మా బలమేంటో అసెంబ్లీలో చూపించినం

• ప్రజాస్వామ్య ప్రభుత్వాన్ని కూల్చాలనుకున్నరు
• మా బలమేంటో అసెంబ్లీలో చూపించినం
• జార్ఖండ్​ సీఎం హేమంత్​ సోరెన్​

రాంచీ : జార్ఖండ్​ అసెంబ్లీలో సోమవారం జరిగిన విశ్వాస పరీక్షలో సీఎం హేమంత్​ సోరెన్​ నెగ్గారు.  జార్ఖండ్​ అసెంబ్లీలో మొత్తం 81 మంది ఎమ్మెల్యేలు ఉండగా.. 48 మంది ఆయనకు మద్దతిచ్చారు. జార్ఖండ్​ ముక్తి మోర్చా (జేఎంఎం) నుంచి 29, కాంగ్రెస్​ నుంచి 15,  ఆర్జేడీ, ఎన్​సీపీ, సీపీఐఎంఎల్​(ఎల్) నుంచి ఒక్కో ఎమ్మెల్యే, ఒక ఇండిపెండెంట్​ సభ్యుడు మొత్తం 48 మంది హేమంత్​ సోరెన్​కు అనుకూలంగా ఓటేశారు. యూపీఏ కూటమికి మొత్తం 50 మంది ఎమ్మెల్యేల మద్దతు ఉండగా.. బీజేపీకి 26 మంది ఎమ్మెల్యేల సపోర్ట్​ ఉంది. విశ్వాస పరీక్ష ఓటింగ్​కు ముందు సీఎం హేమంత్​ సోరెన్​ ప్రసంగాన్ని బీజేపీ ఎమ్మెల్యేలు అడ్డుకునేందుకు ప్రయత్నించగా ఆయన మండిపడ్డారు. దీంతో ఓటింగ్​కు ముందే.. బీజేపీ ఎమ్మెల్యేలంతా సభ నుంచి వాకౌట్​ చేశారు.

సరుకుల్లాగా ఎమ్మెల్యేలను కొనాలనుకున్నరు
విశ్వాస పరీక్షలో నెగ్గిన తర్వాత సీఎం హేమంత్​ సోరెన్​ మాట్లాడారు. ప్రతిపక్ష బీజేపీ.. జార్ఖండ్​లో ప్రజాస్వామ్య ప్రభుత్వాన్ని నాశనం చేసేందుకు అన్ని విధాలుగా ప్రయత్నిస్తున్నదని విమర్శించారు. అసెంబ్లీలో తమ బలమేంటో నిరూపితమైందన్నారు. ‘‘ప్రజలు మార్కెట్​లో బట్టలు, రేషన్, కిరాణా సరుకులు కొంటారని విన్నాం. కానీ బీజేపీ మాత్రం అంగట్లో సరుకుల్లా.. ఎమ్మెల్యేలను కొనేందుకు చూస్తున్నది” అని సోరెన్​ విమర్శించారు. గిరిజన మహిళను రాష్ట్రపతిని చేసిన బీజేపీ.. ఓ గిరిజన సీఎంను పదవి నుంచి దించేందుకు ప్రయత్నించిందన్నారు. ప్రజాస్వామ్యయుతంగా ఎన్నికైన రాష్ట్రాల్లోని ప్రభుత్వాలను పడగొట్టేందుకు బీజేపీ కుట్ర చేస్తున్నదని విమర్శించారు. 

బీజేపీయేతర రాష్ట్రాలే టార్గెట్​అధికారంలో ఉన్న బీజేపీయేతర ప్రభుత్వాలను  కేంద్రం టార్గెట్​ చేస్తోందని హేమంత్​ సోరెన్​ విమర్శించారు. జార్ఖండ్​లోనూ అలాగే వ్యవహరించిందన్నారు. జార్ఖండ్​ ఎమ్మెల్యేలను కొనేందుకు అస్సాం సీఎం హిమంత బిస్వశర్మ ఎంతో ప్రయత్నించారన్నారు. రెండు రాష్ట్రాల మధ్య ఉద్రిక్త పరిస్థితులు నెలకొనేందుకు ఆయన కారణం అవుతున్నారని విమర్శించారు. తన రాష్ట్ర పాలన చూసుకోకుండా.. జార్ఖండ్​ ప్రభుత్వాన్ని కూల్చే ప్రయత్నం ఎందుకు చేస్తున్నారని ప్రశ్నించారు. యూపీఏ ప్రభుత్వం ఉన్నంత వరకు హిమంత ఆటలు సాగవని హెచ్చరించారు.