ఏ రకం కూరగాయలు అయినా, ఆకుకూరలైనా.. ఆయా సీజన్లలోనే ఫ్రెష్గా దొరుకుతాయి. అందుకే వాటిని ఏడాదంతా నిల్వ చేయడానికి పచ్చళ్లు పెడుతుంటారు. అయితే పచ్చళ్లు నోటికి రుచిగానే ఉన్నా.. రోజూ తింటే ఆరోగ్యం పాడవుతుందని తెలిసిందే. కానీ, సౌత్ కొరియన్ ఫేమస్ కిమ్చీ పచ్చడి మాత్రం ఎంత తింటే అంత ఆరోగ్యం అంటున్నారు హెల్త్ ఎక్స్పర్ట్స్. చాలా స్టడీలు కూడా ఇదే మాట చెప్తున్నాయి.
- కిమ్చీలో విటమిన్ ఎ, కె, సిలతో పాటు పది రకాల మినరల్స్, 34 అమైనో యాసిడ్స్ ఉంటాయి. ఇవన్నీ ఎముకల్ని బలంగా చేస్తాయి. ఇందులోని ఫోలేట్, బీటా–కెరొటిన్, క్రోలిన్ మెదడుతో పాటు శరీరంలోని వివిధ భాగాలకి సిగ్నల్స్ పంపించే నాడీ వ్యవస్థని ఆరోగ్యంగా ఉంచుతాయి. మూడ్ స్వింగ్స్ని కంట్రోల్ చేస్తాయి.
- ఈ పచ్చడిలో ప్రో బయోటిక్స్ ఎక్కువ. పెరుగు మాదిరే గుడ్ బ్యాక్టీరియా ఎక్కువగా ఉంటుంది ఇందులో. దీనివల్ల జీర్ణం తేలిగ్గా అవుతుంది. మెటబాలిజం హెల్దీగా ఉంటుంది.
- ఇందులో ఉండే ప్రోబయోటిక్స్ కొలెస్ట్రాల్ని తగ్గిస్తాయి. ఇన్ఫ్లమేషన్ని దరిచేరనివ్వవు. వీటిల్లో ఉండే బీటా– కెరొటిన్, యాంటీ ఆక్సిడెంట్స్ గుండె పోటు, క్యాన్సర్, డయాబెటిస్తో పాటు ఇతర గుండె జబ్బుల నుంచి కాపాడతాయి. రక్తంలోని షుగర్ లెవల్స్ని అదుపులో ఉంచుతాయి.
- క్యాబేజీలోని యాంటీ ఆక్సిడెంట్స్, యాంటీ ఇన్ఫ్లమేటరీ ప్రాపర్టీలు ఇమ్యూనిటీ పెంచుతాయి. అంతేకాదు కొరియన్ల మెరిసే చర్మానికి ఈ పచ్చడి కూడా ఒక కారణం అని స్టడీల్లో తేలింది.
తయారీ..
- క్యాబేజీని నాలుగు భాగాలుగా తరగాలి. నీళ్లలో ఆరు నుంచి తొమ్మిది టేబుల్ స్పూన్లు ఉప్పు వేసి, కరిగించాలి. ఆ నీళ్లలో క్యాబేజీ ముక్కల్ని రెండు గంటలు ఉంచాలి. ఆ తరువాత క్యాబేజీని చల్లటి నీళ్లతో శుభ్రంగా కడిగి, ఆరబెట్టాలి.
- నచ్చిన కూరగాయలు అన్నింటినీ నీళ్లలో ఉడికించి.. ఆ నీళ్లని గిన్నెలోకి తీసి వెజిటబుల్ స్టాక్ తయారు చేయాలి.
- పాన్లో అర కప్పు వెజిటబుల్ స్టాక్, గ్లూటెనస్ బియ్యప్పిండి వేసి ఉడికించాలి. అందులో ఒక టేబుల్ స్పూన్ చక్కెర కూడా వేసి మరో మూడు నిమిషాలు ఉడికించి స్టవ్ ఆపాలి.
- ఆ మిశ్రమం పూర్తిగా చల్లారాక , మిక్సీ జార్లోకి తీయాలి. అందులో మిగిలిన వెజిటబుల్ స్టాక్, మూడు టేబుల్ స్పూన్ల ఉప్పు, ఒక టీ స్పూన్ చక్కెర, అల్లం, వెల్లుల్లి, ఉల్లిగడ్డ తరుగు వేసి మిక్సీ పట్టి పేస్ట్ చేయాలి. ఆ పేస్ట్లో ఘాటైన కారం వేసి బాగా కలపాలి.
- క్యాబేజీ, క్యారెట్ , ముల్లంగి ముక్కలు, ఉల్లి కాడలకి ఆ పేస్ట్ పట్టించి బాగా కలపాలి. ఆ మిశ్రమాన్ని గాలి చొరబడని డబ్బాలో పెట్టి, వారం పదిరోజుల తర్వాత తీస్తే కిమ్చీ రెడీ. దీన్ని మూడు నెలలు తినొచ్చు. మొదటిసారి ఈ పచ్చడి ట్రై చేసేవాళ్లు పెద్ద మొత్తంలో కాకుండా కొంచెం తయారుచేయాలి.
కిమ్చీకి కావాల్సినవి
చైనీస్ క్యాబేజీ- మూడు కేజీలు
గ్లూటెనస్ బియ్యప్పిండి- రెండు టేబుల్ స్పూన్లు
ఉప్పు, చక్కెర- సరిపడా
కూరగాయలు ఉడికించిన నీళ్లు- ఒక కప్పు
వెల్లుల్లి రెబ్బలు- తగినన్ని
అల్లం(పొట్టు తీసి)- ఒక టీ స్పూన్
ఉల్లిగడ్డ తరుగు- నాలుగు టీ స్పూన్లు
ఎండుమిర్చి పొడి- ఒక కప్పు
ముల్లంగి- ఒకటి, ఉల్లికాడ తరుగు- ఒక కప్పు
క్యారెట్ ముక్కలు- అర కప్పు
నోట్: గ్లూటెనస్ బియ్యప్పిండిని స్టిక్కీ రైస్ ఫ్లోర్ అని కూడా అంటారు. అన్ని సూపర్ మార్కెట్స్లో ఇది దొరుకుతుంది.
