పాతబస్తీ మెట్రో రైలు ప్రాజెక్ట్ కోసం మెట్రో పిల్లర్ల పునాది వేయడానికి మట్టిని జియోటెక్నికల్ ఇన్వెస్టిగేషన్ చేసేందుకు హైదరాబాద్ మెట్రో రైల్ లిమిటెడ్ (HMRL) చర్యలు ప్రారంభించింది. పాతబస్తీలోని కారిడార్-IIలో MGBS, ఫలక్‌నుమా మధ్య దీర్ఘకాలంగా పెండింగ్‌లో ఉన్న 5.5 కిలోమీటర్ల మెట్రో రైలు ప్రాజెక్టును అమలు చేయాలని రాష్ట్ర ప్రభుత్వం నిర్ణయించడంతో, HMRL పనులను ప్రారంభించింది. ముఖ్యమంత్రి కేసీఆర్ ఆదేశాల మేరకు హెచ్‌ఎంఆర్‌ఎల్ 54 చోట్ల బోర్‌హోల్ డ్రిల్లింగ్ ద్వారా విచారణ చేపట్టేందుకు ప్రైవేట్ ఏజెన్సీలను నియమించినట్లు సమాచారం.
ఈ ప్రక్రియకు మూడు నెలల సమయం పడుతుందని అధికారలు అంచనా వేస్తున్నారు. ఈ మట్టి జియోటెక్నికల్ పరిశోధన కోసం రూ. 25 నుంచి రూ. 26 లక్షలు ఖర్చవుతుందని అంటున్నారు. దారుల్‌షిఫా, పురానీ హవేలీ, ఎట్టేబార్ చౌక్, అలీజాకోట్ల, మీర్ మోమిన్ దైరా, హరిబౌలి, శాలిబండ, షంషీర్‌గంజ్, అలియాబాద్ వంటి ముఖ్యమైన జంక్షన్‌ల గుండా ఈ మెట్రో సాగుతుంది.
ప్రతిపాదిత మెట్రో లైన్‌లో సాలార్‌జంగ్ మ్యూజియం, చార్మినార్, శాలిబండ, షమ్‌షీర్‌గంజ్, ఫలక్‌నుమా అనే ఐదు స్టేషన్లు ఉంటాయి. సాలార్‌జంగ్ మ్యూజియం, చార్మినార్ నుంచి సుమారు 500 మీటర్ల దూరంలో ఉన్నప్పటికీ, ఈ స్టేషన్‌లకు నగరంలో వాటి ప్రాముఖ్యతను తెలియజేసేందుకు వాటి పేర్లను పెట్టారు. అదనంగా, మతపరమైన నిర్మాణాలను రక్షించడానికి రోడ్ల విస్తరణ 80 అడుగులకు పరిమితం చేశారు. 1000 కంటే ఎక్కువ సంఖ్యలో ప్రభావితమైన ఆస్తుల కోసం వ్యక్తిగత స్కెచ్‌లను రూపొందించే ప్రక్రియ ఇప్పటికే ప్రారంభమైంది.
