- కవితకు ఒక తీరు.. మిగిలిన మహిళలతో ఒకతీరు
- వీఏఓల సమ్మెకు ఎమ్మెల్యే రఘునందన్రావు మద్దతు
మెదక్ టౌన్, వెలుగు : తెలంగాణ ఉద్యమంలో పాల్గొన్న మెదక్ ఎమ్మెల్యే పద్మా దేవేందర్రెడ్డిని పక్కన పెట్టి, ఉద్యమంలో ఎక్కడా కనిపించని సత్యవతి రాథోడ్, ఆంధ్రులకు సపోర్టు చేసి మరో పార్టీ నుంచి గెలిచిన సబితాఇంద్రారెడ్డికి మంత్రి పదవులు ఇచ్చారని దుబ్బాక ఎమ్మెల్యే రఘునందన్ రావు అన్నారు. సోమవారం మెదక్ కలెక్టరేట్ వద్ద సమ్మె చేస్తున్న వీఏఓలకు ఆయన సంఘీభావం ప్రకటించి మాట్లాడారు. న్యాయమైన డిమాండ్ల కోసం 22 రోజులనుంచి సమ్మె చేస్తున్న వీఏఓల గురించి కేసీఆర్గానీ, మంత్రులు హరీశ్రావు, ఎర్రబెల్లి దయాకర్రావు పట్టించుకోకపోవడం దారుణమన్నారు.
ఆడబిడ్డలందరూ తన కూతురు కవితతో సమానమన్న కేసీఆర్కు మహిళా ఉద్యోగుల కష్టాలు కనిపించడం లేదా అని ప్రశ్నించారు. ఢిల్లీ లిక్కర్ కేసులో కవితకు నోటీసులు రాగానే ఆగమాగమై ఢిల్లీకి మంత్రులను, పెద్దపెద్ద లాయర్లను పంపిన సీఎం మండుటెండలో ఇబ్బందులు పడుతూ సమ్మె చేస్తున్న వీఏఓలపై వివక్ష చూపుతున్నారన్నారు. 32 జిల్లాల్లో వీఏఓలు సమ్మె చేస్తుండగా మంత్రి హరీశ్కు భయపడి సిద్దిపేటలో సమ్మె చేయడం లేదన్నారు. ఈ రోజు కాకపోయినా రేపయినా టెంట్ వేస్తారన్నారు.
వీఏఓలకు నెలకు రూ.10 వేలు ఇవ్వాల్సి ఉండగా రూ.3,900 మాత్రమే ఇస్తున్నారని, వారికి ఉద్యోగ భద్రత కూడా లేదన్నారు. అనంతరం వీఏఓలు భిక్షాటన చేపట్టగా.. రఘునందన్తోపాటు నర్సాపూర్ మున్సిపల్ చైర్మన్ మురళీయాదవ్, బీజేపీ జిల్లా అధ్యక్షుడు శ్రీనివాస్డబ్బులిచ్చారు. లీడర్లు విజయ్, శివకుమార్, మధుసూదన్, నాగరాజు పాల్గొన్నారు.
