ఏ దేశమేగినా.. ఎందుకాలిడినా.. అని అప్పట్లో రాయపోలు సుబ్బారావు దేశం గొప్పతనం గురించి రాశారు. నిజమే మరి, ఇప్పుడు ప్రపంచంలోని ఏ దేశం పోయినా, మనోళ్ల హవా అంతా..ఇంతా కాదు. బ్రిటన్లో మనోళ్లు పెట్టిన కంపెనీలన్నీ కలిపి ఎంత సంపాదిస్తున్నాయో తెలుసా..? అక్షరాలా రూ.3.42 లక్షల కోట్లు. 3,684 కోట్ల పౌండ్లు. 1.74 లక్షల మందికిపైగా ఉపాధి కల్పిస్తున్నారు. ఏటా రూ.9,285 కోట్ల (వంద కోట్ల పౌండ్లు) కార్పొరేట్ ట్యాక్స్ కడుతున్నారు. బ్రిటన్లో మనోళ్ల హవా గురించి తొలిసారి ‘ద ఇండియా ఇన్ ద యూకే: ద డయాస్పోరా ఎఫెక్ట్’ పేరిట మంగళవారం ఓ రిపోర్ట్ విడుదలైంది. లండన్లోని ఇండియన్ హైకమిషన్, ఫెడరేషన్ ఆఫ్ ఇండియన్ చాంబర్స్ ఆఫ్ కామర్స్ అండ్ ఇండస్ట్రీ (ఫిక్కీ యూకే)తో కలిసి గ్రాంట్ థోర్న్టన్ యూకే అనే సంస్థ స్టడీ చేసి ఈ రిపోర్టును విడుదల చేసింది. బ్రిటన్లోని కనీసం లక్ష పౌండ్లు (సుమారు రూ.కోటి) టర్నోవర్ ఉన్న 654 మంది ఇండియన్ల కంపెనీలపై స్టడీ చేసింది. ఆయా కంపెనీలన్నీ కలిసి సుమారు రూ.18,500 కోట్లు (200 కోట్ల పౌండ్లు) పెట్టుబడి పెట్టాయని పేర్కొంది. నిజానికి బ్రిటన్లో ఇండియన్ కంపెనీలు 65 వేలకు పైనే ఉన్నా.. కేవలం ఆ 654 కంపెనీలనే స్టడీకి ఎంచుకుంది థోర్న్టన్ సంస్థ.
పెద్ద కంపెనీలవే
ఈ రిపోర్టులో అన్ని కంపెనీలనూ చేర్చలేదని, కేవలం పెద్ద టర్నోవర్ ఉన్న కంపెనీలను మాత్రమే స్టడీ కోసం తీసుకున్నామని బ్రిటన్లో ఇండియన్ హైకమిషనర్ రుచి ఘనశ్యామ్ చెప్పారు. గత ఏడాది మార్చి నుంచి ఈ స్టడీ చేశారన్నారు. బ్రిటన్లో ఇండియన్లకు చెందిన చిన్న కంపెనీలూ తమ వంతు సహకారం అందిస్తున్నాయని, భవిష్యత్తులో ఆ కంపెనీల వివరాలతోనూ రిపోర్ట్ ఇస్తామని అన్నారు. బ్రిటన్లో వేగంగా అభివృద్ధి చెందుతున్న కంపెనీలను గుర్తించి, ఆ దేశం అభివృద్ధిలో ఆయా కంపెనీల భాగస్వామ్యాన్ని తెలుసుకునేందుకు ఈ రిపోర్టు ఉపయోగపడుతుందని చెబుతున్నారు. 35 శాతం కంపెనీల్లో ఒకరు లేదా అంతకన్నా ఎక్కువ మహిళా డైరెక్టర్లున్నారని రిపోర్ట్ వెల్లడించింది. 80 శాతం (లక్షా 40 వేలు) ఉద్యోగాలను 23 వ్యాపారాలే సృష్టిస్తున్నాయని తేల్చింది. బీఅండ్ఎం రిటెయిల్ లిమిటెడ్లో ఎక్కువగా 26,496 మంది పనిచేస్తున్నట్టు చెప్పింది. వేదాంత రీసోర్సెస్ లిమిటెడ్ (25,083), బోపారాన్ హోల్డ్కో లిమిటెడ్ (21,949), హిందూజా ఆటోమోటివ్ (19,601), హెచ్సీ వన్ లిమిటెడ్ (10,949) కంపెనీలు ఎక్కువ ఉద్యోగాలు ఇస్తున్న కంపెనీల జాబితాలో టాప్5లో ఉన్నట్టు చెప్పింది. ఎక్కువగా హాస్పిటాలిటీలో 19% కంపెనీలున్నట్టు రిపోర్ట్ పేర్కొంది. ఆ తర్వాత హెల్త్కేర్లో 15%, రిటెయిల్ అండ్ హోల్ సేల్ 13%, రియల్ ఎస్టేట్ 13%, ఫుడ్ అండ్ బెవరేజెస్లో 9% కంపెనీలున్నట్టు పేర్కొంది. 52% కంపెనీలు ఒక్క లండన్లోనే ఉన్నాయట.
మొత్తం ఇండియన్ల వాటా 7.87 లక్షల కోట్లు
బ్రిటన్ ఎకానమీకి మొత్తం ఇండియన్ల కాంట్రిబ్యూషన్ సుమారు రూ.7.87 లక్షల కోట్లు (8,500 కోట్ల పౌండ్లు) అని రిపోర్ట్ అంచనా వేసింది. సుమారు రూ.15,737 కోట్లు (170 కోట్ల పౌండ్లు) కార్పొరేట్ ట్యాక్స్ కడుతున్నారని చెప్పింది. మొత్తంగా 2.8 లక్షల మందికి ఉపాధి కల్పిస్తున్నారంది. ఇప్పటిదాకా బ్రిటన్ ఎకానమీలో ఇండియన్ కంపెనీల వాటాపై చేసిన మొదటి స్టడీ ఇదేనని చెబుతున్నారు.
