సంగారెడ్డి, వెలుగు: జోగిపేట నుంచి అజ్జమర్రి వెళ్లడానికి మంత్రి దామోదర రాజనర్సింహా శుక్రవారం రోడ్డు పరిశీలించారు. ఈ సందర్భంగా ఆయన మాట్లాడుతూ.. ఈ దారిలో అడ్డుగా ఉన్న ఏటిపై వంతెన నిర్మిస్తే చిలప్చెడ్ మండలంలోని గ్రామాల ప్రజలు వ్యాపారం కోసం జోగిపేటకు సులువుగా రావచ్చన్నారు. అనంతరం జోగిపేటలో కొత్తగా నిర్మించిన మార్కెట్ను పరిశీలించారు. ఇక్కడ నర్సింగ్ కాలేజ్ నిర్మిస్తే ఎలా ఉంటుందో పరిశీలించాలని అధికారులకు సూచించారు.
తర్వాత జిల్లా పరిషత్ ఉన్నత పాఠశాలలో నిర్మించిన స్టేడియాన్ని పరిశీలించారు. భవనం నిరుపయోగంగా ఉండడంతో స్పోర్ట్స్ అథారిటీ వారికి లెటర్ రాసి భవనాన్ని మున్సిపల్కు అప్పగించాలని ఆర్డీఓ పాండును ఆదేశించారు. గ్రౌండ్కు పూర్తిస్థాయిలో ప్రహారీ నిర్మించి గేట్ ఏర్పాటు చేయాలని ఇద్దరిని సెక్యూరిటీగా నియమించాలన్నారు. మంత్రి వెంట కౌన్సిలర్లు సురేందర్గౌడ్, దుర్గేశ్, హరికృష్ణ, నాగరాజు, రంగ సురేశ్, అధికారులు పాల్గొన్నారు.
