మెదక్, వెలుగు: గవర్నర్ను అడ్డుపెట్టుకొని బీజేపీ నీచ రాజకీయాలు చేస్తోందని ఆర్థిక మంత్రి హరీశ్ రావు విమర్శించారు. ప్రభుత్వం కొత్తగా ప్రవేశ పెట్టిన ఎరుకల ఎంపవర్మెంట్ స్కీమ్ను గురువారం మహిళా, శిశు, గిరిజన సంక్షేమ మంత్రి సత్యవతి రాథోడ్ తో కలిసి ప్రారంభించారు. ఈ సందర్భంగా ఆయన మాట్లాడుతూ.. ఎరుకల కులానికి చెందిన వ్యక్తికి ఎమ్మెల్సీ పదవి వస్తే ఆ జాతి మొత్తం బీఆర్ఎస్కు అనుకూలంగా ఉంటుందని గవర్నర్కు భయమని, అందుకే ఎరుకల జాతికి చెందిన కుర్ర సత్య నారాయణ ఎమ్మెల్సీగా ఎన్నిక కాకుండా అడ్డుకున్నారని ధ్వజమెత్తారు. బీఆర్ఎస్ లో ఉండి ఎమ్మెల్సీగా ఎన్నికైతే తప్పా అని ప్రశ్నించారు. ఉత్తర ప్రదేశ్లో అధికారంలో ఉన్న బీజేపీ ఆ పార్టీ నాయకులకు నామినేటెడ్ పదవులు కేటాయించట్లేదా అని మండిపడ్డారు. ఎరుకలు, విశ్వ బ్రాహ్మణులు బీజేపీ కి తగిన గుణపాఠం చెప్పాలన్నారు. కార్యక్రమంలో మెదక్ ఎమ్మెల్యే పద్మా దేవేందర్ రెడ్డి, మాజీ ఎమ్మెల్యే సత్యనారాయణ పాల్గొన్నారు.
గుండాల గ్యాంగ్ వస్తోంది..
మెదక్ టౌన్: గొర్రెల మంద మీద తోడేళ్లు పడ్డట్టు మహిళా ఎమ్మెల్యే పద్మాదేవేందర్ రెడ్డి మీద పోటీకి హైదరాబాద్ నుంచి గుండాల గ్యాంగ్ వస్తోందని మంత్రి హరీశ్ రావు విమర్శించారు. పెద్ద పెద్ద కార్లలో నోట్ల కట్టలతో వస్తున్నవారిని.. వారు గెలిస్తే కైలాసంలో పెద్ద పాము మింగినట్టు అవుతుందన్నారు. మెదక్ జిల్లా కేంద్రాన్ని, మెడికల్ కాలేజీని సాధించిన, మెదక్ నియోజకవర్గాన్నిఎంతో అభివృద్ధి చేసిన పద్మా దేవేందర్ రెడ్డిని మళ్లీ ఎమ్మెల్యేగా గెలిపించాలని కోరారు. ఈ కార్యక్రమంలో ఎమ్మెల్యే పద్మా దేవేందర్ రెడ్డి, ఎమ్మెల్సీ రాజేశ్వర్ రావు, ఇఫ్కో డైరెక్టర్ దేవేందర్ రెడ్డి, జడ్పీ చైర్మెన్ హేమలత, వైస్ చైర్మెన్ లావణ్య, మున్సిపల్ వైస్ చైర్మన్ మల్లికార్జున్ గౌడ్ పాల్గొన్నారు.
సిద్దిపేటలో ముదిరాజ్ కన్వేన్షన్ సెంటర్ ప్రారంభం
సిద్దిపేట పట్టణంలో 7.50 కోట్ల తో నిర్మించిన ముదిరాజ్ కన్వేన్షన్ సెంటర్ ను మంత్రి హరీశ్ రావు ప్రారంభించారు. పనులను పూర్తి చేసేందుకు మరో రూ. 50 లక్షలు కేటాయిస్తానన్నారు. రాష్ట్రంలో కొత్తగా రెండు వేల సొసైటీల ను ఏర్పాటు చేసి 2 లక్షల మందికి కొత్తగా సభ్యత్వాలు ఇస్తామన్నారు. శాసనమండలి చైర్మన్ బండ ప్రకాశ్మాట్లాడుతూ.. కొత్తగా ఏర్పాటు చేసిన ముదిరాజ్ సొసైటీల్లో 18 సంవత్సరాలు నిండిన ప్రతీ ముదిరాజ్ బిడ్డకు సభ్యత్వం కల్పించినట్టు తెలిపారు. కార్యక్రమంలో ఫిషరీస్ ఫెడరేషన్ చైర్మన్ రవీందర్ పాల్గొన్నారు.
