నిర్మల్,వెలుగు: నిర్మల్ జిల్లాలో బీజేపీ రాష్ట్ర అధ్యక్షుడు బండి సంజయ్ చేపట్టిన మహా సంగ్రామ పాద యాత్రకు భారీ స్పందన వస్తోంది. ఆదివారం జిల్లాలోని చిట్యాల గ్రామం నుంచి ప్రారంభమైన యాత్ర తలవేద ఎక్స్ రోడ్డు, వెంగవాపేట్, మంజులాపూర్ గ్రామాల మీదుగా నిర్మల్ పట్టణంలోని మంచిర్యాల చౌరస్తా వరకు సాగింది. తాను షెల్టర్ తీసుకున్న చిట్యాల గ్రామానికి వచ్చిన దాదాపు 20 మంది అభిమానుల పిల్లలతో బండి సంజయ్ మమేకమయ్యారు. వారితో దాదాపు అరగంటకుపైగా మాట్లాడారు. చదువుల్లో ఫస్ట్ రావాలని, రాష్ట్రంలో బీజేపీ ప్రభుత్వం రాగానే అందరికీ ఉద్యోగాలిస్తామని హామీ ఇచ్చారు. ప్రజా సమస్యలన్నీ పరిష్కరిస్తామన్నారు.
సైకిల్ కొనిచ్చిన సంజయ్...
రెండు రోజుల క్రితం నందన్ గ్రామంలో ఓ పేద విద్యార్థికి సైకిల్కొనిస్తానని మాటిచ్చిన బండి సంజయ్ ఆదివారం సదరు విద్యార్థికి సైకిల్ అందజేశారు. చదువుల్లో రాణించాలని సూచించారు. మార్గమధ్యంలో తల్వేద వద్ద బండి సంజయ్ ఆర్టీసీ బస్సు ఎక్కి ప్రయాణికులతో మాట్లాడారు. నిర్మల్కు చెందిన గీత కార్మికులు బండి సంజయ్ను కలిసి సమస్యలు వివరించారు. పాదయాత్రలో అభిమానులు, కార్యకర్తలు జై శ్రీరామ్, భారత్ మాతాకీ జై అంటూ నినాదాలు చేశారు. దీంతో రోడ్డంతా కాషాయ మయమైంది.
