‘‘ఎన్నిసార్లు ఫెయిల్ అయ్యామన్నది విషయం కాదు. ఆ ఫెయిల్యూర్కి ఎలా రెస్పాండ్ అవుతున్నామన్నది ముఖ్యం’’ అంటుంది ‘మమాఎర్త్’ ఫౌండర్ గజల్ అలగ్. ఈమె ఎంట్రప్రెనూర్ జర్నీ చూస్తే.. తాను నమ్మింది అక్షరాల నిజమని అర్థం అవుతుంది. కంపెనీ పెట్టిన రెండేండ్లలోనే ఇరవై కోట్ల రూపాయల టర్నోవర్ సాధించింది. ఆ తర్వాతి మూడేండ్లలోనే 1,200 కోట్ల రూపాయల రెవెన్యూని చేరుకుంది. అలాగని బిజినెస్లో ఎలాంటి డిగ్రీలు చేయలేదు గజల్. తన కొడుకుకి వచ్చిన ఓ సమస్యకి సొల్యూషన్ వెతుకుతూ ఇంత పెద్ద కంపెనీ పెట్టింది.
చండీగఢ్లో ఉమ్మడి కుటుంబంలో పుట్టి, పెరిగింది గజల్. పెద్దగా ఆస్తిపాస్తులు లేవు. ‘నీ జీవితానికి సంబంధించిన నిర్ణయాలు నువ్వే తీసుకోవాలంటే.. నీ కాళ్లపై నువ్వు నిలబడాలి. ఆర్థికంగా ఒకరిమీద ఆధారపడకూడద’ని వాళ్ల నాన్న ఎప్పుడూ చెప్తుండేవాడు. అందుకే చిన్నప్పట్నించీ చదువులో ముందుంది గజల్. గ్రాడ్యుయేషన్ పూర్తవ్వకముందే ఉద్యోగం తెచ్చుకుంది. ఆ తర్వాత పెండ్లి , తల్లి కాబోతుందన్న వార్త పట్టరాని సంతోషాన్నిచ్చాయి ఆమెకి. కానీ, కొడుకు అగస్త్యకి ఏ క్రీమ్, లోషన్ రాసినా వెంటనే ర్యాషెస్ వచ్చేవి. వాటిని తట్టుకోలేక కొడుకు ఏడుస్తుంటే.. తల్లిగా చూడలేకపోయింది. మార్కెట్లో ఉన్న ఏ ప్రొడక్ట్ వాడినా ఇదే పరిస్థితి. ఏ హాస్పిటల్కి వెళ్లినా సొల్యూషన్ దొరకలేదు. చివరి ప్రయత్నంగా విదేశాల్లో తయారైన ప్రొడక్ట్స్ని వాడింది. ఆశ్చర్యంగా అవి ఎలాంటి రియాక్షన్ చూపించలేదు. అప్పుడు ఆలోచనలో పడింది.
నువ్వెందుకు చేయకూడదన్నారు
ఆరోజు నుంచి ప్రొడక్ట్స్ లేబుల్స్ని చెక్ చేయడం మొదలుపెట్టింది గజల్. ఇంటర్నేషనల్ ప్రొడక్ట్స్.. అలాగే మన మార్కెట్లో ఉన్న ప్రొడక్ట్స్ తయారీలో వాడుతున్న ఇంగ్రెడియెంట్స్ని స్టడీ చేసింది. అందులో భాగంగా..చాలా దేశాల్లో పిల్లల స్కిన్ కేర్ ప్రొడక్ట్స్కి సంబంధించి.. 1,500 లకి పైగా ఇంగ్రెడియెంట్స్ని బ్యాన్ చేశారని తెలుసుకుంది. కానీ, మన దగ్గర అలాంటి పరిస్థితులేం లేవు. దానివల్ల అసలు పిల్లలకి ఏ ప్రొడక్ట్ సేఫ్ అన్నది పేరెంట్స్ తెలుసుకోలేకపోతున్నారని అర్థం చేసుకుంది. పిల్లల కోసం ప్రొడక్ట్స్ తయారుచేస్తున్న కంపెనీలకి వెళ్లింది. ‘ఇతర దేశాల్లో వాడుతున్న ఇంగ్రెడియెంట్స్.. ఇక్కడ దొరకవా?’ అని అడిగితే.. అవన్నీ ఇక్కడి నుంచే బయటి దేశాలకు వెళ్తున్నాయని చెప్పారు. అదే విషయాన్ని భర్త వరుణ్ అలగ్కి చెప్తే.. ‘నువ్వెందుకు ట్రై చేయకూడదు ’ అన్నాడు. అప్పుడే ఆమె ఎంట్రప్రెనూర్ జర్నీకి మొదటి అడుగు పడింది.
ధైర్యం చేశా..
‘పిల్లల ఒంటికి ఏది సేఫ్? ఏది కాదు? అన్నది చెప్పాలనుకున్నా. నా కొడుకు లాంటి మరెందరో పిల్లల కోసం కెమికల్ ఫ్రీ ప్రొడక్ట్స్ని తేవాలనుకున్నా. ఇండియన్ యూజర్స్ ఛాయిస్ మార్చాలనుకున్నా. అందుకు చాలా రీసెర్చ్ చేశా. 2016 లో ఇన్వెస్టర్ల చుట్టూ కాళ్లు అరిగేలా తిరిగి రూ.90 లక్షలు జమచేసి ఆరు బేబీ ప్రొడక్ట్స్ తీసుకొచ్చా. వాట్సాప్ గ్రూప్ల ద్వారా వేలమంది తల్లులతో కనెక్ట్ అయి.. టెస్టింగ్ కోసం వాళ్లకి ప్రొడక్ట్స్ పంపించా. వాళ్లలో చాలామంది ‘మీ ప్రొడక్ట్స్ సేఫ్ అని మేము ఎలా నమ్మాలి? ’ అన్నారు. ఆలోచిస్తే ఆ ప్రశ్నలు కరెక్టే అనిపించాయి. వాటికి సమాధానంగా ‘మేడ్సేఫ్’ అనే నాన్ ప్రాఫిట్ ఆర్గనైజేషన్కి ప్రొడక్ట్స్ శాంపిల్స్ పంపించాం. వాళ్లు ఫలానా ప్రొడక్ట్స్ పిల్లల స్కిన్కి, ఎన్విరాన్మెంట్కి మంచిదా? కాదా? అని టెస్ట్ చేస్తారు. అలా అన్ని విధాలా ప్రొడక్ట్స్ సేఫ్ అనిపించాకే మార్కెట్లోకి తీసుకొచ్చాం. నోటి మాట ద్వారానే ప్రొడక్ట్స్ అన్నింటికీ మంచి రీచ్ వచ్చింది. దాంతో చాలామంది తల్లులు.. ‘బిడ్డకి జన్మనిచ్చేది తల్లి కదా! మరి మా కోసం ప్రొడక్ట్స్ తయారుచేయరా’ అని అడిగారు. వాళ్లకోసం కెమికల్స్ లేని ప్రొడక్ట్స్ తయారుచేశాం. ఆ తర్వాత కొద్దిరోజులకు ఒక క్యాంపెయిన్కి వెళ్తే ‘‘అమ్మల కోసమేనా..నాన్నలు కూడా బిడ్డల్ని జాగ్రత్తగా చూసుకుంటారు కదా!’’ అన్నారు. దాంతో పిల్లల కోసం మొదలు పెట్టిన మమాఎర్త్ని ఫ్యామిలీ బ్రాండ్గా మార్చాం. వ్లాగర్స్, యూట్యూబర్స్తో కలిసి మార్కెటింగ్ చేయించాం. దీనంతటికి మా ఆయన వరుణ్ చాలా సపోర్ట్ చేశారు. మమాఎర్త్ కో– ఫౌండర్గా కంపెనీని జనాల్లోకి తీసుకెళ్లడానికి అన్ని విధాల ప్రయత్నించారు.
‘అప్పటివరకు సంపాదించుకున్న ఐదు పది కూడా బిజినెస్లోనే పెడుతుంటే...మా అమ్మానాన్న కూడా ‘ఏం చేస్తున్నావో తెలుస్తోందా’? అని అడిగారు . అయినా.. మా మీద మాకున్న నమ్మకంతో ముందుకెళ్లాం. మా ప్రొడక్ట్స్ని ఒక బ్రాండ్గా తీర్చిదిద్దడానికి రేయింబవళ్లు కష్టపడ్డాం. రోజుకి రెండుమూడు గంటలు మాత్రమే పడుకున్న రోజులున్నాయ్. ఆ కష్టమే ఈ రోజు మమాఎర్త్ని ఇక్కడి వరకు తీసుకొచ్చింది. ఎలాంటి బిజినెస్ డిగ్రీ, ఎక్స్పీరియెన్స్ లేకుండా నేను ఇక్కడి వరకు రాగలిగినప్పుడు.. తలుచుకుంటే ఎవరైనా రాగలరు. దానికి కావాల్సిందల్లా అనుకున్నది సాధించాలన్న పట్టుదల, మొండితనమే’.
