జైపూర్: రాజస్థాన్‌లోని జైపూర్ రూరల్ ప్రాంతంలో అమానుష ఘటన జరిగింది. ప్రేమ జంటను కుటుంబ సభ్యులే సజీవ దహనం చేసేందుకు యత్నించారు. ఈ ఘటనలో.. ప్రియుడికి 60 శాతం కాలిన గాయాలు కాగా.. ప్రియురాలు 30 శాతం గాయాలతో బయటపడింది. ఇద్దరినీ జైపూర్ ఆస్పత్రికి తరలించి చికిత్స అందిస్తున్నారు. ఇద్దరి పరిస్థితి విషమంగా ఉందని వైద్యులు తెలిపారు. మోఖంపురా పోలీస్ స్టేషన్ పరిధిలోని భరోలావ్ గ్రామంలో ఈ దారుణం జరిగింది.
పోలీసులు తెలిపిన వివరాల ప్రకారం.. అర్ధరాత్రి ఒంటి గంట సమయంలో పొలంలోకి తీసుకెళ్లి ఈ ఇద్దరిపై పెట్రోల్ పోసి తగలబెట్టేందుకు యత్నించారు. మంటల్లో కాలిపోతూ అక్కడ నుంచి తప్పించుకునే క్రమంలో.. నొప్పికి తాళలేక ఆ యువకుడు కాపాడాలని కేకలేశాడు. ఊళ్లోకి పరిగెత్తుకుంటూ వెళ్లడంతో ఆ యువకుడిని గమనించిన గ్రామస్తులు మంటలను ఆర్పి.. హుటాహుటిన ఆసుపత్రికి తరలించారు. ఆ యువతిని కూడా వెంటనే ఆసుపత్రికి తరలించారు.
పరువు పేరుతోనో.. ఇంకో కారణంతోనో ప్రేమపై ఇలా పెద్దలు కత్తి దూస్తున్నరు. ప్రేమించడమే పాపమన్నట్టు ప్రేమికులను కడతేర్చడానికి ఏమాత్రం వెనకాడటం లేదు. అన్ని రంగాల్లో దేశం అభివృద్ధి చెందుతున్న ఈ సమయంలో కూడా పరువు హత్యలు పెరిగిపోతుండటం ఆందోళన కలిగించే అంశం. తెలంగాణలో కూడా ఇటీవల పరువు హత్యలు తరచూ వెలుగుచూస్తున్నాయి.
కుమ్రంభీం ఆసిఫాబాద్‌ జిల్లాలో నిండు గర్భిణి అయిన కోడలిని ఆమె మామే గొడ్డలితో నరికి హత్య చేశాడు. కొడుకు కులాంతర వివాహం చేసుకున్నాడనే కారణంగా ఈ దారుణానికి ఒడిగట్టాడు. తమ్ముడి లవ్ మ్యారేజ్ చేసుకున్నందుకు అన్నను చంపేశారు. ఈ పరువు హత్య రంగారెడ్డి జిల్లా ఫరూక్ నగర్ మండలంలోని ఎల్లంపల్లి గ్రామంలో జరిగింది.
