నాగర్‌‌కర్నూల్‌, వెలుగు: సీఎం రేవంత్ రెడ్డి స్వగ్రామం నాగర్‌ కర్నూల్‌ జిల్లా కొండారెడ్డిపల్లి గ్రామంలో సర్పంచ్, వార్డు సభ్యుల స్థానాలకు ఒక్కో నామినేషన్ మాత్రమే దాఖలైంది. సర్పంచ్‌‌గా మల్లెపాకుల వెంకటయ్య నామినేషన్ వేయగా.. 12 వార్డులకు ఒక్కో అభ్యర్థే నామినేషన్లు సమర్పించారు.
దీంతో అన్ని స్థానాలు ఏకగ్రీవం కానున్నాయి. ఆదివారం స్ర్కూటీని అనంతరం అధికారికంగా ప్రకటిస్తారని సమాచారం. కొండారెడ్డిపల్లెలో 15 మంది ఆశావహులు సర్పంచ్ స్థానాన్ని ఆశించగా.. కాంగ్రెస్, గ్రామ పెద్దల సమక్షంలో అందరికీ నచ్చజెప్పి వెంకటయ్యను ఖరారు చేశారు. రాష్ట్ర వ్యవసాయ కమిషన్ సభ్యుడు కేవీఎన్ రెడ్డి, గ్రామ నాయకులు వెంటరాగా మల్లెపాకుల వెంకటయ్య సర్పంచ్స్థానానికి నామినేషన్ వేశారు. తనకు అవకాశం ఇచ్చిన సీఎం రేవంత్ రెడ్డి, కేవీఎన్ రెడ్డి, గ్రామ పెద్దలకు రుణపడి ఉంటానని ఆయన తెలిపారు.
పెద్దల సహకారంతో గ్రామాభివృద్దికి చేతనైనంత కష్టపడతానని అన్నారు. కొండారెడ్డిపల్లి గ్రామాన్నీ దేశంలోనే ఆదర్శగ్రామంగా తీర్చిదిద్దేందుకు ప్రయత్నిస్తామని వ్యవసాయ కమిషన్ మెంబర్ కేవీఎన్ రెడ్డి తెలిపారు. వందల కోట్లతో కొండారెడ్డిపల్లి గ్రామాన్ని అభివృద్ధి చేస్తున్న సీఎం రేవంత్ రెడ్డికి కృతజ్ఞతగా ఏకగ్రీవ సర్పంచ్ను ఎన్నుకోవాలని నిర్ణయించినట్టు చెప్పారు.
జలసాధన, ఇతర ఉద్యమాల్లో పాల్గొని కాంగ్రెస్తో అనుబంధం ఉన్న వెంకటయ్యను ఏకగ్రీవంగా ఎన్నుకోవడానికి సహకరించి అందరికీ ధన్యవాదాలు తెలిపారు. కేవలం రూ.2,250 డిపాజిట్ డబ్బుతో కొండారెడ్డిపల్లి గ్రామ ఎన్నికలు జరిగాయన్నారు. అనంతరం గ్రామంలో ఊరేగింపు నిర్వహించారు.
