- డిజైన్, అనలిటిక్స్, జావాకు మస్తు డిమాండ్
- వెల్లడించిన లింక్డ్‌‌‌‌ఇన్ సర్వే
న్యూఢిల్లీ: ఎంట్రీ లెవెల్లో ఆకర్షణీయమైన జీతం కోరుకునే వాళ్లు డిజైన్, అనలిటిక్స్, జావా స్క్రిప్ట్ వంటి టెక్నాలజీలు/సాఫ్ట్వేర్లు నేర్చుకుంటే కెరీర్ బాగుంటుందని తాజా సర్వేలో తేలింది. వీటిపై పట్టు ఉంటే జాబ్స్ దొరకడం ఈజీ అవుతుందని ప్రొఫెషనల్ నెట్‌‌‌‌వర్కింగ్ ప్లాట్‌‌‌‌ఫామ్ లింక్డ్‌‌‌‌ఇన్ ఫ్రెష్ సర్వే వెల్లడించింది. దీని ప్రకారం.. జాబ్ మార్కెట్‌‌‌‌లోకి ప్రవేశించాలనుకుంటున్న ఫ్రెష్ గ్రాడ్యుయేట్లు వీటిపై ఫోకస్ చేయాలి. మునుపెన్నడూ లేని విధంగా 2023లో కంపెనీలు ఫ్లెక్సిబిలిటీని అంగీకరిస్తున్నాయి. 2022తో పోల్చితే ఆన్-సైట్ రోల్స్ కేవలం 10 శాతం తగ్గాయి. ఎంట్రీ -లెవల్ రోల్స్కు హైబ్రిడ్ లెవెల్స్ 60శాతం పెరిగాయి. ఈ మార్పు ఫ్రెష్ గ్రాడ్యుయేట్లకు ఎంతో మేలు చేస్తుంది. ప్రస్తుతం భారతదేశంలో జాబ్స్ ఇస్తున్న పరిశ్రమలలో ఆర్థిక సేవలు, సపోర్ట్ సర్వీసెస్, అకామడేషన్ సంస్థలు ఉన్నాయి. ఈ రంగాలు బ్యాచిలర్ డిగ్రీలు ఉన్న ఫ్రెష్ గ్రాడ్యుయేట్లకు మంచి అవకాశాలను అందిస్తున్నాయి. బ్యాచిలర్ డిగ్రీ లేని వారికి కూడా, అడ్మినిస్ట్రేటివ్ సపోర్ట్, సర్వీసెస్, అకామడేషన్, ఆర్థిక సేవల పరిశ్రమలలో అవకాశాలు పెరుగుతున్నాయి. బ్యాచిలర్ డిగ్రీ హోల్డర్ల కోసం రిస్క్ కన్సల్టెంట్, ఇన్వెస్ట్‌‌‌‌మెంట్ మేనేజర్, ఫైనాన్స్ అడ్మినిస్ట్రేటర్ వంటి రోల్స్ గణనీయంగా పెరుగుతున్నాయి.
ఎంబీఏ గ్రాడ్యుయేట్ల కోసం టెక్నాలజీ అసోసియేట్, కేటలాగ్ స్పెషలిస్ట్, బిజినెస్ ఇంటిగ్రేషన్ అనలిస్ట్ వంటి ఉద్యోగాలు ఎక్కువగా ఉన్నాయి. బ్యాచిలర్ డిగ్రీ హోల్డర్ల కోసం ప్రొడక్షన్ మేనేజ్మెంట్, మానవ వనరులు, సైనిక రక్షణ సేవలు, కన్సల్టింగ్ వంటి రంగాలు పుష్కలమైన అవకాశాలను అందిస్తున్నాయి. వీటిలో కొన్నింటికి డిగ్రీ కూడా అవసరం లేదు. కొన్ని రకాల సవాళ్లు ఉన్నప్పటికీ, స్కిల్స్ కలిగిన వారికి ప్రస్తుత జాబ్ మార్కెట్‌‌‌‌లో అద్భుతమైన అవకాశాలు ఉన్నాయని లింక్డ్‌‌‌‌ఇన్ కెరీర్ ఎక్స్‌‌‌‌పర్ట్ & ఇండియా సీనియర్ మేనేజింగ్ ఎడిటర్ నీరాజితా బెనర్జీ అన్నారు. ‘‘కెరీర్‌‌‌‌ను ప్రారంభించే వాళ్లు ఉద్యోగాల కోసం సరైన వ్యక్తులను ఎంచుకోవాలి. పరిశ్రమ నిపుణుల నుండి గైడెన్స్ తీసుకోవాలి. కంపెనీ వెబ్సైట్లను తరచూ చూస్తుండాలి. ఇలాంటివి చేస్తే ఉద్యోగం దక్కించుకోవడం ఈజీ అవుతుంది. ఇండస్ట్రీలకు ఎలాంటి నిపుణులు కావాలో తెలుసుకోవాలి” అని అన్నారు.
లక్షలాది మంది ఎక్స్పర్టుల కెరీర్ మార్గాలను విశ్లేషించే లింక్డ్‌‌‌‌ఇన్ ఎకనామిక్ గ్రాఫ్ (ప్లాట్‌‌‌‌ఫారమ్) డేటా ఆధారంగా ఈ ఫలితాలు వచ్చాయి. 2021-- నుంచి2023 వరకు అందుబాటులో ఉన్న డేటాను విశ్లేషించడం ద్వారా ఈ సంవత్సరం అత్యంత వేగంగా అభివృద్ధి చెందుతున్న విధులు/ఉద్యోగాలు, పరిశ్రమలు, నైపుణ్యాలను గుర్తించారు. జనవరి 2022 నుండి మార్చి 2023 వరకు లింక్డ్‌‌‌‌ఇన్‌‌‌‌లో కనిపించిన మొత్తం జాబ్ పోస్టింగ్‌‌‌‌ల ఆధారంగా టాప్ స్కిల్స్ను ఎంపిక చేశారు.
