కడెం, వెలుగు: కడెం మండలం నచ్చన్ ఎల్లాపూర్ పంచాయితీ పరిధిలోని గోండుగూడ గ్రామస్తులతో ఆర్డీవో రత్న కల్యాణి, ఎఫ్డీవో రేవంత్ చంద్ర మంగళవారం ప్రత్యేకంగా సమావేశమయ్యారు. పునరావాస మైసంపేట, రాంపూర్ గ్రామస్తుల కోసంకేటాయించిన భూములకు రెవెన్యూ పట్టాలున్నాయని, వాటిని సాగు చేయొద్దని గ్రామస్తులకు సూచించారు. గ్రామస్తులు మాట్లాడుతూ ఆ భూములను గతంలో తాము సాగు చేశామని, అందుకు తమపై అటవీ అధికారులు కేసులు సైతం నమోదు చేశారని పేర్కొన్నారు. తమకు గుంట భూమి లేదని, ఒక్కో కుటుంబానికి ఎకరం చొప్పున ఇవ్వాలని గ్రామస్తులు అధికారులను డిమాండ్ చేశారు. లేకపోతే ఆ భూముల్లో సాగు చేస్తామని స్పష్టం చేశారు. తహసీల్దార్ ప్రభాకర్, ఎఫ్ఆర్వో గీతారాణి, ఎస్సై సాయి కిరణ్, ఆర్ఐ శారద మండల అధికారులు పాల్గొన్నారు.
3 రోజుల్లో పట్టాలిస్తాం
కడెం మండలం మైసంపేట్, రాంపూర్ పునరావాస గ్రామాల వారికి కేటాయించిన భూములను మంగళవారం ఎఫ్డీవో రేవంత్ చంద్ర పరిశీలించారు. ఈ సందర్భంగా గ్రామస్తులతో సమావేశమై వారి సమస్యలు అడిగి తెలుసుకున్నారు. తమను తరలించి 14 నెలలు గడుస్తున్నా నేటికీ భూముల పట్టాలు పంపిణీ చేయలేదని, ప్యాకేజీ 1 పూర్తిగా ఇవ్వకపోవడంతో జీవనం కష్టమవుతోందని గ్రామస్తులు తమ సమస్యలు విన్నవించుకున్నారు. స్పందించిన ఎఫ్డీవో 3 రోజుల్లో పట్టాల పంపిణీ పూర్తిచేస్తామని, ప్యాకేజీ 1 పూర్తిగా అందేలా చూస్తామని హామీ ఇచ్చారు.
