గిరిజనులకు కౌన్సెలింగ్​ ఇచ్చిన మలేరియా శాఖ

• ఔషధ ప్రయోగాలంటూ ప్రజల ఆందోళన

భద్రాచలం, వెలుగు: 2030 సంవత్సరం నాటికి ఇండియాలో మలేరియాను నిర్మూలించాలనే లక్ష్యంతో ఐసీఎంఆర్(ఇండియన్​సెంటర్​ఫర్​ మెడికల్ రీసెర్చ్), ఎన్ఐఎంఆర్(నేషనల్ ఇనిస్టిట్యూషన్​ఆఫ్ మెడికల్ రీసెర్చ్) సంయుక్తంగా భద్రాచలం మన్యంలో రీసెర్చ్ నిర్వహించాయి. ఈ నెల 9 నుంచి 18 వరకు ఉల్వనూరు, మంగపేట, అశ్వాపురం, మణుగూరు పీహెచ్​సీల పరిధిలోని మలేరియా పీడిత గ్రామాల్లో రోగుల నుంచి బ్లడ్ శాంపిల్స్ సేకరించారు. 2005కు ముందు మలేరియా నివారణకు క్లోరోక్విన్, ప్రోమోక్విన్​వాడేవారు. ఆ మందులకు మలేరియా తగ్గకపోవడంతో రీసెర్చ్ ద్వారా వాటిని మార్చేశారు. నాటి నుంచి నేటి వరకు ఏసీటీ (ఆర్టుసినేట్​కాంబినేషన్​థెరపీ) వినియోగిస్తున్నారు.

ఇపుడు దీని ప్రభావం తగ్గిందా.. ఇంకా ఏమైనా కొత్త ఔషధం ప్రవేశపెట్టాలా.. తెలుసుకునేందుకు ఈ రీసెర్చ్​ ఒక పరిష్కారం చూపిస్తుంది. జిల్లాలో ఎక్కువగా మలేరియా కేసులు నమోదైన పీహెచ్​సీలను ఎంపిక చేసి అక్కడ రీసెర్చ్ టీంలు 772 మంది నుంచి బ్లడ్​ శాంపిల్స్ సేకరించి ఢిల్లీకి తీసుకెళ్లాయి. గ్రామాల్లో ఐసీఎంఆర్, ఎన్ఐఎంఆర్​ టీంలు రీసెర్చ్ నిర్వహిస్తున్న సమయంలో ఈ ప్రాంతంలో ప్రైవేటు ఔషధ కంపెనీలు వారి మందులను ప్రయోగించడానికి సర్వే చేస్తున్నాయని అపోహలు వచ్చాయి. దీంతో గిరిజనులు బెంబేలెత్తిపోయారు. రీసెర్చ్ టీంలను నిలదీశారు. దీనిపై అసిస్టెంట్ మలేరియా ఆఫీసర్​ వెంకటేశ్వర్లు మాట్లాడుతూ రీసెర్చ్పై ఎలాంటి అపోహలు వద్దని చెప్పారు. రీసెర్చ్​ఉద్దేశాన్ని కోయభాషలో స్థానిక గిరిజనులకు వివరించిన తర్వాతే బ్లడ్​శాంపిల్స్​సేకరించామన్నారు.ప్రస్తుతం జిల్లాలో మలేరియా చాలావరకు నియంత్రణలో ఉందన్నారు. 2020లో 604, 2021లో 351 కేసులు నమోదైతే ఈ ఏడాది అక్టోబర్​ నాటికి 205 మాత్రమే మలేరియా పాజిటివ్​ కేసులు వచ్చాయన్నారు.