హైదరాబాద్, వెలుగు: సీఎంఆర్ షాపింగ్ మాల్లో భారీ అగ్ని ప్రమాదం జరిగింది. ఉప్పల్ బస్టాప్ ఎదురుగా ఉన్న సీఎంఆర్ షాపింగ్ మాల్లో మంగళవారం రాత్రి 10 గంటలకు అకస్మాత్తుగా మంటలు చెలరేగాయి. క్షణాల వ్యవధిలోనే భారీగా వ్యాపించాయి. పెద్ద ఎత్తున మంటలు ఎగసిపడడంతో స్థానికులు భయాందోళనకు గురయ్యారు. బస్టాప్లో ఉన్న ప్యాసింజర్లు అక్కడి నుంచి పరుగులు తీశారు.
షాపింగ్ మాల్ ముందు ఉన్న ఫ్లెక్సీలు, హోర్డింగ్ పూర్తిగా దగ్ధమయ్యాయి. సమాచారం అందుకున్న ఫైర్ సిబ్బంది 4 ఫైరింజన్లతో అక్కడికి చేరుకున్నారు. గంటకు పైగా శ్రమించి మంటలను అదుపులోకి తెచ్చారు. అయితే, ప్రమాదం జరిగిన సమయంలో మాల్ లో సిబ్బంది, కస్టమర్లు లేరని నిర్వాహకులు తెలిపారు. ప్రమాదానికి షార్ట్ సర్క్యూట్ కారణమై ఉండొచ్చని ఫైర్ అధికారులు భావిస్తున్నారు.
