ఉదయం నిద్రలేచిన వెంటనే ప్రతి ఇంట్లో నిత్యావసరంగా మారిపోయింది పాల ప్యాకెట్‌. పిల్లలతోపాటు పెద్దలకూ రోజువారీ ఆహారంలో పాలది కీలక స్థానం. అందుకే పాలలో కల్తీ అనేది సాధారణ మోసం కాదు, ప్రజారోగ్యానికి సంబంధించిన తీవ్రమైన అంశం. పాల ప్యాకెట్‌‌‌‌పై కంపెనీ పేరు, సీలు ఉన్నంత మాత్రాన అది నాణ్యతకు శాశ్వత హామీ కాదు. రవాణా, నిల్వ, కోల్డ్‌ చైన్‌, డీలర్‌ నిర్వహణ, ప్రాసెసింగ్‌ పరిశుభ్రత ఇలా ప్రతి దశలో అప్రమత్తత అవసరం. కల్తీ పాలు తయారుచేసే అక్రమ కేంద్రాలు, నీరు లేదా ఇతర పదార్థాలు
కలిపే దందాలు అప్పుడప్పుడూ బయటపడుతున్నాయి. వాటిని సాధారణ సంఘటనలుగా తీసిపారేయలేం.
అయితే దేశవ్యాప్తంగా ప్రతి ప్యాకెట్‌ పాలు విషపూరితమని చెప్పడం కూడా సరికాదు. FSSAI 2018 జాతీయ సర్వేలో 6,432 నమూనాల్లో 12 నమూనాల్లో భద్రతకు సంబంధించిన ప్రత్యక్ష కల్తీ గుర్తించింది. అదే సమయంలో 368 నమూనాల్లో అనుమతించిన పరిమితికి మించి ఆఫ్లాటాక్సిన్‌ -M1, 77 నమూనాల్లో యాంటీబయాటిక్‌ అవశేషాలు కనిపించాయి. సమస్య లేదని కాదు, సమస్యను శాస్త్రీయంగా గుర్తించి, సమర్థంగా అరికట్టాలన్నదే దీని సందేశం.
ప్రమాదం ఎక్కడుంది?
డిటర్జెంట్లు, యూరియా, హైడ్రోజన్‌ పెరాక్సైడ్‌, స్టార్చ్‌ వంటి పదార్థాల అక్రమ వినియోగం పాల నాణ్యతకు ముప్పు. పశువుల మేత నాణ్యత, యాంటీబయాటిక్స్‌ దుర్వినియోగం, పరిశుభ్రత లోపాలు కూడా పాల భద్రతను ప్రభావితం చేస్తాయి. కాబట్టి కల్తీ అంటే కేవలం పాలలో ఏదో పదార్థం కలపడం మాత్రమే కాదు. రైతు దగ్గర నుంచి వినియోగదారుడి వరకు మొత్తం సరఫరా గొలుసు సురక్షితంగా ఉండాలి. ఆక్సిటోసిన్‌ వంటి పశువైద్య ఔషధాల అనుచిత వినియోగాన్ని కూడా అరికట్టాలి. కల్తీ పాల ప్రమాదం ప్రతిదశలోనూ ఉంది. ఈ నేపథ్యంలో పశువుల ఆరోగ్యం, సంక్షేమం దెబ్బతినకుండా శాస్త్రీయ పద్ధతుల్లో పాల ఉత్పత్తిని పెంచే మార్గాలే శాశ్వత పరిష్కారం.
మహారాష్ట్ర చూపిన మార్గం
ఇటీవల మహారాష్ట్రలో ఫుడ్‌ అండ్‌ డ్రగ్‌ అడ్మినిస్ట్రేషన్‌ కమిషనర్‌, ఐఏఎస్‌ అధికారి తుకారాం ముండే నేతృత్వంలో పాల కల్తీ, సింథటిక్‌ పాల తయారీ, ఆహార భద్రత ఉల్లంఘనలపై ఆ రాష్ట్రవ్యాప్తంగా చర్యలు ప్రారంభమయ్యాయి. పాలు సేకరణ కేంద్రాల నుంచి డెయిరీలు, రవాణాదారులు, పంపిణీదారులు, హోల్‌‌‌‌సేలర్లు, రిటైలర్ల వరకు మొత్తం సరఫరా గొలుసును నిబంధనల పరిధిలోకి తీసుకువచ్చారు. ట్రేసబిలిటీ, కోల్డ్‌ చైన్‌, పరిశుభ్రత, ఫుడ్‌ సేఫ్టీ మేనేజ్‌‌‌‌మెంట్‌‌‌‌పై స్పష్టమైన బాధ్యతలు విధించారు.
ఇది ఒక అధికారి వ్యక్తిగత ప్రచారం కోసం చేసిన కార్యక్రమంగా కాకుండా, నిబంధనలను అమలు చేయాలనే పరిపాలనా సంకల్పానికి ఉదాహరణగా చూడాలి. తుకారాం ముండే చర్యలు అధికార వ్యవస్థలో నిజాయితీ, నిష్పాక్షికత, వేగవంతమైన అమలు ఎంత కీలకమో గుర్తుచేస్తున్నాయి. తాజా నివేదికల ప్రకారం మహారాష్ట్ర ఎఫ్‌‌‌‌డీఏ విస్తృత తనిఖీలు, లైసెన్స్‌ సస్పెన్షన్లు, అరెస్టులతో ఆహార భద్రత అమలును నిరంతర కార్యక్రమంగా మార్చే ప్రయత్నం చేస్తోంది.
ప్రతినిత్యం తనిఖీలు చేయాలి
తెలంగాణ ఫుడ్‌ సేఫ్టీ అధికారులు, విజిలెన్స్‌ విభాగం మహారాష్ట్ర తరహా చురుకుదనాన్ని ప్రదర్శించాల్సిన సమయం ఇది. హైదరాబాద్ వంటి మహానగరంలో పాల డిమాండ్‌ భారీగా ఉంది. ఇతర ప్రాంతాల నుంచి వచ్చే పాలు, బల్క్‌ సరఫరా, డెయిరీలు, రవాణా, పంపిణీ వ్యవస్థపై ఆకస్మిక తనిఖీలు నిత్యం జరగాలి. కేవలం పండుగల సమయంలో లేదా ఫిర్యాదు వచ్చినప్పుడు దాడులు చేయడం సరిపోదు. కల్తీ కేంద్రాలను గుర్తించడం, మూలాన్ని కనుగొనడం, నమూనాలు సేకరించడం, ప్రయోగశాల పరీక్షలు, బాధ్యులపై కేసులు, తదుపరి న్యాయపరమైన చర్య, మొత్తం ప్రక్రియను ఒకే గొలుసుగా నిర్వహించాలి. అవసరమైన చోట మొబైల్‌ ఫుడ్‌ టెస్టింగ్‌ వాహనాలు, ఆధునిక ప్రయోగశాలలు, డిజిటల్‌ ట్రేసబిలిటీని వినియోగించాలి.
ప్రజలూ బాధ్యత తీసుకోవాలి
వినియోగదారుడు కూడా మౌనంగా ఉండకూడదు. అనుమానాస్పద ప్యాకెట్‌, వాసన, నిల్వ పరిస్థితి లేదా సరఫరాపై అనుమానం ఉంటే ఫుడ్‌ సేఫ్టీ అధికారులకు ఫిర్యాదు చేయాలి. గృహస్థాయి పరీక్షలు అవగాహనకు ఉపయోగపడవచ్చు. తుది నిర్ధారణ మాత్రం గుర్తింపుపొందిన ప్రయోగశాల పరీక్షతోనే. పాలు తెల్లగా కనిపించడం మాత్రమే స్వచ్ఛతకు ప్రమాణం కాదు. రైతు నుంచి వినియోగదారుడి గ్లాసు వరకు ప్రతి దశలో నిజాయితీ, నిఘా, బాధ్యత ఉండాలి.
మహారాష్ట్రలో ఒక అధికారి చూపించిన చురుకుదనం తెలంగాణలోని ప్రతి అధికారికి స్ఫూర్తి కావాలి. ప్రజల ఆరోగ్యానికి సంబంధించిన విషయంలో నిర్లక్ష్యపు ధోరణికి చోటుండకూడదు. కల్తీపాలతో ప్రమాదం జరిగిన తర్వాత స్పందించే వ్యవస్థ కాదు, కల్తీ జరగకముందే అడ్డుకునే వ్యవస్థ కావాలి. ప్రతి కుటుంబానికి ప్రభుత్వం ఇవ్వాల్సిన హామీ ఒక్కటే, మీరు కొంటున్నది, వినియోగిస్తున్నది కల్తీ లేని స్వచ్ఛమైన పాలు అని నమ్మకంగా చెప్పగలగాలి.
-కొలను వెంకటేశ్వర రెడ్డి,
ఎస్పీ జైళ్ల శాఖ (రిటైర్డ్)
ఓపెన్ పేజీకి వ్యాసాలు, లెటర్లు పంపాల్సిన మెయిల్ ఐడీ
[email protected]
రచయితలు ‘వెలుగు’ కు మాత్రమే పంపుతున్నామని
హామీ తప్పనిసరి రాయాలి.
స్వీయ రచన అయి ఉండాలి.
రచన 700 పదాలకు మించరాదు.
