మార్స్ గ్రహంపై గుంతలకు కేరళ పేర్లు..ఐఐఎస్టీ ప్రతిపాదనలకు ఐఏయూ ఆమోదం

    పురాతన క్రేటర్‌‌కు జీఎస్ఐ తొలి డైరెక్టర్‌‌ కృష్ణన్ పేరు

న్యూఢిల్లీ: ఇంటర్నేషనల్‌‌ ఆస్ట్రోనామికల్‌‌ యూనియన్‌‌ (ఐఏయూ) కీలక నిర్ణయం తీసుకుంది. మార్స్ (అంగారక గ్రహం) మీదున్న ఏడు క్రేటర్‌‌(గ్రహశకలం ఢీకొని ఏర్పడిన పెద్ద గిన్నె ఆకారంలో ఉండే గుంత)లకు కేరళలోని పలు పట్టణాల పేర్లతోపాటు రీసెర్చర్ల పేరు పెట్టేందుకు ఆమోదం తెలిపింది. 

వీటిలో 3.5 బిలియన్ సంవత్సరాల పురాతన క్రేటర్‌‌(గ్రహంలోని క్శాంతే టెర్రా ప్రాంతం)కు స్వాతంత్ర్యం వచ్చిన తర్వాత  భారత జియోలాజికల్ సర్వే ఆఫ్ ఇండియా (జీఎస్ఐ) తొలి డైరెక్టర్‌‌గా పనిచేసిన ఎం.ఎస్. కృష్ణన్(తమిళనాడు) పేరును పెట్టనున్నారు. 

మిగతా వాటికి కేరళకే చెందిన వలియమల, వర్కల, ఇస్రో పుట్టిన తుంబా, బేకల్, కృష్ణన్ పాలస్, పెరియార్ వల్లీస్ పేర్లను నిర్ణయించారు. ఈ పేర్లను తిరువనంతపురంలోని ఇండియన్ ఇన్‌‌స్టిట్యూట్ ఆఫ్ స్పేస్ సైన్స్ అండ్ టెక్నాలజీ (ఐఐఎస్టీ) పరిశోధకులు ప్రతిపాదించగా..ఐఏయూ ఈ నెల 24న ఆమోదించింది. 

ఇక నుంచి మార్స్ మ్యాప్‌‌లకు సంబంధించిన శాస్త్రీయ ప్రచురణల్లో కేరళ పేర్లు కనిపించనున్నాయి. ఇది కేరళకు, భారత అంతరిక్ష రంగానికి గొప్ప గౌరవమని సైంటిస్టులు సంతోషం వ్యక్తం చేస్తున్నారు. కాగా.. మార్స్ గ్రహంపై మెరుపులు (లైట్నింగ్) సృష్టించే ‘కిర్రుమనే’ శబ్దాలను నాసాకు చెందిన పర్సివియరెన్స్ రోవర్ మైక్రోఫోన్ రికార్డు చేసింది. 

అద్భుత పరిశోధన వివరాలను ఫ్రాన్స్ నేతృత్వంలోని శాస్త్రవేత్తల బృందం బుధవారం ప్రకటించింది.50 ఏండ్లుగా మార్స్‌‌లో మెరుపుల కోసం వెతుకుతున్నామని..ఇప్పుడు ఆ పజిల్ మిస్సింగ్ పీస్ దొరికిందని పరిశోధనా హెడ్ బాప్టిస్ట్ చైడ్ (ఫ్రాన్స్) తెలిపారు. ధూళి తుఫానులు, చిన్న సుడిగాలుల ప్రభావంతో సెం.మీ పరిమాణంలో ఏర్పడే విద్యుత్ ఆర్క్‌‌ల వల్లే శబ్దాలు ఏర్పడుతున్నాయని వివరించారు. ఈ చిన్న మెరుపులే మార్స్ వాతావరణంలో రసాయన మార్పులకు కారణమవుతాయన్నారు.