'ప్రేమ ఇష్క్ కాదల్', 'వైశాఖం' వంటి చిత్రాలలో నటించి గుర్తింపు పొందిన హరీష్ ధనుంజయ్ హీరోగా, గీత రచయితగా పేరున్న చైతన్య వర్మ నడింపల్లి దర్శకత్వంలో రూపొందిన లేటెస్ట్ మూవీ "మరువ తరమా". అవంతిక, అతుల్య చంద్ర కథానాయికలుగా నటించిన ఈ సినిమా, యూత్ ఆడియన్స్‌ని లక్ష్యంగా చేసుకొని శుక్రవారం (2025 నవంబర్ 28న) థియేటర్లోకి వచ్చింది. మరి ఈ ట్రయాంగిల్ లవ్ స్టోరీ యువతను ఏ మేరకు ఆకట్టుకుంది? అనేది పూర్తి రివ్యూలో చూద్దాం.
కథగా:
రిషి (హరీష్ ధనుంజయ్), సింధు (అవంతిక), అన్వీ (అతుల్య చంద్ర) ముగ్గురూ సహోద్యోగులు. సింధును చూడగానే రిషి ఆమెతో ప్రేమలో పడతాడు. అయితే, మరోవైపు అన్వీ కూడా రిషిని గాఢంగా ప్రేమిస్తుంది, కానీ రిషి మనసు సింధుకే దక్కడంతో తన ప్రేమను మౌనంగా దాచుకుంటుంది. ఈ త్రికోణ ప్రేమలో చిక్కుకున్న రిషి, సింధు కొన్ని కారణాల వల్ల విడిపోవాల్సి వస్తుంది. ఆ వియోగం తర్వాత రిషి జీవితంలో ఏం జరిగింది? సింధు తిరిగి రిషి దగ్గరికి రావడానికి కారణం ఏమిటి? రిషి తల్లి (రోహిణి) పాత్ర ఈ కథను ఎలా ప్రభావితం చేసింది? అన్వీ తన ప్రేమను చివరకు రిషికి చెప్పగలిగిందా? అనే అంశాల చుట్టూ కథనం తిరుగుతుంది.
విశ్లేషణ:
ట్రయాంగిల్ లవ్ స్టోరీలను డీల్ చేసేటప్పుడు, పాత మూసకు భిన్నంగా ఆడియన్స్‌ని కొత్తగా ఎంగేజ్ చేయడం దర్శకుడికి ఒక సవాలు. దర్శకుడు చైతన్య వర్మ కథను సహజంగా, రియలిస్టిక్ టచ్‌తో నడిపించడానికి ప్రయత్నించారు.
ఫస్టాఫ్..
ఈ భాగంలో కథ వేగం చాలా నెమ్మదిగా సాగుతుంది. రిషి, అతని స్నేహితుల మధ్య వచ్చే కామెడీ సన్నివేశాలు, ఆఫీస్ వాతావరణం యూత్‌కు కనెక్ట్ అయినా, అవి కథను ముందుకు తీసుకెళ్లడంలో పూర్తిగా సాయపడలేదు. హాస్యం, చిన్న పంచులతో కూడిన సంభాషణలు అక్కడక్కడా నవ్విస్తాయి. అయితే, ఎడిటింగ్‌లో లోపాలు ఉండటం వల్ల కొన్ని సన్నివేశాలు సాగదీసినట్టు అనిపించి, ప్రేక్షకుడు అసహనానికి గురయ్యే అవకాశం ఉంది.
సెకండాఫ్..
సినిమాకు అసలైన బలం, ఆత్మ ఈ భాగంలోనే ఉంది. రిషి-సింధు విడిపోవడం, ఆ తర్వాత వచ్చే భావోద్వేగ సన్నివేశాలపై దర్శకుడు ఎక్కువ దృష్టి పెట్టారు. పాత్రల మధ్య సంఘర్షణ, తల్లి (రోహిణి) చెప్పే జీవిత సత్యాలు ప్రేక్షకులను కథకు ఎమోషనల్‌గా కనెక్ట్ చేస్తాయి. రోహిణి పాత్ర చెప్పే "అనుకున్నట్లు జరిగితే అది ప్రేమ ఎందుకు అవుతుంది?" లాంటి డైలాగ్స్ నిజంగా గుండెకు హత్తుకునేలా ఉన్నాయి. ఈ భాగంలో కథనం పరిచయం ఉన్నదే అయినా, రియలిస్టిక్ సన్నివేశాల కారణంగా "ఇలాగే జరిగింది కదా" అని ప్రేక్షకుడు తన జీవితానికి రిలేట్ చేసుకునే అవకాశం ఉంటుంది. సెకండాఫ్‌లో దర్శకుడి భావోద్వేగ పట్టు మెచ్చుకోదగినది.
నటీనటుల పనితీరు:
రిషి పాత్రలో హరీష్ చూడటానికి బాగానే ఉన్నాడు. యూత్‌ఫుల్ పాత్రలకు సరిపోయే ఈజ్ నటనలో చూపించినా, కీలకమైన ఎమోషనల్ సీన్స్‌లో ఇంకాస్త పరిణతి అవసరం అనిపిస్తుంది. తన డైలాగ్ డెలివరీ బాగుంది. సింధు అవంతిక చాలా చక్కగా నటించింది. భావోద్వేగ సన్నివేశాలను, ముఖ్యంగా విడిపోయే సన్నివేశాలను బాగా పండించింది.
అతుల్యకు పాత్ర పరిధి తక్కువే అయినప్పటికీ, రిషి పట్ల తనకున్న మౌన ప్రేమను, బాధను మెప్పించే స్థాయిలో ప్రదర్శించింది.రోహిణి ఆమె పాత్ర నిడివి తక్కువే అయినా, ఆమె అనుభవం డైలాగ్ డెలివరీలో స్పష్టంగా కనిపిస్తుంది. ఆమె చెప్పే జీవిత పాఠాలు సినిమాకే హైలైట్‌గా నిలిచాయి.హాస్యాన్ని పండించిన దినేష్ పాత్ర చేసిన నటుడు హిలేరియస్‌గా నవ్వించాడు.
సాంకేతిక బలం:
ఈ సినిమాకు అత్యంత ప్రధాన బలం సంగీతం. విజయ్ బుల్గానిన్, హరీష్ అందించిన పాటలు వినసొంపుగా ఉన్నాయి. నేపథ్య సంగీతం (BGM) గురించి ప్రత్యేకంగా చెప్పుకోవాలి; ఇది భావోద్వేగ సన్నివేశాల స్థాయిని అద్భుతంగా పెంచింది. డైలాగ్స్ సహజంగా, నేటి యువత మాట్లాడుకునే విధంగా ఉన్నాయి. సినిమాటోగ్రఫీ ఓకే అనిపించినా, నిర్మాణ విలువలు మరియు ఫస్టాఫ్‌లోని ఎడిటింగ్ మరింత మెరుగ్గా ఉంటే బాగుండేది.
ఫైనల్గా..
"మరువ తరమా" అనేది లోపాలు ఉన్నప్పటికీ, మంచి భావోద్వేగాలు, గుర్తుండిపోయే డైలాగులు, అద్భుతమైన సంగీతం కలిగిన ఒక ఫీల్-గుడ్ లవ్ స్టోరీ. రియలిస్టిక్ ప్రేమ కథలను, ఎమోషనల్ డ్రామాను ఇష్టపడే ప్రేక్షకులకు ఈ సినిమా తప్పకుండా నచ్చుతుంది. ఒక మంచి ప్రేమకథ చూడాలనుకునేవారు ఒకసారి ప్రయత్నించవచ్చు.
