దూసుకొస్తున్న దిత్వా.. తమిళనాడులో భారీ వర్షాలు.. విద్యా సంస్థలు బంద్.. తెలుగు రాష్ట్రాలకు హెచ్చరికలు !

శ్రీలంకలో భారీ విధ్వంసాన్ని సృష్టించిన దిత్వా తుఫాన్ తమిళనాడు, ఆంధ్రప్రదేశ్ తీరప్రాంతాలవైపు దూసుకొస్తోంది. గంటకు 8 కి.మీ. వేగంతో వస్తున్న దిత్వా.. ప్రస్తుతం పుదుచ్చేరికి 300 కిమీ., చెన్నైకి దక్షిణాన 400 కి.మీ. దూరంలో ఉంది. ఆదివారం (నవంబర్ 30) ఉదయం ఉత్తర తమిళనాడును తాకనున్నట్లు వాతావరణ కేంద్రం తెలిపింది.

తమిళనాడుకు రెడ్ అలర్ట్: 

శ్రీలంకలో దిత్వా ధాటికి 80 మంది చనిపోయారు. 20 మంది తప్పిపోయారు. రోడ్లు, బ్రిడ్జీలు, ఇండ్లూ నేలమట్టం అయ్యాయి. నవంబర్ 27వ తేదీన గంటకు 6 కిమీ వేగంతో కదిలిన దిత్వా.. ప్రస్తుతం వేగం పెంచి గంటకు 8 కి.మీ స్పీడ్ తో తమిళనాడు దిశగా కదులుతోంది. తమిళనాడు దక్షిణ ప్రాంతంలో భారీ వర్షాలు కురిసే చాన్స్ ఉందని వాతావరణ కేంద్రం రెడ్ అలర్ట్ జారీ చేసింది. దీంతో ఎమర్జెన్సీ టీమ్స్ ముందస్తు చర్యలు చేపట్టాయి. ప్రభావిత ప్రాంతాల ప్రజలను పునరావాస కేంద్రాలకు తరలించారు. ముఖ్యంగా కుడలూర్, విల్లుపరం,చెంగల్పట్టు, పుదుచ్చేరి ప్రాంతాలను వర్షాలు ముంచెత్తే అవకాశం ఉందని వాతావరణ కేంద్రం హెచ్చరించింది. దీంతో మొత్తం 12 వేల 7 వందల మందిని పునరావాస కేంద్రాలకు తరలించారు. విల్లుపరంలోని స్కూల్స్, కాలేజీలకు శనివారం (నవంబర్ 29) సెలవు ప్రకటించారు. దిత్వా ప్రభావంతో 54 విమానాలను రద్దు చేసినట్లు చెన్నై ఎయిర్ పోర్ట్ అధికారులు ప్రకటించారు. 

తెలుగు రాష్ట్రాలకు అలర్ట్:

దిత్వా సైక్లోన్ తమిళనాడును తాకనుండటంతో ఆ రాష్ట్రానికి రెడ్ అలర్ట్ ప్రకటించిన వాతావరణ కేంద్రం.. ఆంధ్రప్రదేశ్ లో కూడా తీర ప్రాంత జిల్లాల్లో భారీ వర్షాలు కురిసే చాన్స్ ఉన్నట్లు హెచ్చరించింది. బంగాళాఖాతం వాయువ్య దిశలో ప్రయాణిస్తున్న దిత్వా.. నవంబర్ 30న ఉత్తర తమిళనాడు, పుదుచ్చేరితో పాటు ఆంధ్రప్రదేశ్ తీరాన్ని తాకనున్నట్లు పేర్కొన్నారు. గాలులు 50 నుంచి 60 కీమీ వేగంతో వీస్తాయని.. అత్యధికంగా 70 కి.మీ వరకు ఉందవచ్చునని హెచ్చరించింది. దిత్వా ప్రభావంతో తెలంగాణలో పలు చోట్ల మోస్తరు వర్షాలు కరిసే చాన్స్ ఉన్నట్లు పేర్కొంది.

ఏపీలో ఈ జిల్లాలకు వర్ష సూచన:

దిత్వా కారణంగా ఏపీలోని నెల్లూరు, ప్రకాశం, తిరుపతి, చిత్తూరు, అన్నమయ్య, కడప జిల్లాల్లో భారీ వర్షాలు కురిసే చాన్స్ ఉన్నట్లు వాతావరణ కేంద్ర అధికారులు తెలిపారు. బాపట్ల, గుంటూరు, పల్నాడు ప్రాంతాల్లో అతి భారీ వర్షాలు కురిసే అవకాశం ఉన్నట్లు పేర్కొన్నారు. డిసెంబర్ 1 తేదీ వరకు నెల్లూరు ప్రకాశం జిల్లాల్లో వర్షాలు మొదలవుతాయని హెచ్చరించారు. లోతట్టు ప్రాంతాల ప్రజలు జాగ్రత్తగా ఉండాలని సూచించారు.