చత్తీస్గఢ్ను ప్రతిపక్ష ఎంపీలు సందర్శించాలి : చైర్మన్ కొరివి వేణుగోపాల్

•     అడవులను కార్పొరేట్ కంపెనీలకు అప్పగించే కుట్రను అడ్డుకోవాలి
•     ప్రజామిత్ర ప్రోగ్రెసివ్ డెమోక్రటిక్ ఫ్రంట్ చైర్మన్ కొరివి వేణుగోపాల్

కరీంనగర్, వెలుగు: ఇప్పటికే చాలా మంది మేధావులు, జర్నలిస్టులు చత్తీస్ గఢ్ లో జరుగుతున్న పరిణామాలపై చర్చ చేస్తున్నారని, అది సరిపోవడం లేదని, ఇప్పటికైనా చత్తీస్​గఢ్ రాష్ట్రంలో ఏం జరుగుతుందో తెలుసుకునేందుకు అన్ని రాష్ట్రాలకు చెందిన ప్రతిపక్ష పార్టీల ఎంపీలు సందర్శించాలని ప్రజామిత్ర ప్రోగ్రెసివ్ డెమోక్రటిక్ ఫ్రంట్ చైర్మన్ కొరివి వేణుగోపాల్ కోరారు. 

ఇది దేశ సమస్య అని, దీనిని పరిష్కరించడానికి జాతీయ, ప్రాంతీయ పార్టీలు ముందుకు రావాలన్నారు. శనివారం ఆయన కరీంనగర్ లో మీడియాతో మాట్లాడుతూ చత్తీస్​గఢ్ లోని ఆదివాసీలు మనతో పోలిస్తే వందల ఏండ్ల వెనుకబాటులో ఉన్నారని.. వారి కల్చర్, ఎడ్యుకేషన్, ఆలోచన విధానం మిగతా సమాజానికి చాలా భిన్నంగా ఉంటుందని తెలిపారు. 

ఈ అడవుల్లో సుమారు 50‌‌‌‌‌‌‌‌‌‌‌‌‌‌‌‌లక్షల కోట్ల విలువైన ఖనిజ సంపదను మల్టీ నేషనల్ కంపెనీలకు ధారపోసే ప్రయత్నం జరుగుతోందని, అందుకే మావోయిస్టులను లేకుండా చేస్తున్నట్లు అర్థమవుతున్నదన్నారు. దేశంలో అటవీ సంపద ఇప్పటికే చాలా తగ్గిపోయిందని.. తెలంగాణ, ఏపీ, మధ్యప్రదేశ్, మహారాష్ట్రకు ఆక్సిజన్ అందిస్తున్న చత్తీస్ గఢ్ చుట్టూ ఉన్న విశాలమైన అడవులను రక్షించుకోవాల్సిన అవసరం ఉందన్నారు. 

ఆదివాసీల జీవన విధానాన్ని ఆటంకపరచడం సరికాదన్నారు. ఆపరేషన్ గ్రీన్ హంట్ కాంగ్రెస్ ప్రభుత్వం హయాంలో మొదలైందని, ఆపరేషన్ కగార్ పేరిట ఇప్పుడు మావోయిస్టుల ఏరివేత జరుగుతుందన్నారు. ముఖ్యంగా ఇండియా కూటమికి సంబంధించిన ఎంపీలు సుక్మా జిల్లాను విజిట్ చేసి ఏం జరుగుతుందో తెలుసుకోవాల్సిన అవసరం ఉందన్నారు.