అమెరికాలో దాదాపు 90 శాతం మంది గన్నులు ఎప్పుడూ తమతో అట్టిపెట్టుకుంటారని అంచనా. దీన్ని ఆ దేశ చట్టాలు సమర్థిస్తున్నాయి. అయితే, తుపాకీని జనాలు సెల్ఫ్ డిఫెన్స్కి బదులు సెల్ఫ్ రెస్పెక్ట్గా ఫీలవుతున్నారు. ఈ కల్చర్ వల్ల అగ్రరాజ్యానికి కొత్త చిక్కులు వస్తున్నాయి. జనం ప్రాణాల సంగతి ఎలా ఉన్నా ఎకానమీపైన నెగెటివ్ ఎఫెక్ట్ పడుతోంది. గన్ వయొలెన్స్ సంబంధిత ఇన్సిడెంట్ల కారణంగా యూఎస్ ఏటా సుమారు 23 వేల కోట్ల డాలర్లు నష్టపోతోంది.
అమెరికాలో ఎప్పుడు ఎవరికి కోపం వస్తుందో, ఎవరి చేతిలో గన్ పేలుతుందో, ఎంత మంది ప్రాణాలు గాలిలో కలిసిపోతాయో చెప్పలేం. ఇండియాలో ఒక గన్ కొనాలన్నా గన్ లైసెన్స్ తెచ్చుకోవాలన్నా చాలా తతంగం ఉంటుంది. కానీ, అమెరికాలో సెల్ఫ్ డిఫెన్స్కి ఎక్కువ ప్రాధాన్యత ఇస్తారు. దాంతో అక్కడ గన్నులు ఓపెన్ మార్కెట్లో దొరుకుతాయి. దీంతో కేవలం 200 డాలర్లు (సుమారు రూ.14 వేలు) చేతిలో ఉంటే, ఎవరైనా గన్ను కొనుక్కుని తమతో తిప్పుకోవచ్చు. అయితే, అమెరికన్లు ప్రతీకారాలు తీర్చుకోవటానికి, లేదా ఆత్మహత్యలకు గన్నులు వాడేస్తున్నారు. ఈ ఏడాదిలో ఇప్పటికే ఇలాంటి కాల్పుల ఇన్సిడెంట్లు 40,331 జరగ్గా, 10,681 మంది ప్రాణాలు గాల్లో కలిశాయి. అగ్ర రాజ్యంలో గన్ కల్చర్ ఈమధ్య హైరేంజ్లో మిస్ ఫైర్ అవుతోందని ఈ లెక్కలు చెప్పకనే చెబుతున్నాయి. ‘గన్ వయొలెన్స్ ఆర్కైవ్’ అనే నాన్ ఫ్రాఫిట్ ఆర్గనైజేషన్ చేసిన స్టడీలో ఈ చేదు నిజాలు బయటపడ్డాయి. ఈ దాడుల ప్రభావం ఆర్థిక వ్యవస్థపై పెద్దఎత్తున పడుతున్నట్లు మరో రిపోర్ట్లో తేలింది.
ఏటా 23 వేల కోట్ల డాలర్ల నష్టం
బందూకుల హింస కారణంగా యూఎస్ ఏటా సుమారు 23,000 కోట్ల డాలర్ల మేర నష్టపోతోంది. ఇది అమెరికా గ్రాస్ డొమెస్టిక్ ప్రొడక్ట్ (జీడీపీ)లో 1.4 శాతానికి సమానం. ‘గిఫర్డ్స్ లా సెంటర్ ఫర్ ప్రివెంట్ గన్ వయొలెన్స్’ అనే సంస్థతోపాటు ‘సెంటర్స్ ఫర్ డిసీజ్ కంట్రోల్’ ఇచ్చిన డేటాను బట్టి అనలిస్టులు ఈ విషయాలు చెప్పారు. గన్ వయొలెన్స్తో ఒక్కో రాష్ట్రం ఎంతగా ఎకానమీ లాసయ్యిందో స్పష్టం చేశారు. ఈ రిపోర్ట్ను అమెరికా కాంగ్రెస్లోని ప్రతిపక్ష డెమొక్రాట్లు పట్టిచూపుతున్నారు. గన్ వయొలెన్స్ వల్ల కోల్పోయిన రాబడి ఎకానమీ లాస్కి అద్దం పడుతోందని విమర్శిస్తున్నారు. కాల్పుల ఘటనలు అమెరికాలోని అన్ని ప్రాంతాల్లోనూ వెలుగు చూస్తున్నాయి. ఆఫీసులు, స్కూళ్లు, ఎగ్జిబిషన్లు.. ఇలా ప్రతి చోటా జరుగుతున్నాయి. ఆయా సంస్థలు, ప్రభుత్వాలు చనిపోయినవారి కుటుంబాలకు కంపెన్సేషన్ భారీగా చెల్లిస్తున్నాయి. దీనికోసం బడ్జెట్ పెంచాల్సి వస్తోంది. ఇది తలకు మించిన భారంగా మారుతోంది. పోలీస్ కేసుల బుకింగ్, ఇన్వెస్టిగేషన్ ఫాలోఅప్, క్రిమినల్ జస్టిస్, హెల్త్ కేర్ ట్రీట్మెంట్తదితర ఖర్చులు తడిసి మోపెడవుతున్నాయి.
దిద్దుబాటు చర్యలు ప్రారంభం
గన్ సేల్స్ కట్టడికి ‘బ్యాక్గ్రౌండ్ చెక్’లను సాధ్యమైనంత బలోపేతం చేయాలని అమెరికా సర్కారు రాష్ట్ర ప్రభుత్వాలకు సూచిస్తోంది. గన్ షోలతోపాటు అన్ని గన్ అడ్వర్టయిజ్మెంట్లను, కమర్షియల్ సేల్స్ని అదుపుచేయాలని కోరుతూ ఇటీవల ఓ మెమో జారీ చేసినట్లు వార్తలొచ్చాయి. తుపాకీ కొనటానికి వచ్చేవాళ్లకు క్రిమినల్ రికార్డు ఉన్నట్లుగా తనిఖీల్లో దొరికితే వెంటనే ఎన్ఫోర్స్మెంట్ అఫీషియల్స్కి అప్పగించాలని ట్రంప్ ప్రభుత్వం ఆదేశించింది. దేశానికి చెడ్డ పేరు తెస్తున్న ఈ కాల్పుల సంస్కృతికి ఫుల్ స్టాప్ పెట్టడానికి ఇంకా ఏమేం చర్యలు తీసుకోవాలనే విషయంలో అధికార, ప్రతిపక్షాల మధ్య ఏకాభిప్రాయం కుదరకపోవటంపై సోషల్ యాక్టివిస్టులు విచారం వ్యక్తం చేస్తున్నారు.
రూరల్ స్టేట్స్లో ఎక్కువ
మిస్సిసిపి, అలబామా సహా కొన్ని గ్రామీణ రాష్ట్రాలు ఈ గన్ కల్చర్వల్ల కోలుకోనంత దెబ్బ తింటున్నాయి. బాధితులకు చెల్లిస్తున్న నిధులు ఆయా రాష్ట్రాల ఎకానమీలో మేజర్ షేర్ను ఆక్రమిస్తున్నాయి. గన్ ఓనర్షిప్ రేట్ అధికంగా గల అలస్కా, ఆర్కన్సాస్ వంటి రాష్ట్రాల్లో గన్ సూసైడ్లూ ఎక్కువే. యూఎస్లోని మొత్తం 50 రాష్ట్రాల్లో ఓవరాల్గా ‘హయ్యస్ట్ గన్ డెత్ రేట్ పర్ కేపిటా’ నమోదైన రాష్ట్రంగా అలస్కాని రిపోర్ట్ గుర్తించింది.
ఇతర అభివృద్ధి చెందిన దేశాలతో పోల్చితే అమెరికాలో తుపాకీ కాల్పుల్లో గాయపడుతున్నవారిలో, చనిపోతున్నవారిలో పిల్లలు, యూత్ కూడా చాలా పెద్ద సంఖ్యలో ఉంటారు. గన్ వయొలెన్స్ అనేది ప్రపంచంలో అమెరికాలో తప్ప మరెక్కడా ఈ స్థాయిలో లేదని, బాధితులకు పరిహారం తదితర ఖర్చులు భరించలేని రీతిలో పెరిగిపోతున్నాయని న్యూయార్క్ డెమొక్రాట్ కరోలిన్ మెలోనీ అన్నారు. ఇదో తీరని విషాదమని, పరిష్కారం దొరకని సంక్షోభమని తీవ్ర ఆవేదన వ్యక్తం చేశారు.
