ఆ అబ్బాయి ఓ చిన్న కంపెనీలో అకౌంటెంట్. ఎప్పుడూ దురదృష్టమే వెంటాడింది. తల్లిదండ్రులిద్దరూ కిడ్నీ జబ్బుతో చనిపోయారు. దుబాయ్లో ఉద్యోగం చేయాలనుకున్న కల కలగానే మిగిలిపోయింది. పాస్పోర్టు వచ్చినా వెళ్లలేకపోయాడు. సరే అని తనకు తెలిసిన వాళ్లు చేస్తున్న కంపెనీలోనే అకౌంటెంట్గా జాబ్లో చేరాడు. పనిలో పనిగా ఎప్పుడో అప్పుడు తగలకపోతుందా అని దుబాయ్ లాటరీ టికెట్లు కొన్నాడు. ఆరు సార్లు ప్రయత్నించాడు. ఇప్పుడు అతడిని అదృష్టం వరించింది. ₹23 కోట్ల లాటరీ తగిలింది. అతడి పేరు మహ్మద్ ఫయాజ్. ఊరు కర్ణాటకలోని జట్టిపాల. ముంబైలో అకౌంటెంట్గా పనిచేస్తున్నాడు. లాటరీలో వచ్చిన డబ్బుతో అన్నను చదివిస్తానంటున్నాడు. దుబాయ్కు వెళ్లి జాబ్ చేస్తానని చెబుతున్నాడు. తన తండ్రి సౌదీ అరేబియాలో ఎన్నోఏళ్లపాటు కష్టనష్టాలకోర్చి పనిచేశాడని చెప్పాడు. అతడికి అన్నతో పాటు ఇద్దరు చెల్లెళ్లున్నారు. తన అన్న చదువు ఆపేసి ట్రక్కు నడుపుతూ బతుకుతున్నాడని, ఇక, అన్నను పని మాన్పించి మంచి చదువులు చదివిస్తానని చెప్పాడు.
