- అన్ని వేరియంట్ల నుంచి రక్షణ: ఐసీఎంఆర్ స్టడీ
- రీ ఇన్ఫెక్షన్ ముప్పు తక్కువే
- దేశంలో మరో 2,85,914 మందికి కరోనా
న్యూఢిల్లీ: సెకండ్వేవ్లో ప్రపంచాన్ని గడగడలాడించిన కరోనా ‘డెల్టా’ను కొత్తగా వచ్చిన ఒమిక్రాన్ చావుదెబ్బ కొట్టేస్తోంది. ఒమిక్రాన్ ఇన్ఫెక్షన్ వల్ల వచ్చే ఇమ్యూనిటీ.. డెల్టా వేరియంట్ను అణచేస్తోందని ఇండియన్ కౌన్సిల్ ఫర్ మెడికల్ రీసెర్చ్(ఐసీఎంఆర్) చేసిన స్టడీలో వెల్లడైంది. డెల్టాతో పాటు ఒమిక్రాన్, ఇతర వేరియంట్లనూ ఆ ఇమ్యూనిటీ అడ్డుకుంటోందని తేలింది. ఒమిక్రాన్ వచ్చిపోయినోళ్లకు డెల్టాతో పాటు ఇతర వేరియంట్లు మళ్లీ సోకే ముప్పు చాలా తక్కువని స్టడీ నిర్ధారించింది. ఇకపై ఒమిక్రాన్ స్పెసిఫిక్ వ్యాక్సిన్ స్ట్రాటజీని అమలు చేయాల్సిన అవసరం ఉందని సూచించింది. ఇటీవల కొంతమంది ఒమిక్రాన్ పేషెంట్లపై ఐసీఎంఆర్ ఈ స్టడీ చేసింది. వాళ్లలో ఐజీజీ యాంటీ బాడీలు, న్యూట్రలైజింగ్ యాంటీబాడీల పనితీరును ఐసీఎంఆర్ సైంటిస్టులు పరిశీలించారు. అయితే, ఈ స్టడీకి సంబంధించి లిమిటేషన్స్ కూడా ఉన్నాయని సైంటిస్టులు చెప్తున్నారు.
యాక్టివ్ కేసులు తగ్గినయ్
దేశంలో కరోనా కేసులు 4 కోట్ల మార్కును దాటేశా యి. మంగళవారం మరో 2,85,914 మంది కరోనా బారిన పడగా.. మొత్తం కేసుల సంఖ్య 4 కోట్ల 85 వేల 116కు చేరింది. మరో 665 మంది కరోనాకు బలైపోగా మొత్తం మరణాలు 4,91,127కు పెరిగాయి. యాక్టివ్ కేసులు 13,824 తగ్గడంతో.. ఇప్పుడు దేశంలో 22,23,018 కరోనా పేషెంట్లున్నారు.
ఇండియాకు సపోర్ట్.. యూఎన్
ప్రపంచంలోనే అతిపెద్ద వ్యాక్సినేషన్ డ్రైవ్ను చేపట్టిన ఇండియాకు అన్ని విధాలా సాయం చేస్తున్నామని ఐక్యరాజ్యసమితి(యూఎన్) వెల్లడించింది. ఇప్పటికే ఇండియాలో 60 కోట్ల మందికి తమ ప్రతిని ధులు కరోనా నివారణ మెసేజ్లను ఇచ్చారని యూఎన్ సెక్రటరీ జనరల్ అధికార ప్రతినిధి స్టెఫానీ డుజారిక్ చెప్పారు. షోంబీ షార్బ్ నేతృత్వంలోని టీం.. ఇండియాలో కరోనా కేసుల నివారణ కోసం అధికారులకు సహకరిస్తున్నారని చెప్పారు.
