బెంగళూరు : రాష్ట్ర స్థాయి నియామక బోర్డులు, కార్పొరేషన్లు చేపట్టే రిక్రూట్మెంట్పరీక్షలకు సంబంధించి అభ్యర్థులకు కర్నాటక ఎగ్జామినేషన్ అథారిటీ(కేఈఏ) డ్రెస్ కోడ్ విధించింది. ఎలాంటి డ్రెస్తో పరీక్ష హాల్లోకి రావాలనే దానిపై గైడ్లైన్స్ఇచ్చింది. తలను పూర్తిగా కప్పేలా టోపీలు లేదా దుస్తులు ధరించిన వారిని ఎగ్జామ్ సెంటర్లోకి అనుమతించబోమని స్పష్టం చేసింది. పరీక్షల్లో మోసాలు, కాపీయింగ్ను నివారించే చర్యల్లో భాగంగా ఈ నిర్ణయం తీసుకున్నట్లు వెల్లడించింది. పరీక్షలు రాసే అభ్యర్థులు.. తల, ముఖం, చెవులు, నోటిని కప్పేలా ఉండే టోపీలు, ఇతర దుస్తులు ధరించడం నిషేధం. మంగళసూత్రం, కాలికి మెట్టెలు మినహా ఇతర ఏ మెటల్ఆర్నమెంట్స్ను అనుమతించబోమని తెలిపింది.
ముఖ్యంగా పురుషులకు సంబంధించి కుర్తా పైజామాలు, జీన్స్ ప్యాంట్స్ను అనుమతించబోమని తెలిపింది. హాఫ్ హ్యాండ్స్షర్ట్ తో వచ్చే వారికే అనుమతి ఉంటుందని కేఈఏ పేర్కొంది. నవంబరు18, 19 తేదీల్లో రాష్ట్రంలో పలు బోర్డులు, కార్పొరేషన్ల ప్రవేశ పరీక్షలు జరగనున్న నేపథ్యంలో అథారిటీ ఇప్పుడు డ్రెస్ కోడ్ ప్రకటించింది. కర్నాటకలో ‘హిజాబ్’ పై ఆందోళనలు జరిగిన విషయం తెలిసిందే. తాజా మార్గదర్శకాలలో ‘హిజాబ్’ను నేరుగా ప్రస్తావించనప్పటికీ.. తలను కప్పి ఉంచే దుస్తులపై నిషేధం విధించడంతో.. హిజాబ్ను కూడా అనుమతించకపోవచ్చని తెలుస్తున్నది.
