హైదరాబాద్,వెలుగు : ఎమ్మెల్యేగా హ్యాట్రిక్ కొట్టాలంటే రాజకీయాల్లో అంత సులువు కాదు. గ్రేటర్ హైదరాబాద్లో ఈసారి హ్యాట్రిక్ కొట్టిన ఎమ్మెల్యేల వివరాలు చూస్తే.. మంత్రి తలసాని శ్రీనివాస్ యాదవ్ 2014కు ముందు కూడా రెండుసార్లు ఎమ్మెల్యేగా పని చేశారు. తెలంగాణ వచ్చిన తర్వాత ఆయన 2014, 2018 ఎన్నికలతో పాటు తాజాగా మూడోసారి కూడా గెలుపొందారు.
2014లో సనత్ నగర్లో టీడీపీ నుంచి గెలుపొంది బీఆర్ఎస్లో చేరారు. అనంతరం 2018లో బీఆర్ఎస్అభ్యర్థిగా విజయం సాధించారు. తాజాగా మరోసారి 41,827 ఓట్ల మెజారిటీతో గెలిచారు. సికింద్రాబాద్ నుంచి పద్మారావు కూడా వరుస విజయాలను అందుకోగా.. 2014 , 2018లో బీఆర్ఎస్ నుంచి గెలిచారు. తాజాగా 45,625 ఓట్ల మెజారిటీతో గెలుపొందారు. 2014లో కుత్బుల్లాపూర్లో టీడీపీ నుంచి గెలిచిన వివేకానందగౌడ్ అనంతరం బీఆర్ఎస్లోకి వెళ్లారు. 2018 ఎన్నికల్లోనూ, తాజాగా 85,400 ఓట్ల మెజారిటీతో విజయం సాధించారు.
కూకట్పల్లి నుంచి మాధవరం కృష్ణారావు 2014లో టీడీపీ నుంచి గెలిచి బీఆర్ఎస్లో చేరారు. అనంతరం 2018లోనూ, తాజా ఎన్నికల్లోనూ ఆయన 70,387 ఓట్ల మెజార్టీతో గెలుపొందారు. శేరిలింగంపల్లి నుంచి అరికెపూడి గాంధీ కూడా 2014లో టీడీపీ నుంచి గెలిచి బీఆర్ఎస్లో చేరి 2018లో మళ్లీ గెలిచారు. తాజాగా మూడోసారి 45,600 ఓట్ల మెజార్టీతో గెలుపొందారు.
రాజేంద్రనగర్నుంచి 2009, 2014లో టీడీపీ నుంచి గెలిచిన ప్రకాశ్గౌడ్ బీఆర్ఎస్ లో చేరి 2018 ఎన్నికల్లోనూ, తాజాగా 31,083 ఓట్ల ఆధిక్యత సాధించారు. జూబ్లీహిల్స్ఎమ్మెల్యేగా 2014లో టీడీపీ నుంచి గెలిచిన మాగంటి గోపీనాథ్ ఆ తర్వాత బీఆర్ఎస్లో చేరి 2018లో విజయం సాధించారు. తాజాగా 6,175 ఓట్ల మెజార్టీతో గెలుపొందారు. బీజేపీ నుంచి 2014లోనూ, ఆ తర్వాత 2018 ఎన్నికల్లో గోషామహల్నుంచి రాజాసింగ్ విజయం సాధించగా.. తాజాగా మరోసారి 21,457 ఓట్ల మెజార్టీతో గెలిచి హ్యాట్రిక్ కొట్టారు.
కార్వాన్ ఎంఐంఎం కంచుకోట
మెహిదీపట్నం: కార్వాన్ సెగ్మెంట్ నుంచి ఎంఐఎం అభ్యర్థి కౌసర్ మొయినుద్దీన్ హ్యాట్రిక్ సాధించారు. కార్వాన్ ఎంఐఎం కంచుకోట అని మరోసారి నిరూపించారు. ఈ ఎన్నికల్లో బీజేపీ అభ్యర్థి అమర్ సింగ్పై 41 వేల 986 ఓట్ల మెజార్టీతో కౌసర్ గెలిచారు.
లష్కర్ చరిత్రలో హ్యాట్రిక్ కొట్టిన ఎమ్మెల్యే ఆయనే..
సికింద్రాబాద్: సికింద్రాబాద్ సెగ్మెంట్లో బీఆర్ఎస్ అభ్యర్థి తీగుళ్ల పద్మారావు గౌడ్ 45,625 ఓట్ల మెజార్టీతో గెలిచి హ్యాట్రిక్ సాధించారు. లష్కర్ చరిత్రలో మూడోసారి గెలిచి హ్యాట్రిక్ కొట్టిన మొదటి ఎమ్మెల్యేగా పద్మారావు గౌడ్ రికార్డ్ క్రియేట్ చేశారు. ఆయన విజయానికి కారణం మాస్లీడర్గా జనాల్లో ఉన్న అభిమానమని చెప్పొచ్చు. అన్ని వర్గాల్లో ఆదరణ, జనాలకు నిత్యం అందుబాటులో ఉండటం పద్మారావు గౌడ్ హ్యాట్రిక్ విజయానికి పునాది వేశాయి. దీంతో పాటు బలమైన ప్రత్యర్థి లేకపోవడం కూడా ఆయన గెలుపునకు మరో కారణమని పొలిటికల్ అనలిస్టులు అభిప్రాయపడుతున్నారు.
