కవితా కపూర్.. మెహందీ ఫంక్షన్కి అలియా భట్ వేసుకున్న పువ్వుల దండలు తయారుచేసింది ఈమే. కాజల్ అగర్వాల్, కత్రినా కైఫ్, సోనమ్ కపూర్, కరిష్మా తన్నా.. ఇలా టీటౌన్, బీటౌన్ బిగ్ సెలబ్రిటీలందరి పెండ్లిండ్లకి ఫ్లోరల్ జువెలరీ అల్లింది కూడా ఈమెనే. ముఖేష్ అంబానీ 50వ పుట్టిన రోజుకి ఫ్లోరల్ డెకర్ కవితనే. ఇదంతా చూసి తను ఫ్లోరల్ ఆర్ట్స్లో డిగ్రీలు, పీహెచ్డీలు చేసింది అనుకుంటే పొరపాటు. అయితే బ్యాక్గ్రౌండ్ ఉందేమో! అనుకుంటారు చాలామంది. బ్యాక్గ్రౌండ్ కూడా పెద్దది కాదు. కుటుంబాన్ని ఆర్థికంగా గట్టెక్కించడానికి ఓ మధ్యతరగతి హౌస్వైఫ్ మొదలుపెట్టిన జర్నీ ఇది. అదే ఇప్పుడు కోట్ల రూపాయల వ్యాపారం అయింది. కవిత ‘ఫ్లోరల్ ఆర్ట్స్’ని సెలబ్రిటీల హాట్ ఫేవరెట్ చేసింది. ఆమె సక్సెస్ఫుల్ జర్నీ ఇది.
ఇకబెనా..ఇదొక జపనీస్ ఫ్లవర్ అరేంజ్మెంట్ఆర్ట్. పూలకే అందాన్ని అద్దే ఆర్ట్ ఇది. రంగురంగుల పూలను అందంగా అమర్చడం. ఎండిపోయిన లేదా బతికున్న చెట్లకు, పూలకు కొత్త కళ తీసుకురావడం ఈ ఆర్ట్ స్పెషాలిటీ. ఐదువేల వేరియేషన్స్లో పూలు, మొక్కల్ని అమర్చే ఈ ఆర్ట్లో కవితా కపూర్కి మంచి పేరుంది.
అలాగే ఈమె ‘ఫ్లోరల్ ఆర్ట్’ అనే సంస్థకి ఫౌండర్ కూడా. దీని ద్వారా ఫ్లోరల్ జువెలరీ, వెడ్డింగ్ యాక్సెసరీస్ తయారీతో పాటు ఫంక్షన్లు, పెండ్లిండ్లకి స్పెషల్ ప్యాకింగ్, ఫ్లోరల్ డెకరేషన్స్ చేస్తుంటుంది. డ్రై ఫ్లోరల్ జువెలరీ... అంటే ఎండిపోయిన పూలను లాకెట్స్లో పెట్టి అందమైన చైన్లు , బ్రేస్లెట్స్ తయారుచేస్తుంటుంది. అసలు హౌస్వైఫ్ నుంచి ఎంట్రప్రెనూర్ వరకు తన జర్నీ అడిగితే ఇలా చెప్పుకొచ్చిందామె.
భర్తకి సాయంగా..
కోల్కతాలో పుట్టి, పెరిగిన కవితకి చిన్నప్పట్నించీ క్రాఫ్టింగ్ అంటే ఇంట్రెస్ట్. దానికి కారణం వాళ్ల అమ్మ. తను కూడా క్రాఫ్టింగ్ చేస్తుండేది. అలా తల్లిని చూస్తూ అందులోని టెక్నిక్స్ అన్నీ నేర్చుకుంది కవిత. కానీ, ఆ ప్యాషన్ని ప్రొఫెషన్గా మార్చింది మాత్రం అత్తింటి ఆర్థిక పరిస్థితులు. పెండ్లి తర్వాత భర్తతో కలిసి ముంబై షిఫ్ట్ అయింది కవిత. ఇంటి, వంట పనులు, కుటుంబ బాధ్యతల్లో పడి క్రాఫ్టింగ్ ఆలోచన్నే మర్చిపోయింది. కొంతకాలం అంతా బాగానే ఉన్నప్పటికీ తర్వాత తర్వాత ఆమె భర్త బిజినెస్ పూర్తిగా నష్టాల్లోకి వెళ్లింది. దాంతో చేసేదేంలేక ఆ బిజినెస్ని మూసేశాడు భర్త. ఆ పరిస్థితుల నుంచి కుటుంబాన్ని గట్టెక్కించడానికి ఫ్యామిలీ బిజినెస్ ఏదైనా పెట్టాలనుకుంది కవిత. చిన్నప్పట్నించీ క్రాఫ్టింగ్తో పాటు గార్డెనింగ్ కూడా ఇష్టం కావడంతో అటు వైపు మళ్లింది ఆమె ఆలోచన. భర్తతో కలిసి నర్సరీ పెట్టింది.
అదే టైంలో ఇకబెనా ఆర్ట్ కూడా నేర్చుకుంది. ఫ్లోరల్ జువెలరీ తయారీ మొదలుపెట్టింది. కానీ, పాతికేండ్ల కిందట వాటికంత ఆదరణ లేకపోవడంతో తక్కువ ఆర్డర్స్ వచ్చేవి. మొదట్లో వాటిని ఆమె భర్తే డెలివరీ చేసేవాడు. అలా ఆర్డర్ డెలివరీ ఇవ్వడానికి వెళ్లిన ప్రతిసారీ ‘ వీటిని మా ఆవిడ తయారుచేసింది. మీలో ఎవరికైనా కావాలంటే..ఈ నెంబర్కి ఫోన్ చేయండ’ని చెప్పేవాడు. దాంతో ఆ నోట ఈ నోట ఆమె ప్రొడక్ట్స్ గురించి తెలిసి కస్టమర్స్ పెరిగారు. అలా 2002 లో ‘ఫ్లోరల్ ఆర్ట్’ ని లాంచ్ చేసింది కవిత. దాన్ని నిలబెట్టడానికి ఆమె కూతురు సృష్టి కూడా సాయం చేసింది. ఫ్లోరల్ ఆర్ట్కి సంబంధించిన మార్కెటింగ్, కమ్యూనికేషన్స్, బ్రాండింగ్, సోషల్ మీడియా అంతా ఆ అమ్మాయే చూసుకుంది. ఇప్పటికీ వాటి మీద తనే వర్క్ చేస్తోంది.
సెలబ్రిటీలకి కేరాఫ్
మొదట్నించీ డబ్బు ఖర్చుచేసి ఎలాంటి మార్కెటింగ్ ప్రోగ్రామ్స్ చేయలేదు కవిత.. కానీ, ఆమె చేతి కళలోని అందం కస్టమర్స్ సంఖ్యని రోజురోజుకి పెంచింది. అలా సాగుతున్న ఆమె ఎంట్రప్రెనూర్ జర్నీకి బిగ్ బ్రేక్ ఇచ్చింది పదేండ్ల కిందట జరిగిన ముఖేష్ అంబానీ 50 వ పుట్టినరోజు. ఆ ఈవెంట్కి ఫ్లోరల్ డెకరేషన్ చేసింది కవిత. అప్పట్నించీ ఇక వెనక్కి తిరిగి చూసుకోవాల్సిన అవసరం రాలేదు. ఆ తర్వాత సోనమ్ కపూర్ మెహందీ ఫంక్షన్ కోసం ఫ్రెష్ ఫ్లవర్స్తో ‘కలీరా’ తయారు చేసింది. నేహా దూపియా శ్రీమంతం ఫంక్షన్కి పూలతో అందమైన కిరీటాన్ని అల్లింది. కాజల్ అగర్వాల్ పెండ్లికి కూడా రంగు రంగుల ఫ్రెష్ ఫ్లవర్స్తో జువెలరీ తయారు చేసింది. రీసెంట్గా అలియా మెహందీ ఫంక్షన్కి వేసుకున్న ఫ్లోరల్ దండలు కూడా కవిత తయారుచేసినవే. ఆ సెలబ్రిటీ లంతా వాటికి సంబంధించిన ఫొటోలు సోషల్ మీడియాలో పెట్టడంతో కస్టమర్స్ మరింత పెరిగారు. ప్రస్తుతం ఇంటర్నేషనల్ మార్కెట్
మీద కూతురితో కలిసి వర్క్ చేస్తోంది కవిత.