- క్లాస్ లో ఇటాలియన్ లాంగ్వేజ్రాని స్టూడెంట్స్ 30 శాతానికి మించొద్దు
రోమ్: స్కూళ్లలో బుర్ఖా, నిఖాబ్ పై ఇటలీ ప్రభుత్వం నిషేధం విధించింది. క్లాస్లో ఇటాలియన్ భాష రాని స్టూడెంట్స్30 శాతానికి మించొద్దని రూల్ పెట్టింది. ఈమేరకు ఆ దేశ ప్రధాని జార్జియా మెలోని ప్రభుత్వం గురువారం నిర్ణయం తీసుకుంది. అయితే 60 రోజుల్లోగా ఈ నిర్ణయం పార్లమెంట్ ఆమోదం పొందాల్సి ఉంటుంది. మెలోని సంకీర్ణ ప్రభుత్వానికి పార్లమెంటులో మెజారిటీ ఉండటంతో ఇది ఆమోదం పొందే అవకాశం ఉంది. ఈ కొత్త రూల్స్ను తొలి దశలో దేశవ్యాప్తంగా ఉన్న సుమారు వెయ్యి స్కూళ్లలోనే అమలు చేయనున్నారు.
ప్రధానంగా ఇటీవల ఇటలీకి వచ్చిన, ఇటాలియన్ భాషపై ఎలాంటి పరిజ్ఞానం లేని విద్యార్థులు అధికంగా ఉన్న స్కూళ్లపై ఈ నిర్ణయం ప్రభావం చూపనుంది. ఒకే ప్రాంతంలోని స్కూళ్లలో విదేశీ విద్యార్థులు ఎక్కువ మంది ఉంటే వారిని ఇతర పాఠశాలలకు పంపే అవకాశం ఉంటుంది. నిబంధనలను అమలు చేయడం సాధ్యంకాని పాఠశాలలకు మినహాయింపులు ఇస్తామని, అక్కడి స్టూడెంట్స్కు ఇటాలియన్ భాష నేర్పేందుకు చర్యలు తీసుకుంటామని ప్రభుత్వం తెలిపింది. అయితే, ఇటలీలోనే జన్మించిన విదేశీ విద్యార్థులకు ఈ నిర్ణయం వర్తించదని ప్రభుత్వం వెల్లడించింది.
రాజకీయ నిర్ణయమే..
వచ్చే ఎన్నికలను దృష్టిలో పెట్టుకుని మెలోని ప్రభుత్వం ఈ నిర్ణయం తీసుకున్నదని ప్రతిపక్షాలు విమర్శిస్తున్నాయి. ముఖ్యంగా వలసలు, జాతీయ గుర్తింపు అంశాలపై కఠిన వైఖరిని కోరుతున్న వారిని సంతృప్తి పరిచేందుకు ఆమె ఈ నిర్ణయం తీసుకున్నదని అంటున్నారు.
