పోలీసులు దొంగల్ని పరుగులు పెట్టించడం రొటీన్ సీనే.. కానీ, సిద్దిపేట జిల్లా హుస్నాబాద్ డివిజన్లో పోలీసులే ప్రజల్ని పరిగెత్తిస్తున్నారు. అది కూడా చెమటలుకక్కేలా. ఎందుకలా ? అంటున్నారా! తమ జిల్లాలోని ప్రజలు హెల్దీగా ఉండాలని.. యూత్ని చెడు వ్యసనాల నుంచి కాపాడాలని మారథాన్స్ నిర్వహిస్తున్నారు పోలీసులు. గడిచిన రెండు నెలల్లో దాదాపు 28 మారథాన్స్ కండెక్ట్ చేశారు. యువతను పోలీసు, సైనిక ఉద్యోగాల దిశగా అడుగులేయిస్తున్నారు కూడా.
సిద్దిపేట,వెలుగు: పోలీసు డ్యూటీ అంటే మాటలు కాదు. క్షణం తీరిక లేకుండా ఉరుకులు పరుగులుగా ఉంటుంది లైఫ్. అయినా సరే ఏమాత్రం అలసిపోకుండా డ్యూటీతో పాటు ప్రజల ఆరోగ్యం కోసం పాటుపడుతున్నారు హస్నాబాద్ డివిజన్ పోలీసులు. ఫ్రెండ్లీ పోలీసింగ్ కు అసలైన నిర్వచనం ఆచరణలో చూపుతూ ఆదర్శంగా నిలుస్తున్నారు. ప్రజల నుండి మంచి స్పందన వస్తుండడంతో రెగ్యులర్ గా ‘గో హెల్త్.. గుడ్ హెల్త్’ … స్లోగన్ తో 2కె, 3కె, 5కె, 10కె, 11కె, 21కె (ఆఫ్ మారథాన్) లాంటి పోటీలు పెడుతూ అందరికీ ఆదర్శంగా నిలుస్తున్నారు. ప్రజలు, యువత కూడా ఈ మారథాన్స్లో ఉత్సాహంగా పాల్గొంటున్నారు.
ఆలోచన మొదలైంది
‘హెల్త్ విషయంలో జాగ్రత్త సుమ’ అనేది చెప్పడానికి అక్కన్నపేట ఎస్ఐ కొత్తపల్లి రవి ఈ రన్నింగ్ ఈవెంట్స్ని స్టార్ట్ చేశారు. ఆయన గ్రామీణ ప్రాంతాల్లో పెట్రోలింగ్ కు వెళ్లినప్పుడు అక్కడ యువత, ప్రజలు ఖాళీగా కనిపించారట. దాంతో వాళ్లకి ఏదైనా పనిపై ఆసక్తి కలిగించాలి..ఆరోగ్య విషయంలో జాగ్రత్త పడేలా చేయాలని మారథాన్స్ స్టార్ట్ చేశాడు. మొదట మండల కేంద్రమైన అక్కన్నపేటలో కొంత మంది యువత, గ్రామ ప్రజలతో కలసి 2కె రన్ కండక్ట్ చేశారు. అవి సక్సెస్ అవడంతో 3కె, 5కె ,10కె మారథాన్స్ కండక్ట్ చేశారు. ఆ తర్వాత హుస్నాబాద్ డివిజన్ పరిధిలోని మిగిలిన మండలాల్లోనూ మారథాన్స్ స్టార్ట్ చేశారు. రీసెంట్గా హుస్నాబాద్లో రెండు వేల మందితో హాఫ్ మారథాన్(21 కిలోమీటర్ల) రన్నింగ్ ఈవెంట్ను కూడా కండక్ట్ చేశారు. విన్నర్స్కి మెడల్స్తో పాటు టీషర్ట్స్ని కూడా బహుమతిగా ఇచ్చారు.
యూత్ కోసమే..
అక్కన్నపేట మండలంలో ప్యాట్రోలింగ్కి వెళ్లినప్పుడు చాలామంది యూత్ ఖాళీగా కనిపించారు. వాళ్లు చెడుదారి పట్టకుండా ఆరోగ్యంగా ఉండాలని రన్నింగ్ ఈవెంట్స్ మొదలుపెట్టా. మారథాన్స్ గురించి యువతకి అవగాహన కల్పించి పాల్గొనేలా ప్రోత్సహించా. వాళ్లందరి సహకారంతో చిన్నగా ప్రారంభమైన మారథాన్స్ ఇప్పుడు డివిజన్లోని అన్ని గ్రామాల్లో జరుగుతున్నాయి. ప్రజలు, యువత ఆసక్తిని గమనించి త్వరలోనే 42 కిలో మీటర్ల ఫుల్ మారథాన్ నిర్వహించాలి అనుకుంటున్నాం.. -కొత్తపల్లి రవి, ఎస్ఐ, అక్కన్నపేట.
యూత్కు ఇది కొత్త బాట
రెగ్యులర్గా మారథాన్స్లో పార్టిసిపేట్ చేస్తున్నా. మారథాన్స్లో పాల్గొనడం వల్ల శారీరకంగానే కాదు మానసికంగా ఫిట్గా ఉంటున్నా. రన్నింగ్పై ఇంట్రెస్ట్ పెరిగింది. ముందుముందు కూడా మారథాన్స్లో పాల్గొంటా. అఖిల్, గోవర్థనగిరి
పోలీసు అన్నలకి థాంక్స్
పోలీస్ యూనిఫాం వేసుకోవాలనేది నా కల. ఆ కలని నిజం చేసుకోవాలంటే బాడీ ఫిట్గా ఉండాలి. అందుకే రెగ్యులర్గా మారథాన్స్లో పార్టిసిపేట్ చేస్తున్నా. ఇప్పటికే 2కే, 5కే ఈవెంట్స్ లో పాల్గొని విజయం సాధించా , హుస్నాబాద్లో జరిగిన 10కే రన్ లో పాల్గొని 12 వ స్థానంలో నిలిచా. ఈవెంట్స్ లో పాల్గొనడం వల్ల రన్నింగ్ పై ఇంట్రెస్ట్ పెరిగింది. ఇదంతా పోలీస్ అన్నల వల్లే సాధ్యమైంది అందుకే వాళ్లకి బిగ్ థాంక్యూ. -రాజేశ్, కొహెడ
ప్రజల ఆరోగ్యం కోసం..
ప్రజల ఆరోగ్యంతో పాటు యువతకు ఒకదారి చూపించేందుకే మారథాన్స్ నిర్వహిస్తున్నాం. ఇప్పటివరకు డివిజన్ పరిధిలో 28 ఈవెంట్స్ కండక్ట్చేశాం. రానున్న రోజుల్లో మరిన్ని గ్రామాలకి ఈ మారథాన్స్ని పరిచయం చేయాలనుకుంటున్నాం. రీసెంట్గా హుస్నాబాద్లో నిర్వహించిన హాఫ్ మారథాన్కి మంచి ఆదరణ వచ్చింది. ఇతర జిల్లాలనుంచి కూడా ఈ మారథాన్కి పెద్ద ఎత్తున జనాలొచ్చారు. జిల్లాలోని ఆడవాళ్లు కూడా ఈ మారథాన్లో యాక్టివ్గా పార్టిసిపేట్ చేస్తున్నారు. ఫ్యూచర్లోనూ మారథాన్స్ని కంటిన్యూ చేస్తాం. -సందెపోగు మహేందర్, ఏసీపీ హుస్నాబాద్.
ఇవి కూడా చదవండి
ఇంటర్నేషనల్ ఇన్వెస్ట్మెంట్స్కు మార్కెట్ అనుకూలం
రూ. 431 కోట్లు కట్టండి : బార్క్కు టైమ్స్ గ్రూప్ లీగల్ నోటీసు
టెస్లా రాకతో రూపురేఖలు మారిపోనున్న.. ఎలక్ట్రిక్ వాహనాల మార్కెట్