ప్రతిపాదిత న్యూస్ మీడియా చట్టంపై కస్సుబుస్సులు
సిడ్నీ: ఆస్ట్రేలియా ప్రభుత్వం, గూగుల్ నువ్వెంతంటే నువ్వెంత అనేలా కయ్యానికి కాలు దువ్వుతున్నాయి. ఆ దేశ ప్రభుత్వం తీసుకురా వాలనుకుంటున్న న్యూస్ మీడియా చట్టంపై గూగుల్ గుర్రుగా ఉంటే.. సర్కార్ మాత్రం తాము చెప్పింది వినాల్సిందేనని తేల్చి చెబు తోంది. స్థానిక మీడియా సంస్థల వార్తలను పబ్లిష్ చేసే పెద్ద పెద్ద టెక్ కంపెనీలు.. ఆయా మీడియాలకు చెల్లింపులు చేసేందుకు ఆస్ట్రేలియా సర్కార్ ఈ కొత్త చట్టాన్ని తీసుకొస్తోంది. చట్టం ప్రకారం స్థానిక మీడియా సంస్థలు నేరుగా గూగుల్తో చెల్లింపులపై చర్చించుకోవచ్చు. ఒకవేళ డీల్ కుదరకపోతే ప్రభుత్వం మధ్యవర్తిగా ఉండి డీల్ కుదిరేలా చేస్తుంది.
సేవలు ఆపేస్తం: గూగుల్
ఆస్ట్రేలియా ప్రభుత్వం ఈ కొత్త చట్టాన్ని తీసుకొస్తే దేశంలో సేవలను ఆపేస్తామని గూగుల్ హెచ్చరించింది. ఇలాంటి మధ్యవర్తిత్వాల వల్ల గూగుల్కు ఇటు ఆర్థికంగా, అటు ఆపరేషన్స్ పరంగా ఇబ్బందులు వస్తాయని కంపెనీ ఆస్ట్రేలియా, న్యూజిలాండ్ మేనేజింగ్ డైరెక్టర్ మెల్ సిల్వ అన్నారు. ఈ చట్టం అమల్లోకి వస్తే సేవలు నిలిపేయడం తప్ప తమకు వేరే దారి లేదని తేల్చి చెప్పారు.
బెదిరింపులకు భయపడం: ఆస్ట్రేలియా ప్రధాని
గూగుల్ కామెంట్లపై ఆస్ట్రేలియా ప్రధాని స్కాట్ మోరిసన్ బదులిచ్చారు. బెదిరింపులకు భయపడబోమని తేల్చి చెప్పారు. ‘‘దేశంలో మీరేం చేయాలో నిర్ణయించాల్సింది మేం. మా ప్రభుత్వం, మా పార్లమెంట్ నిర్ణయాలు తీసుకుంటాయి. ఆస్ట్రేలియాలో ఉండాలనుకుంటే మా రూల్స్ ప్రకారం నడుచుకోవాల్సిందే. కానీ, బెదిరింపులకు దిగుతామంటే మాత్రం భయపడేది లేదు’’ అని తేల్చి చెప్పారు.
ఇవి కూడా చదవండి