ములుగు, వెలుగు: అప్పట్లో ఎన్టీ రామారావు, ఇప్పుడు కేసీఆర్ మాత్రమే మంచి సీఎంలని, మిగిలినోళ్లు బ్రోకర్లని మంత్రి ఎర్రబెల్లి దయాకర్రావు అన్నారు. తన 40ఏండ్ల రాజకీయ జీవితంలో ఎంతోమంది ముఖ్యమంత్రులను చూశానని, ఎన్టీఆర్, కేసీఆర్లాంటి మంచి సీఎంలు మరెవరూ లేరని చెప్పారు. ఎన్టీఆర్ పేదల కోసం పనిచేశారని, కేసీఆర్ కూడా పేదల కోసం పనిచేస్తున్నారని ఆయన పేర్కొన్నారు. గురువారం ములుగులో మెడికల్ కాలేజీ శంకుస్థాపన తర్వాత జరిగిన సభలో ఎర్రబెల్లి మాట్లాడారు.
‘‘60 ఏండ్ల కాంగ్రెస్ పాలనలో జరగని పనులన్నీ పదేండ్లలోనే అవుతాయా.. కొంత ఓపిక పట్టాలి” అని చెప్పారు. గిరిజనులతో పాటు గిరిజనేతరులకు కూడా పోడు పట్టాలు ఇవ్వాలని కేసీఆర్ ఆలోచించారని, గతంలో కాంగ్రెస్ చేసిన చట్టం వల్లనే పట్టాల పంపిణీ ఆలస్యమైందని అన్నారు. గిరిజనేతరులకు కూడా పట్టాల పంపిణీకి కృషిచేస్తామని ఆయన తెలిపారు. మంత్రి సత్యవతి రాథోడ్ మాట్లాడుతూ.. కేసీఆర్ ప్రభుత్వం పేదల కోసం పనిచేస్తున్నదని అన్నారు.
కాగా.. గృహలక్ష్మి, దళితబంధు లబ్ధిదారుల ఎంపికలో వివక్ష కనిపిస్తున్నదని ఎమ్మెల్యే సీతక్క ఆరోపించగా .. గతంలో మాదిరిగానే సీతక్క ఆధ్వర్యంలోనే లబ్ధిదారుల ఎంపిక ప్రక్రియ జరగుతుందని మంత్రి సత్యవతి హామీ ఇచ్చారు.
