- ఎన్నికల ర్యాలీల్లో పాల్గొన్న ప్రజాప్రతినిధులు
- అర్ధరాత్రిదాకా వచ్చి నామినేషన్లు దాఖలు చేసిన అభ్యర్థులు
- ఇయ్యాల్టి నుంచి మలివిడత షురూ..
- ఏర్పాట్లు పూర్తి చేసిన అధికారులు
- ఉమ్మడి జిల్లాలో 564 జీపీలు, 4928 వార్డుల్లో ఎలక్షన్లు
- వచ్చే నెల 2 లాస్ట్డేట్
- 14న పోలింగ్., అదేరోజు సాయంత్రం వరకు రిజల్ట్స్
- క్యాండిడేట్ల ఫైనల్కు కసరత్తు
జనగామ/ వర్ధన్నపేట, వెలుగు : మొదటి విడత పంచాయతీ ఎన్నికల నామినేషన్ల ప్రక్రియ శనివారంతో ముగిసింది. చివరిరోజు కావడంతో భారీగా నామినేషన్లు దాఖలయ్యాయి. తొలివిడత ఎన్నికల నిర్వహణ కోసం రాష్ట్ర ఎన్నికల సంఘం కార్యదర్శి నోటిఫికేషన్‌ జారీచేయగా గురువారం నుంచి నామినేషన్ల ప్రక్రియ మొదలైంది. శుక్రవారం అష్టమి ఉండడంతో ఆ రోజు కొందరు వెనుకడుగు వేయగా, చివరి రోజు నామినేషన్ కేంద్రాలకు క్యూ కట్టారు. పలుచోట్ల నామినేషన్లు అందజేసేందుకు అభ్యర్థులు పెద్ద సంఖ్యలో కేంద్రాలకు రావడం కనిపించింది.
వరంగల్ జిల్లా వర్ధన్నపేట మండల పరిధిలోని నల్లబెల్లి మేజర్ గ్రామ పంచాయతీతోపాటు దమ్మన్నపేట, ఇల్లందలో కాంగ్రెస్ పార్టీ సర్పంచ్ మద్దతుగా నిర్వహించిన నామినేషన్ కార్యక్రమం ఘనంగా జరిగింది. భారీ సంఖ్యలో గ్రామస్తులు, కాంగ్రెస్ నాయకులు, కార్యకర్తలు పాల్గొని జనసంద్రోహంగా ర్యాలీ నిర్వహించి నామినేషన్ దాఖలు చేయించారు. ఈ కార్యక్రమంలో వర్ధన్నపేట ఎమ్మెల్యే కేఆర్ నాగరాజు పాల్గొన్నారు. ఈ మండలంలోని ఆయా గ్రామాల్లోని క్లస్టర్-4 నామినేషన్ సెంటర్ ను వరంగల్ అడిషనల్ కలెక్టర్ సంధ్య రాణి సందర్శించి, అభ్యర్థులు సర్పంచ్, వార్డు సభ్యులు నామినేషన్స్ దాఖలు చేస్తున్న విధానాన్ని పరిశీలించారు. చివరి రోజు కావడంతో ఉమ్మడి జిల్లా వ్యాప్తంగా పలుచోట్ల ఏకగ్రీవ ఎన్నికలు జరిగాయి.
మరికొన్ని చోట్ల అభ్యర్థులు ఒక్కరే ఉండడంతో గ్రామస్తులంతా కలిసి ఏకగ్రీవం చేసుకున్నారు. కాగా, అభ్యర్థులు క్లస్టర్ల వద్ద బారులు తీరడంతో రాత్రి వరకు నామినేషన్ల ప్రక్రియ కొనసాగింది. తొలివిడత నామినేషన్ల ప్రక్రియ శనివారం ముగియగా, రెండో విడత నామినేషన్లు ఆదివారం ప్రారంభం కానున్నాయి. ఈ మేరకు ఉమ్మడి వరంగల్ జిల్లాలో అధికార యంత్రాంగం ఏర్పాట్లు పూర్తి చేసింది. నామినేషన్లు వచ్చే నెల 2న ముగియనుండగా, 3న పరిశీలన, 4న అభ్యంతరాల స్వీకరణ, 5న తిరస్కరణ, 6న మధ్యాహ్నం మూడు గంటల వరకు నామినేషన్ల ఉపసంహరణ, తదుపరి తుది జాబితా విడుదల చేయనున్నారు. 14న ఉదయం 7 గంటల నుంచి మధ్యాహ్నం ఒంటి గంట వరకు పోలింగ్ చేపట్టి అదేరోజు మధ్యాహ్నం 2 తర్వాత కౌంటింగ్నిర్వహించి ఫలితాలను ప్రకటించనున్నారు.
564 జీపీల్లో రెండో విడత..
ఉమ్మడి వరంగల్ జిల్లాలోని 27 మండలాల్లోని 564 జీపీలు, 4928 వార్డులకు రెండో విడతలో ఎన్నికలు జరుగనున్నాయి. వీటిలో జనగామ జిల్లాలో 4 మండలాల్లో 79 పంచాయతీల్లో, భూపాలపల్లి జిల్లాలో 4 మండలాల్లో 85 జీపీల్లో, మహబూబాబాద్‌లో 7 మండలాల్లో 158 జీపీల్లో, హనుమకొండ జిల్లాలోని 5 మండలాల్లో 73 జీపీల్లో, వరంగల్ జిల్లాలో 4 మండలాల్లో 117 పంచాయతీల్లో, ములుగు జిల్లాలోని మూడు మండలాల్లో 52 జీపీల్లో ఎన్నికలు చేపట్టనున్నారు.
ఇదిలాఉండగా క్యాండిడేట్ల ఫైనల్ కు పార్టీలు కసరత్తులు ముమ్మరం చేశాయి. ఒక్కో ఊరిలో ప్రధాన పార్టీల నుంచి నలుగురైదుగురు గట్టిగా ప్రయత్నిస్తుండడంతో గెలుపు గుర్రాల బాధ్యత కష్టతరంగా మారింది. ఎమ్మెల్యేలు, నియోజకవర్గ ఇన్చార్జిలు సర్పంచ్ అభ్యర్థుల ఎంపికను గ్రామాల్లోని ముఖ్య లీడర్లకే అప్పగించడంతో మీటింగ్లను పెట్టుకుంటూ అభ్యర్థిత్వాల ఫైనల్కు చర్చలు, బుజ్జగింపులు చేస్తున్నారు.
