- పార్లమెంట్ఎన్నికల్లో జోరందుకుంటున్న ప్రధాన పార్టీల ప్రచారం
- మహబూబాబాద్లో మూడు పార్టీల అభ్యర్థులు ఓకే
- ఖమ్మంలో కాంగ్రెస్ మాత్రమే పెండింగ్. .రేపోమాపో ప్రకటన!
భద్రాద్రికొత్తగూడెం, వెలుగు : లోక్ సభ ఎన్నికల నేపథ్యంలో ఉమ్మడి ఖమ్మం జిల్లాలో ఇటు చేరికలు.. అటు మీటింగ్లు జోరందుకున్నాయి. నోటిఫికేషన్ మరో నాలుగు రోజుల్లో వెలువడనుండడంతో రోజురోజుకు జిల్లాలో ప్రధాన పార్టీల హడావుడి పెరుగుతోంది. ఖమ్మం పార్లమెంట్బీజేపీ, బీఆర్ఎస్ క్యాండిడేట్లు ఇప్పటికే ఫైనల్ కావడంతో వారు ప్రచారం షురూ చేశారు. కాంగ్రెస్ అభ్యర్థిపేరును ఒకట్రెండు రోజుల్లో పార్టీ హైకమాండ్ ప్రకటించనుంది. మహబూబాబాద్ పార్లమెంట్ పరిధిలో మూడు ప్రధాన పార్టీల అభ్యర్థులు ఖరారు కావడంతో వారు హోరాహోరీగా ప్రచారం చేస్తున్నారు.
సమావేశాలు.. పర్యటనలు..
ఖమ్మం లోక్ సభకు కాంగ్రెస్ తరఫున పోటీ చేసే అభ్యర్థి ఫైనల్ కాకున్నా సమావేశాలు మాత్రం జోరుగా నిర్వహిస్తున్నారు. శనివారం మంత్రి పొంగులేటి శ్రీనివాసరెడ్డి కొత్తగూడెం నియోజకవర్గంలో పర్యటించారు. నియోజకవర్గంలోని చుంచుపల్లిలో గల తన క్యాంప్ ఆఫీస్ లో ముఖ్యనేతలతో స్పెషల్ మీటింగ్ పెట్టారు. నియోజకవర్గంలోని మండలాల వారీగా ముఖ్య నేతలతో లోక్ సభ ఎన్నికల ప్రచారంపై చర్చించారు. పార్టీ తరఫున అభ్యర్థిని ఎవరిని నిలబెట్టినా వారి గెలుపే లక్ష్యంగా ప్రతి ఒక్కరూ పనిచేయాలని ఆయన సూచించారు.
అశ్వారావుపేటలో ఎమ్మెల్యే జారే ఆదినారాయణ పార్టీ ప్రచారంలో భాగంగా కార్యకర్తలను కలుస్తున్నారు. బీజేపీ అభ్యర్థి తాండ్ర వినోద్రావు చాపకింద నీరులా ప్రచారాన్ని చేపడుతున్నారు. మండలాల వారీగా పార్టీ కార్యకర్తలతో మీటింగ్లు పెడుతూ చేరికలపై స్సెషల్ ఫోకస్ పెట్టారు. బీఆర్ఎస్ సిట్టింగ్ ఎంపీ నామా నాగేశ్వరరావు ఇప్పటికే అశ్వారావుపేట, కొత్తగూడెం నియోజకవర్గ స్థాయీ ముఖ్య కార్యకర్తల మీటింగ్లు పెట్టి కార్యకర్తల్లో ఉత్సాహం నింపేందుకు ప్రయత్నిస్తున్నారు.
మహబూబాబాద్ పార్లమెంట్పరిధిలో జిల్లాలోని ఇల్లెందు, భద్రాచలం, పినపాక నియోజకవర్గాల్లో కాంగ్రెస్, బీజేపీ, బీఆర్ఎస్ అభ్యర్థులు సమావేశాలతో ముందుకు సాగుతున్నారు. కాంగ్రెస్ తరఫున పోటీ చేస్తున్న పోరిక బలరాం నాయక్ నియోజకవర్గాలను చుట్టేస్తున్నారు. మహబూబాబాద్ పార్లమెంట్ ఇన్చార్జిగా వ్యవహరిస్తున్న మంత్రి తుమ్మల నాగేశ్వరరావు పార్లమెంట్ పరిధిలోని ఏడు నియోజకవర్గాలకు చెందిన ఎమ్మెల్యేలతో ఇటీవల ఇల్లెందులో రివ్యూ మీటింగ్ పెట్టారు. బీజేపీ అభ్యర్థి సీతారాం నాయక్, బీఆర్ఎస్ తరుపున పోటీ చేస్తున్న మాలోత్ కవిత ప్రచారం ఇప్పుడిప్పుడే వేగం పుంజుకుంటోంది.
చేరికలు ఇలా..
భద్రాచలం నుంచి బీఆర్ఎస్ తరుపున గెలిచిన తెల్లం వెంకట్రావ్ ఇటీవలే కాంగ్రెస్ పార్టీలో చేరారు. రెండు రోజుల కింద భద్రాచలంలోని బీఆర్ఎస్ పార్టీకి చెందిన పలువురు కాంగ్రెస్ తీర్థం పుచ్చుకున్నారు.
జడ్పీ చైర్మన్ కంచర్ల చంద్రశేఖర్తో పాటు పలువురు ముఖ్య నేతలు పొంగులేటి సమక్షంలో కాంగ్రెస్ కండువా కప్పుకున్నారు. ఇల్లెందు నియోజకవర్గంలోనూ పలు పార్టీలకు చెందిన నేతలు కాంగ్రెస్ పార్టీలో చేరారు.
భద్రాచలం నియోజకవర్గంలోని దుమ్ముగూడెం మండలంలో శనివారం జరిగిన కాంగ్రెస్ పార్టీ మీటింగ్ లో మహిళలు పెద్ద సంఖ్యలో పార్టీలో చేరారు. మహబూబాబాద్ పార్లమెంట్ కాంగ్రెస్ అభ్యర్థి బలరాం నాయక్ వారికి కండువా కప్పి పార్టీలోకి ఆహ్వానించారు.
కొత్తగూడెం నియోజకవర్గంలో సీనియర్ అడ్వకేట్ జీవీకే మనోహార్ ఆధ్వర్యంలో పలువురు ఖమ్మం పార్లమెంట్ క్యాండిడేట్ తాండ్ర వినోద్రావు సమక్షంలో కాషాయ కండువా కప్పుకున్నారు.
