గత రెండురోజులుగా వైరల్ అవుతోంది. అడ్డంకులను దాటుకుని అనుకున్న లక్ష్యాన్ని సాధించిన ఆమె స్టోరీ ఎందరికో ఇన్స్పిరేషన్. ఆ స్టోరీ గురించి...
‘‘మా నాన్న వీధి వ్యాపారి (హాకర్). దానివల్ల రోడ్ల మీద నిద్రపోవాల్సి వచ్చేది. ఉత్తరప్రదేశ్ నుంచి ముంబయికి జీవితాన్ని వెతుక్కుంటూ వచ్చాడు. జీవితం గడిచేందుకు ఎసెన్షియల్ ఆయిల్స్ అమ్మేవాడు. నా బాల్యంలో ఎక్కువ భాగం బాంద్రా రైల్వేస్టేషన్ దగ్గర ఉండే దర్గా గల్లి స్లమ్లో గడిచింది. స్కూల్లో చదువుకునేటప్పటినుంచే కంప్యూటర్లు అంటే విపరీతమైన ఇష్టం నాకు. కానీ నాకొచ్చే మార్కులతో కంప్యూటర్ క్లాసులకు వెళ్లడం కుదర్లేదు. దాంతో నన్ను కుట్టుపని నేర్చుకోమన్నారు. ఒకపక్క అది నేర్చుకుంటూనే నా కల నెరవేర్చుకోవడం కోసం రకరకాల ప్రయత్నాలు చేశా. అప్పుచేసి నాకు కంప్యూటర్ కోర్సు నేర్పించమని మా నాన్నని బలవంతపెట్టడం అందులో ఒకటి. ఎలాగైతేనేం ఒక కంప్యూటర్ క్లాసులో చేర్చాడు. అక్కడ ప్రోగ్రామింగ్లో బేసిక్స్ నేర్చుకున్నా. అది నేర్చుకునేటప్పుడే డిజైన్ను కెరీర్గా మార్చుకోవాలి అనుకున్నా” అని తన కెరీర్ జర్నీ గురించి చెప్పిన షహీనా అత్తర్వాలా ముంబయి యూనివర్శిటీ నుంచి లా డిగ్రీ పూర్తి చేసింది. తరువాత విజువల్ కమ్యూనికేషన్స్ అండ్ డిజైన్లో ఎన్ఐఐటి నుంచి డిప్లొమా అందుకుంది. కొంతకాలం బెంగళూరులో జూమ్కార్ కంపెనీలో యుఎక్స్ డిజైన్ లీడర్గా చేసింది. ఇప్పుడు మైక్రోసాఫ్ట్లో డిజైన్ లీడర్గా పనిచేస్తోంది.
స్లమ్ లైఫ్ పవర్ఫుల్
ఈ జర్నీ అంతటిలో చాలా ఇబ్బందులు ఎదుర్కొన్నా అంటున్న షహీన స్లమ్ లైఫ్ గురించి చెప్తూ “స్లమ్లో జీవితం గడపడం చాలా కష్టం. చాలా భయంకరమైన పరిస్థితులను నాకు పరిచయం చేసింది. నాకప్పుడు ఏడేండ్లు. ప్రతీరోజూ ఉదయం ఒక బకెట్ నిండా నీళ్లు పట్టుకుని, పబ్లిక్ టాయిలెట్కు వెళ్లేదాన్ని. బకెట్కు ఉన్న సన్నటి హ్యాండిల్ వల్ల చేతివేళ్లు నొప్పి పుట్టేవి. దాంతో బకెట్ సరిగ్గా పట్టుకోలేక, బాత్రూమ్ దగ్గరకు వెళ్లేలోపు చాలా నీళ్లు కిందపోయేవి. అప్పడే ఏదైనా చేయాలనిపించింది. నూనె డబ్బాను రౌండ్గా కట్ చేశా. దాన్ని పట్టుకోవడం చాలా ఈజీ అయింది. నీళ్లు కూడా కిందపోలేదు. మా పక్కింటివాళ్లు నేను తయారుచేసిన ప్లాస్టిక్ కంటెయినర్ను వాడడం మొదలుపెట్టారు. నా దగ్గర ఉన్న తక్కువ రిసోర్స్ వాడి నలుగురికీ ఉపయోగపడేలా చేయగలననిపించింది. అలాగే స్లమ్లో ఉన్నప్పుడు నేను ఎదుర్కొన్న ఆడామగా తేడా, అబ్బాయిల వేధింపులే నా జీవితాన్ని డిఫరెంట్గా దిద్దుకోవాలన్న ఆసక్తికి ఎనర్జీ ఇచ్చాయి. ప్రోగ్రామింగ్ నేర్చుకున్న నేను దాన్ని వదిలేసి డిజైన్లో కెరీర్ డెవలప్ చేసుకోవాలి అనుకున్నా. మారుతున్న పరిస్థితులకు టెక్నాలజీ మెయిన్ టూల్ అవుతుంది అనిపించడమే అందుకు కారణం.
2015లో స్లమ్ను వదిలి నా జీవితానికి పునాది వేసుకునేందుకు అడుగు బయటపెట్టాను. కొన్నేళ్ల కష్టం తరువాత నా కల ఫలించింది. ఇరుకుగా ఉండే మురికివాడ నుంచి విశాలమైన అపార్ట్మెంట్లోకి మారాను. ఇప్పుడు మా కుటుంబమంతా ఆకాశాన్ని చూడగలుగుతున్నాం. గాలి, వెలుతురు ఫ్లాట్లోకి వస్తోంది. పచ్చని చెట్లను చూస్తూ, పక్షుల కువకువలను వింటున్నాం” అని నవ్వుతూ చెప్పింది.
నెట్ఫ్లిక్స్ సిరీస్ ‘బ్యాడ్ బాయ్ బిలియనీర్లో చూపించిన స్లమ్లోని ఒక ఇంట్లో మేం ఉండేవాళ్లం. ఇండియాలో నాలాగా కొన్ని లక్షల కుటుంబాలు పేదరికంలో మగ్గిపోతున్నాయి. వాటిని మీరు చూసి ఉండకపోవచ్చు. కానీ వాళ్లందరిలో ఒక ఆశ ఉంది. అదేంటంటే... ఓ మాదిరి చదువుకున్న వాళ్లు ఎవరైనా మా హక్కుల గురించి అధికారంలో ఉన్న వాళ్లని అడుగుతారని. జీవితాల్లో మార్పు తెస్తారని. ఇండియాలో పేదవాడు తమ సమస్య గురించి మాట్లాడితే మీరు కన్విన్స్ కాకపోవచ్చు. అలాంటప్పుడు ఒక స్లమ్ లేదా పల్లెలోనో కొన్ని రోజులు ఉండేందుకు ప్రయత్నించండి. అప్పుడు మీకు అసలు విషయం తెలుస్తుంది. బతకడం ఎంత కష్టమో..!
