న్యూఢిల్లీ : ఆహార వస్తువులు/పదార్థాల ధరల తగ్గుదల కారణంగా టోకు ధరల ఆధారిత ఇన్ఫ్లేషన్ (డబ్ల్యూపీఐ) ఈ ఏడాది జులైలో ఐదు నెలల కనిష్టం 13.93 శాతానికి పడిపోయింది. డబ్ల్యూపీఐ ఆధారిత ఇన్ఫ్లేషన్ వరుసగా రెండవ నెలలోనూ నెమ్మదించింది. టోకు ధరలు మరింత తగ్గుముఖం పడతాయనే ఆశలను పెంచింది. టోకు ధరల సూచీ ఆధారిత ఇన్ఫ్లేషన్ మేలో రికార్డు స్థాయిలో 15.88 శాతానికి చేరుకున్న తర్వాత, జూన్‌‌‌‌‌‌‌‌లో 15.18 శాతానికి తగ్గింది. ఫిబ్రవరిలో ఇది 13.43 శాతంగా ఉంది. పోయిన ఏడాది జులైలో ఇది 11.57 శాతంగా ఉంది.
డబ్ల్యూపీఐ ఇన్ఫ్లేషన్ జులైలో తగ్గినా, 2021 ఏప్రిల్‌ నుంచి ఇప్పటికీ రెండంకెల స్థాయిలోనే కొనసాగుతోంది. ఆహార వస్తువుల ఇన్ఫ్లేషన్ జూన్‌‌‌‌‌‌‌‌లో 14.39 శాతం నుంచి జులైలో 10.77 శాతానికి తగ్గింది. కూరగాయల ధరల పెరుగుదల రేటు పోయిన నెలలో 56.75 శాతం నుంచి జులైలో 18.25 శాతానికి పడింది. ఇంధనం, పవర్ ఇన్ఫ్లేషన్ జులైలో 43.75 శాతం ఉంది. పోయిన నెలలో 40.38 శాతంగా ఉంది. మానుఫ్యాక్చర్డ్ ప్రొడక్టులు, నూనె గింజల ఇన్ఫ్లేషన్ వరుసగా 8.16 శాతం, 4.06 శాతంగా రికార్డయింది.
