ఎండాకాలం వచ్చిందంటే చాలు ఎవరి నోట విన్నా... వేడి కబుర్లే వినపడతాయి. ఎంత మాట్లాడుకున్నా ఆ వేడీ తగ్గదు. వేడి వల్ల వచ్చే తిప్పలూ తప్పవు. అందుకని ఇంటిని సాధ్యమైనంత వరకు చల్లగా ఉంచేలా కొన్ని టెక్నిక్స్ ఉన్నాయి. వాటిని ఫాలో అయితే వేడి తీవ్రతను కాస్త తగ్గించొచ్చు.
ఎండాకాలం రాగానే టాప్ఫ్లోర్స్లో ఉండేవాళ్లు ఎండలు మరీ పెరగకముందే జాగ్రత్త పడాలి. కూల్ సిమెంట్ను ఇంటి పైకప్పుకి వేయిస్తే ఇంటి గోడలకు వేడి దిగదు. కూల్ సిమెంట్ తెల్లగా ఉండడం వల్ల ఎక్కువ వేడిని గ్రహించుకోదు.
ఇంటి మీద మొక్కలను పెంచితే ఇంట్లో వేడి తగ్గించొచ్చు.
క్రాస్ వెంటిలేషన్ కోసం కిటికీలు తెరిచి ఉంచాలి. కిటికీలు తెరవడం వరకు ‘ఓకే’ కానీ పొల్యూషన్ సంగతో అంటున్నారా?. అందుకే కిటికీలను తెరిచేందుకు టైమింగ్స్ ఉన్నాయి. వాటిని ఉదయం, రాత్రిళ్లు తెరిస్తే చల్లటి గాలి ఇంటి లోపలికి వస్తుంది.
ముదురు రంగులు వేడిని పీల్చుకుంటాయి. అందుకని లేతరంగు కర్టెన్లను వేయాలి. అలాగే కిటికీలకు వెదురు బ్లైండ్స్ లేదా లైట్ బ్లాకింగ్ మెటీరియల్ లేత రంగు కర్టెన్లను వాడాలి. లేదా రెగ్యులర్గా వాడే కర్టెన్ల వెనుక లైనింగ్ ఫ్యాబ్రిక్ను వాడినా గదులు చల్లగా ఉంటాయి.
పడమర, దక్షిణ దిశల్లో ఉండే కిటికీల వల్ల గదులు బాగా వేడెక్కుతాయి. అందుకని, కార్లకు వాడినట్టు విండోస్ ఫిల్మ్స్ని ఇంట్లో కిటికీలకు కూడా వాడొచ్చు. ఇవి ఇంట్లో వేడి పెరగకుండా చేస్తాయి.
ఇంటి మీదే కాకుండా ఇంట్లో కూడా ఇండోర్ మొక్కలు పెట్టుకుంటే చల్లగా ఉంటుంది. కలబంద, పామ్, మనీ ట్రీ, స్పైడర్ ప్లాంట్ వంటి మొక్కలు గాలి నుండి హానికరమైన పదార్థాలని తీసేసి, చుట్టుపక్కల వేడిని తగ్గిస్తాయి.
బెడ్స్, సోఫాల మీద మెత్తటి కాటన్ క్లోత్స్ను వేయాలి. వేసవి కాలంలో. పాత స్టైల్, కాటన్ పరుపులు వాడటం మంచిది.