కరోనా థర్డ్వేవ్ ఉందనే వార్తలు వినిపిస్తున్నాయి. చాలా కంపెనీలు మళ్లీ ‘వర్క్ ఫ్రమ్ హోమ్’ పెంచేశాయి. మళ్లీ ఇంటి నుంచి పని చేయమంటున్నాయి. అయితే, ఆఫీసులో ఉన్నంత సౌకర్యం ఇంట్లోఉండదు. ‘వర్క్ ఫ్రమ్ హోమ్’లో సోఫా, బెడ్, కుషన్స్ మీద కూర్చొని కంప్యూటర్, ల్యాప్టాప్ ముంగట వేసుకునే వాళ్లే ఎక్కువ. సరిగా కూర్చోక పోవడంతో స్పాండిలైటిస్ (ఇన్ఫ్లమేటరీ కండిషన్) కూడా వచ్చే అవకాశం ఉంది అంటున్నారు ఆర్థోపెడిక్ సర్జన్ డాక్టర్ మనోజ్ కుమార్.
వర్క్ ఫ్రమ్ హోమ్లో బ్రేక్ తీసుకునేవాళ్లు చాలా తక్కువ. ఒకేచోట కూర్చొని ఎక్కువ టైం పనిచేస్తారు. సిస్టం పొజిషన్ ఆఫీసులో ఉన్నట్టుగా ఇంట్లో ఉండదు. దాంతో చాలామంది ల్యాప్టాప్ చేతిలో పట్టుకొని వర్క్ చేస్తారు. కొందరైతే సోఫాలో, బెడ్ మీద పడుకొని పని చేస్తుంటారు.
బాడీ పోశ్చర్తో సమస్యలు
బాడీ పోశ్చర్ సరిగా లేకపోవడం వల్ల రెండు మూడు రోజుల్లోనే బ్యాక్పెయిన్, నెక్పెయిన్ మొదలవుతుంది. మెడ నరాలు తల బరువుని మోయలేక బిగుతుగా అవుతున్నాయి. దీంతో, మెడలోని డిస్క్లో ప్రాబ్లమ్స్ వస్తాయి. చేతులు తిమ్మిర్లు పట్టడం, చెయ్యంతా లాగడం వంటి లక్షణాలు కనిపిస్తాయి. ల్యాప్టాప్, కంప్యూటర్ స్క్రీన్ తక్కువ ఎత్తులో ఉన్నప్పుడు15–20 డిగ్రీస్ల మేర మెడను కిందికి దించాల్సి వస్తుంది. దాంతో తల బరువు మెడ మీద 30–40 % ఎక్కువ పడుతుంది. మెడ, వెన్నెముక ఎముకలు ఒకే వరుసలో ఉండడం వల్ల ఎక్కువగా అరుగుతున్నాయి. కొందరు పెయిన్కిల్లర్స్ వాడుతూ వర్క్ కంటిన్యూ చేస్తారు. కానీ, వారం రోజుల తర్వాత మెడనొప్పి ఎక్కువవుతుంది. అప్పుడు పెయిన్ కిల్లర్స్ వాడినా రిలీఫ్ ఉండదు.
విటమిన్–డి లోపం
ఇంతకు ముందు ఆఫీస్కు, వేరే పనికి బయటికి వెళ్లేవాళ్లు. దాంతో, విటమిన్–డి బాగా అందేది. కానీ, ఇప్పుడు ఇంట్లోనే ఉండడం వల్ల విటమిన్–డి అందక బోన్ డెన్సిటీ తగ్గిపోతోంది. దీంతో ఆస్టియోపొరోసిస్, ఆస్టియోపీనియా వంటి సమస్యలు రావొచ్చు. స్పాండిలైటిస్ అనేది మొదటి దశ. ఈ సమస్య ఎక్కువైతే స్పాండిలోసిస్ వచ్చే ఛాన్స్ ఉంటుంది.
ఈ సమస్య రాకుండా
ఎత్తు మార్చుకోవడానికి వీలుగా ఉన్న కంఫర్టబుల్ కుర్చీ ఉపయోగించాలి. కాళ్లు నేలకి తాకేలా కూర్చోవాలి. బ్యాక్రెస్ట్గా కుర్చీలో పిల్లో లేదా టవల్ పెట్టుకుంటే మరీ బెటర్. అలాగే, కంప్యూటర్, ల్యాప్టాప్ స్క్రీన్ కళ్లకి సమానంగా ఉండాలి. ఇలా చేస్తే ఎక్కువ టైం ఇబ్బంది లేకుండా వర్క్ చేసుకోవచ్చు. మెడ మీద స్ట్రెస్ పడదు. బాడీ పోశ్చర్ సరిగా ఉండేందుకు నిటారుగా కూర్చోవాలి. ప్రతి 45 నిమిషాలకి బ్రేక్ తీసుకోవడం తప్పనిసరి. కాసేపు నడవాలి. చేతులు, కాళ్లు రిలాక్స్ అవ్వడం కోసం స్ట్రెచింగ్ ఎక్సర్సైజ్లు చేయాలి. మెడని గట్టిపరిచే వ్యాయామాలు చేయాలి. ఈ జాగ్రత్తలతో స్పాండిలైటిస్ని అడ్డుకోవచ్చు. దాంతో స్పాండిలోసిస్, డిస్క్ ప్రాబ్లమ్స్ స్టేజ్కి వెళ్లకుండా చూసుకోవచ్చు.
కంప్యూటర్ ముందు ఎక్కువ సమయం కూర్చున్నా కూడా ఇబ్బందిగా అనిపించొద్దు అంటే వారానికి కనీసం రెండున్నర గంటలు వ్యాయామం చేయాలి. వాకింగ్‌, ఏరోబిక్స్, జుంబా, సైక్లింగ్, స్విమ్మింగ్, స్కిప్పింగ్, నడవడం వంటివి చేస్తే మంచిది. నొప్పి, స్పర్శ కోల్పోవడం, కండరాలు వీక్ అవ్వడం వంటి లక్షణాలు తరచూ కనిపిస్తుంటే వెంటనే డాక్టర్ని కలవాలి. నొప్పి మరింత తీవ్రంగా ఉంటే రెస్ట్ తీసుకోవాలి. పోశ్చర్ సరి చేసుకునేందుకు పనికొచ్చే ఎక్సర్సైజ్లు చేయాలి.
కార్పల్ టన్నెల్ సిండ్రోమ్
ఆఫీసులో మోచేతిని 90 డిగ్రీల కోణంలో పెట్టి మౌస్ యూజ్ చేసేవాళ్లు. కానీ ఇంటివద్ద మౌస్ని అలా యూజ్ చేయకపోవడం వల్ల చాలామందికి ‘కార్పల్ టన్నెల్ సిండ్రోమ్’ వస్తోంది. ఈ సిండ్రోమ్ ఉన్నవాళ్లలో అరచేతిలోని ఒక నరానికి రక్తసరఫరా ఆగిపోయి చేయి తిమ్మిరి వస్తుంది.
