ఈ ఊరు ఎడారిలో ఉంది. అయితేనేం అడవి, సముద్రం కూడా ఉన్నాయి. ఇంతకీ ఎక్కడ ఉంది? ఈ ఊరు అంటున్నారా.. పెరూలోని ‘ ఐకా’ సిటీ. ఒకే ఊళ్లో ఎడారి, అడవి, సముద్రం ఉండటంతో పాటు ద్రాక్ష పండ్ల తోటలకు కేరాఫ్ అడ్రస్ కూడా. పెరూలో యునిక్ విలేజ్గా, టూరిస్ట్ స్పాట్గా పేరున్న ‘ఐకా’ గురించి..
ఒకే దగ్గర ఎడారి, అడవి, సముద్రం... ఎలా ఉంటుంది ? అక్కడ ద్రాక్షపండ్ల తోటలు ఉండటం ఏంటి? అంటున్నారా... అదే ఆ ఊరు స్పెషాలిటీ. అక్కడ ఉన్న క్లైమేట్ కారణంగా ఈ ఊళ్లో డిఫరెంట్ సీన్స్ కనిపిస్తాయి. అందుకే 16వ శతాబ్దంలోనే ఈ ఊరిని డెవలప్ చేసి ఫైనాన్షియల్ సిటీగా మార్చారు. ఇక్కడ ఎడారి టూర్లు, బీచ్ వ్యూ, వ్యవసాయం ఎంతో ఫేమస్.
పెరూలో సముద్రానికి దగ్గరగా ఉండే ఊళ్లు చాలానే ఉన్నాయి. కానీ వాటన్నింటిలో ఐకా మాత్రం ప్రత్యేకం. అందుకే అది ఇంట్రెస్టింగ్ టూరిస్ట్ ప్లేస్గా పేరు తెచ్చుకుంది. ఏడాది పొడుగునా ఇక్కడికి టూరిస్ట్లు వస్తూనే ఉంటారు.
పెరూలో ఉన్న ఎన్నో గ్రామాలకంటే ముందే ఐకా ఉంది. 15 వ శతాబ్దంలో ఐకా, పక్కనే ఉండే ‘నాజ్కా వాలీ’ కలిసిపోయాయి. తర్వాత 1500ల్లో స్పెయిన్ దేశస్తులు ఐకాకు వచ్చారు. ‘జెరోనిమో లూయిస్ డి’ అనే వ్యక్తి ఐకాను డెవలప్ చేసి దాన్ని సిటీగా డిక్లేర్ చేశారు. ఇలా జూన్ 17, 1563న సిటీ ఏర్పాటైంది. ఆ కాలం నాటి ఆర్కిటెక్చర్, చెక్కు చెదరని భవనాలు ఐకాలో ఇప్పటికీ ఉన్నాయి. ప్రతి ఏటా జూన్ 17న ఐకా సిటీలో ఫెస్టివల్స్ జరుగుతాయి. వారం రోజుల పాటు జరిగే ఈ యానివర్సరీ ఎంత అందంగా ఉంటుందో మాటల్లో చెప్పలేం. ప్యారడైజ్ఫెస్టివల్, గాస్ట్రోనమిక్ ఫెయిర్స్, మినీ- మారథాన్ , లోకల్ కల్చరల్ ఈవెంట్స్ ... ఇలా ఎన్నో ఉంటాయి. జూన్ నెలలో పెరూ టూర్ వెళ్లిన టూరిస్ట్లు వీటిని మిస్కాకుండా చూస్తారు.
ఇసుకతిన్నెల్లో ఇండ్లు
ఎడారిలో ‘హువాకాచిన ఒయాసిస్’ చూస్తే ఆశ్చర్యం కలుగుతుంది. రోడ్డుకు 300 మీటర్ల దూరంలో ఉన్న భూభాగంలో కొన్ని ఇండ్లు ఉంటాయి. ఆ ఇండ్లని ‘హువాకాచిన ఒయాసిస్’ అంటారు. అక్కడికి వెళ్లిన ఎవరైనా దీన్ని చూడాల్సిందే. ఈ చిన్న ఒయాసిస్లో బగ్గీ సవారీలు, శాండ్ బోర్డింగ్ చేస్తారు టూరిస్ట్లు. విశాలమైన ఐకా ఎడారి కి వెళ్తే అద్భుతమైన ఎక్స్పీరియెన్స్లు ఎన్నో సొంతమవుతాయి. హువాకాచిన ఒయాసిస్కు శివారులో బాలెస్టాప్ దీవులు ఉంటాయి. బాలెస్టాప్ దీవుల్లో ఉండే వాళ్లు బిజినెస్ చేస్తారు. ఐకా ఎడారికి వచ్చే టూరిస్ట్లకు గైడ్గా ఉంటారు. ఎడారి, జీప్ సఫారీల ద్వారా డబ్బులు సంపాదిస్తారు.
ద్రాక్ష తోటలు, పత్తి ఉత్పత్తి
ఐకాలో ఎడారి ఎంత ఫేమస్సో.. వ్యవసాయం కూడా అంతే, ఏడాదంతా వాతావరణంలో హెచ్చుతగ్గులు లేకుండా ఉంటుంది. ఐకాను ఫైనాన్షియల్ సిటీ అని కూడా పిలుస్తారు. ఇక్కడ ప్రజలు లోకల్గా వైన్ ను తయారు చేస్తారు. దాని పేరు ‘పిస్కో’. ద్రాక్ష పండ్లను పులియపెట్టి తయారు చేసే ఈ వైన్కు పెరూ కల్చర్ వైన్గా పేరుంది. ఐకా నగరంలో వైన్ సెంటర్ల ముందు పిస్కో తయారు చేయడం చూడొచ్చు.
