మరింత పెద్దగా, దగ్గరగా పెద్దన్న గురుడు.. జూన్ అంతా కనిపిస్తాడు
చీకటి నల్లగా ఉంటది కానీ, భూమిని సల్లగ జేస్తది.. ఆకాశాన్ని అద్భుతంగా చూపిస్తది. చుక్కల తళుక్కులు, చంద్రుడి చమక్కులతో మెరిపిస్తది. ఇప్పుడు జూన్ మొత్తం అలాంటి ఆకాశ అద్భుతాలు మన కంట్ల పడితే ఎట్లుంటది? మస్తు ఉంటది కదా! ఈ నెలంతా గ్రహాలకు పెద్దన్న గురుడు రేత్రి మొత్తం కనిపిస్తడు. ఇప్పటి కన్నా పెద్దగైతడు. చిన్నోడు బుధుడు, ఏడోవాడు అంగారకుడు మనసు పడినట్టున్నరేమో పక్కపక్కకు వస్తున్నరు. వాటికి అదనంగా చందమామ వంకర్లు తిరుగుతడు. ఆ విశేషాలేంటో చెప్పింది నాసా. వాటిని చూసేద్దాం జూన్ అంతా. అసలేం జరుగుతుందో, ఎట్ల సూడాల్నో తెలుసుకుందాం.
పెద్దన్న మరింత పెద్దగా
పొద్దుగూకే టైంలో సూర్యుడు అట్లపోవడం మొదలు.. పెద్దన్న గురుడు పైకొస్తడు. టెలిస్కోపులకు కనిపించే సైజు కన్నా మరింత పెద్దగైతడు. రాత్రి మొత్తం వెలిగిపోతడు. మామూలుగా ఆకాశంపై ఓ లుక్కేస్తే ఓ చుక్కలాగా కనిపిస్తాడు గానీ, బైనాక్యులర్తోనో లేదంటే చిన్నపాటి టెలిస్కోపుతోనో చూస్తే అద్భుతంగా కనిపిస్తాడు. వాటితో చూస్తే గురుడి నాలుగు చందమామలూ కనిపిస్తాయి. అంతేకాదు, గురుడికే ప్రత్యేకమైన వంకలవంకల మేఘాలనూ చూసేయొచ్చు. ప్రస్తుతం గురుడిపై పరిశోధనల కోసం నాసా పంపిన జూనో స్పేస్క్రాఫ్ట్ దాని చుట్టూ తిరుగుతున్నది కదా.. దానికైతే దాదాపు టచ్ చేసినంత పనైతది. జూన్ 10న భూమికి ఎదురుగా గురుడు వస్తాడు. ఏటా ఒక్కసారి మాత్రమే ఇది జరుగుతుంది. అంటే గురుడు, భూమి, సూర్యుడు ఒకే కక్ష్యలోకి వస్తారన్నమాట. గురుడు, సూర్యుడి మధ్య భూమి ఉంటుంది. ఏడాదిలో గురుడిని మంచిగా చూడాలంటే మాత్రం ఇదే కరెక్ట్ టైం. ఎందుకంటే ఇప్పుడే గురుడు భూమికి మరింత దగ్గరగా వచ్చి పెద్దగా కనిపిస్తాడు.
మధ్యలో గాళ్లిద్దరూ
జూన్ మధ్యలో అంగారకుడు (మార్స్), బుధుడు (మెర్క్యురీ) ముచ్చట్లు చెప్పుకోబోతున్నాయి. ఆ రెండు గ్రహాలు పక్కపక్కకు రాబోతున్నాయి. ఎప్పుడూ లేనంత దగ్గరకు వస్తున్నాయి. జూన్ 17, 18న రెండు రోజుల పాటు సూర్యుడు వెళ్లిపోగానే సాయంత్రం ఆ రెండు కనిపిస్తాయి. ప్రపంచ పడమర ప్రాంతాల వాళ్లకు ఆ రెండు చాలా చాలా దగ్గరగా ఉన్నట్టు కనిపిస్తాయి. ఒకదానిపై ఒకటి ఉంటాయి. వాటి మధ్య కేవలం కొన్ని డిగ్రీల తేడా మాత్రమే ఉంటుంది. వాటిని పర్ఫెక్ట్గా చూడాలంటే పర్ఫెక్ట్ లొకేషన్ను చూసుకోవాలి. ఉత్తరాది వాళ్లకు అవి రెండు స్పష్టంగా కనిపిస్తాయి. 14వ తేదీ నుంచి 19 వరకు చంద్రుడు, గురుడు, శని ఒకే లైన్లోకి వస్తాయి. భూమి చుట్టూ చంద్రుడు తిరుగుతుంటాడు కాబట్టి వాటి ప్లేస్లు ప్రతి రాత్రి మారుతుంటాయి. ఈ తేడాలు చూడాలంటే మాత్రం ప్రత్యేకమైన ఏర్పాట్లు ఉండాలి. జూన్ 18న ఆ గురుడు, శని గ్రహాల మధ్య నుంచి చంద్రుడు జర్నీ చేస్తాడు. దాన్నే మూన్ టిల్టింగ్ అంటారు. అంటే కక్ష్య గతి తప్పడం. ఇంకా సింపుల్గా చెప్పాలంటే లైన్ దాటిపోవడం. ఈ టైంలో సూర్యుడి చుట్టూ తిరిగే భూకక్ష్యతో పోలిస్తే చందమామ కక్ష్య వంగినట్టు కనిపిస్తుంది.
