న్యూఢిల్లీ: భారతదేశ స్వదేశీ నావిగేషన్ సిస్టమ్ అయిన ‘నావిక్’ మరింత శక్తిమంతంగా పునఃప్రారంభమైంది. ఇందులో కీలకమైన ‘ఎన్‌‌‌‌‌‌‌‌వీఎస్-03’ ఉపగ్రహం విజయవంతంగా తన నిర్దేశిత గమ్యస్థానాన్ని చేరుకుంది. దీనితో మన దేశపు స్వదేశీ జీపీఎస్ వ్యవస్థ పూర్తిగా అందుబాటులోకి వచ్చి, కార్యకలాపాలు ప్రారంభించింది. అమెరికాకు చెందిన జీపీఎస్ వ్యవస్థపై విదేశీ ఆధారపడటాన్ని తగ్గించడంలో, దేశీయ సాంకేతిక పరిజ్ఞానాన్ని పెంపొందించడంలో ఈ పరిణామం ఒక మైలురాయిగా నిలిచింది. నావిగేషన్ సేవలను మరింత కచ్చితంగా, నమ్మదగిన రీతిలో అందించేందుకు ఈ ఎన్‌‌‌‌‌‌‌‌వీఎస్-03 ఉపగ్రహం తోడ్పడనుంది.
2026 అక్టోబర్ 30న శ్రీహరికోటలోని సతీష్ ధావన్ స్పేస్ సెంటర్ నుంచి జీఎస్‌‌‌‌‌‌‌‌ఎల్‌‌‌‌‌‌‌‌వీ-ఎఫ్‌18 రాకెట్ ద్వారా ఇస్రో ఈ ఉపగ్రహాన్ని అంతరిక్షంలోకి ప్రయోగించింది. ప్రయోగం అనంతరం తొలుత ప్రైమరీ ట్రాన్స్‌‌‌‌‌‌‌‌ఫర్ ఆర్బిట్‌‌‌‌‌‌‌‌లోకి చేరిన ఈ ఉపగ్రహాన్ని, వివిధ విన్యాసాల ద్వారా క్రమంగా ఉన్నత కక్ష్యలోకి ప్రవేశపెట్టారు. తాజాగా 35,842.6 మరియు 34,594.9 కి.మీ పరిధిలోని జియోసింక్రనస్ కక్ష్యలో ఉపగ్రహాన్ని విజయవంతంగా స్థిరపరిచారు.
నావిక్ లో నాలుగు ఉపగ్రహాలు
భారతదేశ సొంత నావిగేషన్ వ్యవస్థ నావిక్ దేశవ్యాప్తంగా, సరిహద్దుల వెలుపల సుమారు 1,500 కి.మీ మేర కచ్చితమైన లొకేషన్, సమయ సమాచారాన్ని అందిస్తుంది. స్మార్ట్‌‌‌‌‌‌‌‌ఫోన్‌‌‌‌‌‌‌‌లు, వాహనాలు, నౌకలు, రైళ్లు వంటి అనేక పరికరాలు ఈ సిగ్నల్స్‌‌‌‌‌‌‌‌ను నేవిగేషన్, ట్రాకింగ్ కోసం ఉపయోగించుకుంటాయి. అయితే, గతంలో కొన్ని ఉపగ్రహాల్లోని అటామిక్ క్లాక్‌‌‌‌‌‌‌‌లలో తలెత్తిన సమస్యల కారణంగా ఈ వ్యవస్థ బలహీనపడింది.
గతంలో ప్రయోగించిన ఎన్ వీఎస్-2 ఉపగ్రహం కూడా ప్రొపల్షన్ సిస్టమ్ లోపం వల్ల తన నిర్దేశిత కక్ష్యను చేరలేకపోయింది. దీనివల్ల నావిక్ పూర్తి స్థాయి సేవలు అందించడానికి అవసరమైన కనీస నాలుగు క్రియాశీలక ఉపగ్రహాల సంఖ్య తగ్గింది. తాజాగా ప్రయోగించిన ఎన్ వీఎస్ –3 శాటిలైట్ ఈ లోటును భర్తీ చేసింది. ఈ విజయంతో భారత్ తన స్వతంత్ర నావిగేషన్ సేవలను పునరుద్ధరించే దిశగా మరో అడుగు ముందుకు వేసింది.
