G20 సమ్మిట్ సందర్భంగా అధికారులు భద్రతా ఏర్పాట్లు, ఇతర పరిమితులను అమలు చేస్తున్నందున ఆన్‌లైన్ ఫుడ్ డెలివరీ సేవలు, ఇతర సేవలు న్యూఢిల్లీలో సెప్టెంబర్ 8 నుండి 10 వరకు అందుబాటులో ఉండవు. ఈ సమయంలో మందులు వంటి అవసరమైన సేవలకు మాత్రం మినహాయింపు ఇచ్చారు.
"తపాలా, వైద్య సేవలు, ల్యాబ్‌ల ద్వారా నమూనా సేకరణలు వంటి ముఖ్యమైన సేవలు ఢిల్లీ అంతటా అనుమతించబడతాయి" అని ప్రత్యేక పోలీసు కమిషనర్ (ట్రాఫిక్) ఎస్‌ఎస్ యాదవ్ తెలిపారు. "ఆన్‌లైన్ డెలివరీ సేవలు అనుమతించబడవు, కానీ మెడిసిన్ డెలివరీ అనుమతించబడుతుంది" అని స్పష్టం చేశారు. వీటిలో క్లౌడ్ కిచెన్‌లు లేదా రెస్టారెంట్‌ల ద్వారా డెలివరీలు, అమెజాన్ లేదా ఇతర ప్రదేశాల నుంచి వాణిజ్య డెలివరీలు ఉంటాయి.
ఇవి కాకుండా, ఇచ్చిన తేదీలలో న్యూఢిల్లీలో వాణిజ్య కార్యకలాపాలు సైతం అధికారులు నిషేధించారు. మెట్రో పరంగా, సుప్రీం కోర్ట్ స్టేషన్ మినహా, మరే ఇతర మెట్రో సర్వీస్ ప్రభావితం కాదు. “విఐపీ కదలికలు, భద్రతా పరిమితుల కారణంగా స్టేషన్లలో 10-15 నిమిషాల పాటు గేట్లను మూసివేయవచ్చు. కానీ ప్రగతి మైదాన్ (సుప్రీంకోర్టు) మినహా ఇతర స్టేషన్లలో మెట్రో సేవలు ప్రభావితం కావు” అని యాదవ్ చెప్పారు. హోటల్స్‌లో బస చేయాలనుకునే, ఢిల్లీకి చేరుకున్న వారికి, బుకింగ్ పత్రాలతో పాటు చెల్లుబాటు అయ్యే విమాన లేదా రైల్వే టిక్కెట్‌లతో పోలీసులు ప్రవేశాన్ని అనుమతిస్తారు. "ఆ సమయంలో భద్రతా పరిమితుల కారణంగా 10-15-నిమిషాలు ఆలస్యం కావచ్చు, కానీ వారు ప్రవేశానికి అనుమతించబడతారు" అన్నారాయన.
