లండన్ : ఛేజింగ్లో ఇంగ్లండ్ కెప్టెన్ బెన్ స్టోక్స్ (214 బాల్స్లో 9 ఫోర్లు, 9 సిక్సర్లతో 155) అద్భుత సెంచరీతో పోరాడినా.. లార్డ్స్ టెస్ట్లో ఆస్ట్రేలియానే విజయం సాధించింది. యాషెస్ సిరీస్లో భాగంగా ఆదివారం ముగిసిన రెండో టెస్టులో ఆసీస్ 43 రన్స్ తేడాతో ఇంగ్లండ్ను ఓడించింది. దీంతో ఐదు మ్యాచ్ల సిరీస్లో 2–0 ఆధిక్యంలోకి వచ్చింది. 371 రన్స్ టార్గెట్ ఛేజింగ్లో 114/4 ఓవర్నైట్ స్కోరుతో ఆఖరి రోజు ఆట కొనసాగించిన ఇంగ్లండ్ రెండో ఇన్నింగ్స్లో 81.3 ఓవర్లలో 327 రన్స్కు ఆలౌటైంది. బెన్ డకెట్ (83), స్టోక్స్ ఐదో వికెట్కు 132 రన్స్ జోడించి హోమ్టీమ్ను రేసులోకి తెచ్చారు.
కానీ బెయిర్స్టో (10) వివాదాస్పదంగా ఔట్ కావడం ఇంగ్లిష్ టీమ్ను దెబ్బతీసింది. అయినా పోరాటం ఆపని స్టోక్స్ భారీ సిక్సర్లు కొడుతూ బ్రాడ్ (11)తో ఏడో వికెట్కు 108 రన్స్ జోడించి ఆస్ట్రేలియాను వణికించాడు. కానీ, హేజిల్వుడ్ బౌలింగ్లో మరో షాట్కు ట్రై చేసి కీపర్కు క్యాచ్ ఇవ్వడంతో ఇంగ్లండ్ ఆశలు వదిలేసుకుంది. జోష్ టంగ్ (19), రాబిన్సన్ (1) నిరాశపర్చారు. స్టార్క్, కమిన్స్, హేజిల్వుడ్ తలా మూడు వికెట్లు తీశారు. స్మిత్కు ‘ప్లేయర్ ఆఫ్ ద మ్యాచ్’ అవార్డు లభించింది.6 నుంచి లీడ్స్లో మూడో టెస్టు జరుగుతుంది.
బెయిర్స్టో ఔట్పై రగడ
ఈ మ్యాచ్లో బెయిర్స్టో స్టంపౌట్ వివాదాస్పదమైంది. ఆసీస్ పేసర్ గ్రీన్ వేసిన లో బౌన్సర్ను వదిలేసిన బెయిర్స్టో.. అవతలి వైపు ఉన్న స్టోక్స్తో మాట్లాడేందుకు క్రీజును వదిలాడు. అదే టైమ్లో బాల్ అందుకున్న కీపర్ క్యారీ నేరుగా వికెట్ల పైకి విసిరాడు. రీప్లే చూసిన తర్వాత థర్డ్ అంపైర్ బెయిర్స్టోన్ను స్టంపౌట్గా ప్రకటించడంతో కాసేపు గందరగోళం నెలకొంది. దీనిపై స్టేడియంలోని ఇంగ్లండ్ ఫ్యాన్స్ తీవ్ర అభ్యంతరం వ్యక్తం చేశారు. ‘అదే ఆస్ట్రేలియా.. అదే చీటింగ్’ అంటూ ఫ్యాన్స్ నినాదాలు చేశారు.