చూడ్డానికి పక్కింటి కుర్రోడిలా ఉంటాడు. చలాకీగా, హుషారుగా మాట్లాడతాడు. టీవీ షోలో ఈ అబ్బాయి కనిపిస్తే.. ఆడియెన్స్కి పండగే. అంత పాపులారిటీ సంపాదించుకున్నా.. ఎక్కడో ఒక మూల నటన మీద ఆసక్తి ఉంది. దాంతో వచ్చిన అవకాశాలను అందిపుచ్చుకుంటూ ముందుకెళ్తున్నాడు ఈ యంగ్ హీరో. లేటెస్ట్గా ‘మరక్కుమ్ నెంజం’ అనే సినిమాతో తమిళ ఆడియెన్స్ని పలకరించిన రక్షణ్ .. తమిళ సూపర్ స్టార్ రజినీకాంత్ రాబోయే సినిమాలో కనిపించబోతున్నాడు! అతని మాటల్లోనే యాంకర్ నుంచి యాక్టర్ వరకు జరిగిన జర్నీ గురించి..
‘‘మాది తమిళనాడులోని చెన్నయ్. నేను కాలేజీ చదువుతున్నప్పుడు నాన్న చనిపోయాడు. దాంతో ఇంటి బాధ్యంతా అమ్మ ఒక్కతే తీసుకుంది. చదువుకునే రోజుల్లో ఫార్మసీలో జాబ్ చేయాలనుకున్నా. తర్వాత డాక్టర్ అయితే బెటర్ అనిపించింది. అప్పటికి ఇంగ్లిష్ అంతగా రాదు నాకు. దాంతో అది కూడా వద్దనుకున్నా. ఎంబీఏ పూర్తి చేశా. కానీ, అందులో జాబ్ వెతుక్కోలేదు. కొత్తగా ఏదైనా చేయాలనిపించేది. అందుకే కాల్ సెంటర్లో కొన్నాళ్లు పనిచేశా. కాల్ సెంటర్లో పనిచేసేటప్పుడు.. ఫ్యూచర్లో నేను ఇంత పెద్ద బిల్డింగ్ కట్టాలి. సీఈఓ కావాలి అనిపించేది. అలా ఎప్పుడూ పెద్ద పెద్ద కలలు కనేవాడిని. నా ఆలోచనలు తెలిసిన మా టీం లీడర్ ‘‘ఎంబీఏ చదివి ఈ జాబ్కి వచ్చావేంటి? మంచి జాబ్ చూసుకో” అనేవాడు. అలాంటి నాకు సినిమాల మీద ఇష్టం ఎలా వచ్చిందో తెలియదు.
నా ఆలోచనలకు తగ్గట్టే ఇంట్లో కూడా నన్ను చాలా సపోర్ట్ చేస్తారు. ఒకసారి మెస్లో ఫుడ్ పడలేదు. అక్కడ ఉండాలి అనిపించలేదు. ఇంటికి ఫోన్ చేసి ఏడ్చా. ‘‘మేం ఉన్నాం కదా. నువ్వు నిశ్చింతగా కూర్చున్నా పర్వాలేదు’’ అని ధైర్యమిచ్చారు. ఇంటికొచ్చాక ఏం చేయాలా? అనే ఆలోచన మళ్లీ మొదలు. అప్పుడు ‘రియల్ ఎస్టేట్ చెయ్’ అన్నారు ఇంట్లో వాళ్లు. ‘‘హౌస్ బ్రోకర్గా చేయమంటారా? నేను చేయను’’ అని చెప్పా. ఆ తర్వాత బాగా ఆలోచిస్తే... నాకు పెట్స్ అంటే చాలా ఇష్టం. అందుకని పెట్ బిజినెస్ పెట్టాలనుకున్నా. కానీ, ఆ బిజినెస్కి ఫ్యూచర్ కనిపించలేదు. ఏది చేసినా గొప్పగా చేయాలనుకున్నా. అమ్మ దగ్గరకి వెళ్లి ‘‘నాకు నటించాలని ఉంది’’ అని చెప్పా. అప్పుడు తెలిసిన వాళ్ల దగ్గరకి పంపించారు. అలా 2011లో ‘ఎన్ కాదల్ దేవతై’ ప్రాజెక్ట్ పట్టాలెక్కింది. మొదటిసారి నేను నటించిన సినిమా అదే. కానీ అది రిలీజ్ కాలేదు.
యాంకర్గా..
సంపాదన కోసం కార్ డీలింగ్స్ చేశా. ఆ టైంలో ‘రాజ్ మ్యూజిక్’లో యాంకర్గా ఛాన్స్ ఉందని తెలిసింది. ఆడిషన్ ఇస్తే వెంటనే ‘ఓకే’ చేశారు. వీడియో జాకీగా కొన్నాళ్లు వర్క్ చేశా. అలా 2014లో నా కెరీర్ స్టార్ట్ చేశా. తర్వాత రాజ్ డిజిటల్ ఛానెల్లో న్యూస్ చదవమన్నారు. న్యూస్ యాంకర్గా కూడా చేశా. నాకు మొదటి నుంచి ‘విజయ్ టీవీ’లో పని చేయాలనే ఆశ ఉండేది. దాంతో అక్కడికి వెళ్తానని చెప్పా.
‘‘అందులో అవకాశం లేదు. కలైగ్నర్ ఛానెల్ ఉంది అక్కడ ట్రై చేయమ’’ని చెప్పారు. ఆ ఛానెల్లో మూవీ ఇంటర్వ్యూలు చేసే అవకాశం వచ్చింది. ఆ తర్వాత నేను కోరుకున్న విజయ్ టీవీలో ఛాన్స్వచ్చింది. ఆ టీవీలో కామెడీ షోకి హోస్ట్గా చేశా. ఆ షో డైరెక్టర్ థామ్సన్. ఆయనతోపాటు ఆ షోకి వచ్చిన సెలబ్రిటీలు కూడా నన్ను మెచ్చుకునే
వారు. ఒకసారి డైరెక్టర్ థామ్సన్ దగ్గర అసిస్టెంట్ డైరెక్టర్గా చేరతానని అడిగా. ఆయన వెంటనే ఒప్పుకున్నారు. అలా ఆయనతో ట్రావెల్ చేస్తూ.. చిన్న చిన్న క్యారెక్టర్స్ చేస్తూ యాక్టింగ్లోకి వచ్చా.
కన్నుమ్ కన్నుమ్...
2020లో ‘కన్నుమ్ కన్నుమ్ కొల్లైయడితాల్’ సినిమా ఛాన్స్ వచ్చింది. దుల్కర్ సల్మాన్తో మంచి స్నేహం ఉంది. మొదటి రోజు నుంచి ఇప్పటివరకు అలానే ఉంది. ఆ సినిమా టీంతో వర్క్ చేయడం చాలా హ్యాపీగా ఉంది. సెట్స్లో అంత ఫన్ ఉంటుందని ఊహించలేదు. ప్రతిసారీ షెడ్యూల్ అయిపోయే టైంకి ఫేర్వెల్ పార్టీలా ఉండేది. ఎందుకంటే నెక్స్ట్షెషెడ్యూల్కి వెళ్లే ముందు బ్రేక్ ఉంటుంది. దుల్కర్తో కలిసి పనిచేయడం చాలా కంఫర్టబుల్గా ఉండేది. ఆయన ఫ్రెండ్లా కలిసిపోతాడు. డైరెక్టర్ చెప్పినట్టు చేసేవాడిని. ఆయన మధ్యలో ఇంప్రవైజేషన్ చేసేవారు.
స్కూల్ బ్యాక్ డ్రాప్లో..
లాక్ డౌన్ టైంలో సినిమా అనేది ఉంటుందా? లేదా? అర్థం కాని పరిస్థితి. ఆ తర్వాత ఓటీటీ వచ్చింది. దాంతో ఎక్కడైనా నటించొచ్చు అనే ధైర్యం వచ్చింది. ‘మరక్కుమ నెంజం’ కథ వచ్చినప్పుడు ఏదో ఒక ప్లాట్ఫామ్లో రిలీజ్ అవుతుంది అనే ధీమా వచ్చింది. స్క్రిప్ట్ కూడా నచ్చింది. పైగా లీడ్ రోల్. ఫస్ట్ టైం మెయిన్ లీడ్గా చేయడం అంటే.. ఆడియెన్స్కి నన్ను ఇంట్రడ్యూస్ చేసుకోవడానికి ఈ సినిమా సరిపోతుంది
అనిపించింది. అప్పటికే రెండు మూడు స్క్రిప్ట్లు విన్నా. వాటిలో ఇదే బెస్ట్. మళ్లీ వెనక్కి వెళ్లి స్కూల్ లైఫ్ ఎంజాయ్ చేయడం థ్రిల్లింగ్గా అనిపించింది. నా రోల్ చాలా ఇంట్రెస్టింగ్గా ఉంటుంది.
ఫస్ట్ డే షూటింగ్ స్కూల్లో జరిగింది. అక్కడ అందరూ నన్ను చూసి ‘‘పెద్దవాడిలా కనిపిస్తున్నావు. కొంచెం అప్పియరెన్స్ మారాలి’’ అని చెప్పారు. నెల రోజులు టైం ఇచ్చారు. నేను కష్టపడి స్టూడెంట్లుక్ తెచ్చుకున్నా. అయితే ఏజ్ డిఫరెన్స్ తెలియడం కోసం ఈ సినిమాలో గడ్డం లేకుండా, గడ్డంతో కొన్ని సీన్స్లో కనిపిస్తా.
అది అదృష్టం!
‘వెట్టైయాన్’లో అమితాబ్ బచ్చన్, రజినీకాంత్, ఫహద్ ఫాజిల్ వంటి గొప్ప నటులు ఉన్నారు. అలాంటి సినిమాలో నాకు అవకాశం వస్తుందని కలలో కూడా అనుకోలేదు. ఒకరోజు ‘వెట్టైయార్’ టీం నుంచి ఫోన్ కాల్ వచ్చింది. ‘‘రజినీకాంత్ సినిమాలో ఒక రోల్ ఉంది. ఇలా ఉంటుంది. రెమ్యునరేషన్ ఇంత’’ అని చెప్పారు. రజినీకాంత్ అనగానే నాకు మాటలు రాలేదు. ఒకటే రిప్లయ్ అన్నింటికీ ‘‘సరే సర్. ఓకే సర్’’ అంతే. ఆ సినిమా గురించి చాలా ఎగ్జయిటింగ్గా ఉన్నా. ఈ సినిమా కోసం అంతకుముందు రెండు సినిమాలకు తీసుకున్న అడ్వాన్స్ తిరిగి ఇచ్చేశా. ఆ రెండు సినిమాల్లో నేను హీరోగా చేయాలనుకున్నవే. కానీ ‘వెట్టైయాన్’ లాంటి అవకాశం మళ్లీ రాదనిపించింది. అందుకే రోల్ చిన్నదా, పెద్దగా అని చూడకుండా ఒప్పుకున్నా. నిజానికి ఇందులో చేయడంతో నటుడిగా నా కల నెరవేరినట్టే.
అది మర్చిపోలేను..
షూటింగ్కి వెళ్లేటప్పుడు రజినీకాంత్ సర్ పక్కనే నా సీటు. పక్కన కూర్చున్నాననే కానీ, దాదాపు ముప్పావుగంట ఏం మాట్లాడలేదు. ఏం మాట్లాడాలి? ఎలా మాట్లాడాలి? తెలియలేదు. ఆ తర్వాత ఎయిర్ హోస్టెస్ వచ్చి బాదం పప్పులు ఇస్తుంటే, అవి తీసుకుని ‘‘సార్.. తీసుకోండి’’ అని ఇచ్చా. ఆయన ‘‘థ్యాంక్యూ” అంటూ తీసుకున్నారు. అప్పుడు నేను ‘‘సర్ నేను మీ సినిమాలో నటిస్తున్నా” అని చెప్పా. ఆ తరువాత చాలాసేపు మాట్లాడుకున్నాం.
- ప్రజ్ఞ
టీవీ షోలు, సినిమా షూటింగ్లు రెండూ బ్యాలెన్స్ చేస్తున్నా. మొదటి సినిమా ‘కన్నుమ్ కన్నుమ్ కాదలుమ్’ కూడా అలాగే చేశా. రెండింటినీ చేయడం అంత ఇబ్బంది అనిపించలేదు. ఇండస్ట్రీని అర్థం చేసుకుని అడ్జస్ట్ అయితే సరిపోతుంది అనేది నా ఫీలింగ్. అన్ని రకాల క్యారెక్టర్స్, మూవీస్ ట్రై చేయాలనుంది.
ఒక్క సినిమాకే..
2021లో ‘‘కన్నుమ్ కన్నుమ్ కొల్లయాడితాల్’’ సినిమాకి బెస్ట్ డెబ్యూ యాక్టర్గా ‘‘సౌత్ ఇండియన్ ఇంటర్నేషనల్ మూవీ”అవార్డ్స్కి నామినేట్ అయ్యా. నిజానికి టీవీ నుంచి వెళ్లి సినిమాల్లో నటించడమే ఒక పెద్ద సక్సెస్. అలాంటిది స్టార్ హీరోతో స్క్రీన్ షేర్ చేసుకోవడం గొప్ప విషయం. అది కాక సైమా అవార్డులకు నేను నామినేట్ అవ్వడం నా వరకు అదొక అచీవ్మెంట్.అదే సినిమాకి 2022లో బెస్ట్ సపోర్టింగ్ యాక్టర్ – మేల్ కేటగిరీలో ‘‘ది గలాటా క్రౌన్ అవార్డ్’ దక్కింది. మొదటి సినిమాకే ఇంత గుర్తింపు రావడం నా లక్.
అవార్డ్లు వచ్చాయ్
కుకు విత్ కోమాలి సీజన్ 2కి ‘బిహైండ్ వుడ్స్ గోల్డెన్ ఐకాన్’ అవార్డ్ వచ్చింది.
కలక్క పోవతు యారు? షోకి విజయ్ టెలివిజన్ అవార్డ్లో ‘ఫేవరెట్ యాంకర్ – మేల్’ అవార్డ్ దక్కింది.
2022లో విజయ్ టెలివిజన్ ఏడో వార్షిక అవార్డ్స్లో ‘కుకు విత్ కోమాలి సీజన్3’కి బెస్ట్ యాంకర్ మేల్ కేటగిరీలో అవార్డ్ గెలిచా.
